Read kapsiki Nde zlape ghena 7 Bible Online

Nde zlape ghena 7 - kapsiki bible

Nde zlape ghena 7

¹Megela ma zləvə ganyɛ ke 'wərdə nya ganyɛ ba'a vecia mte ke vecia ya.

²Megela ma dzeki ghɛ nya nehwene wəndə mbeli ki ke dzeki nya nza gəsəkə ki. Mte ya kakiɗi ta yayata wəndə. Ganyɛke ŋkɛ kezha kelete zəzə yayata wəndə nya teghweme te.

³Megela ma nza le mehele ketaze taze ke ŋ'wəshi. Kave nda heɗe kema ŋkɛ ke wəndə, ama wərə ŋkɛ kazhɛrete wənə ganyɛke.

⁴Ki ghɛ nya nza nehwene nza mehele ta ka ntsehwele ntsehwele. Ama ki ghɛ nya nza zlama nza mehele ta ka gezhia kɛfi.

⁵Megela ma ve sleme yitea ŋele ta nde ntsehwele ntsehwele ke tsahe ta ka gezhia kɛfi.

⁶Kwa nza ŋkɛ ne, kala gaka ta sheghwə kwa ghwele ghwele yitea dəghwə ŋ'wəshi ta gezhi. Gəmə ŋkɛ perə.

⁷Wərə yaka nya sa gezhi kazhɛrete ŋkɛ kentsehwele ntsehwele, ama wərə wəsə gəmə kabezemte mehele ta ŋkɛ.

⁸Megela ma kiɗi ta wəsə ke gha ta ŋkɛ. Ganyɛ ma zereghe ghena ke kele ghə.

⁹Hwepema wənəa ŋa kahe kahe ma. Kwa nza ŋkɛ ne, ka gezhia kɛfi ka hwepe wənə kahe kahe.

¹⁰Gezema na: «Va wa se nza nya vəashi ganyɛ ma ke nya tsetsenya wa», pa ma. Nde ntsehwele ntsehwele nde 'yɛwe ghena nya kala nya we.

¹¹Yipə yipə zləvə nya te yɛ ntsehwele le wəsə kezeme ghɛ. Yayata wəndə yakete ŋkɛ.

¹²Kwa nza ŋkɛ ne, kaya ŋkwa ŋkɛ va ndiremi kala nya ya ŋkwa cɛdɛ. Kambake nda hɛ ŋkɛ ke mbeli nyi nza ŋkɛ va hɛ. Vatse hi mbeli kaɗepete ŋkɛ.

¹³Neweve wəshi nyi menete Shala. Wa nde nza ka'yɛte wəsə nya hwelaŋgwaɗete ŋkɛ wa?

¹⁴Ma te vecia zeɗe nza ne, nza le zlama. Ma te vecia ndiremi ne, mene zəzə. Shala nde ghwene zeɗe nza keɗema ndiremi kase kezha ɗema gheɓəmə kaɗepe wəsə nya ketemene geva.

¹⁵Ma mbe nza gəməa ɗa nya ne, nahe 'ya keneweve pɛtɛa wəshi: va nza tiɗiɗia ŋkɛ mte wəndə nya tiɗiɗi, va ndiremia mehele ta ŋkɛ nza wəndə nya ndiremia mehele teghweme.

¹⁶Mbatema mbe na te nza tiɗiɗi ma, veyima ghəa ŋa na kande ntsehwelemte ntsehwele ma. Yitea wa ɗe na kaza ghəa ŋa wa?

¹⁷Mbatema mbe na te 'yaghwa mehele ma, veyima ghəa ŋa na kagezhi ma. Yitea wa ɗe na kamte tewə vəa ŋa kenaka wa?

¹⁸Ganyɛke kezha mene slene le kwa ghate ghena nya ba'a kezha ɗema kazaghəyite kwa bake. Kwa nza ŋkɛ ma wəndə nya kehawe va Shala ne, katemene slene ŋkɛ le hɛ bake nci.

¹⁹Ma ntsehwele ne, kazhɛre nde ntsehwele ntsehwele ŋkɛ berete ma ke ka ŋgwamna nyi meŋe mbe meleme.

²⁰Kwa nza ŋkɛ ne, wəndə nya tiɗiɗi nya kemene ganyɛ kaɗema kamene jaɗafa shɛ kwake te hɛɗi lema we.

²¹Vema sleme na yitea pɛtɛa ghena nyi geze mbeli ma. Ma tsagha ne, katefa nde mene slene ta ŋa na kageze ghena kwa ndiremi te gha we.

²²Nahe na keɗepe, gha perə ne, nahe na kegha kageze ghena kwa ndiremi te kweci mbeli.

²³Nahe 'ya kedzeghakɛ kanewe pɛtɛa wəshia shɛhɛ le ntsehwele. «Kentsehwele ntsehwele tenza 'ya», a 'ya sha se kageze. Ama cakeɗake nzanyɛ ŋkɛ yitea 'ya.

²⁴Ma yayata wəsə nya kenza shɛ ne, cakeɗake ba'a lɛameke ŋkɛ. Wa nde tenza kafave ŋkɛ wa?

²⁵Tagha gɛ, pa 'ya ndeke nda ghəa ɗa ke ɗepe, neweve ba'a sepa ntsehwele ba'a velɛa ghena. Pa 'ya fave tsema tsema nza nza kande 'yaghwa mehele keɗema kagezhi kadewə mehele.

²⁶Nahe 'ya keneweve kwete wəsə: ma male nya kaŋa nda keleŋa ke zhili ne, yaka nya 'yaghwa ma ke mte yakele nde kase. Nahe wənəa nta kenza kakeleŋa ba'a yɛ dzeve ta nta kashishi lɛ. Ma wəndə nya zeɗehwe nda ke Shala ne, katembele ŋkɛ ve, ama katesərə nda ghəa ŋkɛ nde jaɗafa kezha kesehwe ŋkɛ nde.

²⁷Ma ke Nde ntsehwele ntsehwele: Nahe 'ya keneweve zeweve ta wəshia shɛhɛ kwetɛ kwetɛ yitea fave yitea wa yitea wa mene geva hɛ.

²⁸Kavə kwele kwele se 'ya kasepa, ama kesləyi 'ya we. Za kwetɛŋe sləyi 'ya mbe mbeli slibə. Ama hwa pɛtɛa mi ne, male shɛ kesləyi 'ya we.

²⁹Wa nya wəsə nya fave 'ya kwetɛŋe nya: tiɗiɗi pate mbeli Shala, ama pa hɛ hwehwaɗete wəshi pɛtɛ.