Read kapsiki Cimə nya zeɗe ma 1 Bible Online

Cimə nya zeɗe ma 1 - kapsiki bible

Cimə nya zeɗe ma 1

¹Cimə nya zeɗe ma hwa pɛtɛa yɛ cimə. Nahe nde kenza hwa wəshi nyi rafete Salomon.

²Həməwəve ɗa, həməwəve ɗa gi! Nahe ɗe ta ŋa keghwəyimte ɗa za ma ke tɛ,

³za ma ke zəŋwəa yɛ 'wərdəa ŋa. Kala 'wərdə ganyɛ na. Vatse ɗehwe ŋa deghelɛshi.

⁴Ntsehe ɗa kwa sebe ta ŋa, hwɛ ɓə kanya kwetɛŋe. Meghea ɗa, keleghe ɗa kadzembe cɛa ŋa. Ma te zlaɓa ta ŋa gɛ ne, katezlama gheɓə kwele kwele. Katefa deme gheɓə te yɛ saɗe ta ŋa nyi zeɗe zeɗe ma ke tɛ. Kaganda ya va deghelɛshi nyi keɗe ŋa.

⁵Yawa, ŋwalea kwɛ nyi mbe Zhɛrəzalɛm, ɗɛke ɗɛke 'ya, ama kendeɗe ɗa 'ya kala cɛ lekwesa nyi mbe Kɛdar, kala mayafe nyi ganji ganji.

⁶Mare ɗa ma yɛ kala nya va nya nza 'ya ɗɛke ɗɛke ma, veci nde zhɛrete ɗa ɗɛke ɗɛke. Nahe wənəa ka kesaka meyɛ ɗa kebezenyɛ va 'ya, nahe hɛ keveyi ɗa kakwa ya rɛzɛŋe. Ama kaŋa rɛzɛŋea ɗa ne, kese 'ya kaya ŋkɛ we.

⁷Ma gha nya ɗe 'ya ne, gezete ɗa ŋkwa nya ya wəshi keseɗa ta ŋa na te, ŋkwa nya tsa beke na te ke hɛ kwa ghə veci. Ma tsagha ne, katendeŋe 'ya dzeyi hwa wəshi keseɗa ta ka mandalahɛ ŋa we.

⁸Male nya ganyɛ ma hwa mi, ma keɗepema ŋkwa shɛ na ne, zelete yɛ ŋkwa seɗa ta timɛti, ya zhɛgwəa lɛməa kwia ŋa dzeyi vare ghwəlia ka ya wəshi.

⁹Meghwate ɗa, kala gədəwə nya ganyɛ, nya kentsehe wəmata ta Farawon newe ŋa 'ya.

¹⁰Nahe yɛ ghweleme ta ŋa kenza kendeɗe ndeɗenji, jive kwelɛ wəshi nyi mbe sleme ta ŋa. Nahe welɛa ŋa kenza kendeɗenyɛ va livə nyi kwa.

¹¹Katemene ŋa wəshi kepesa geva ghen'yɛ yitea mze kwa tere tere nya kerafe rafe le mze kwa tɛawetɛa.

¹²Ma vəa ŋkwa nya zeme wəsə kezeme ta ŋkɛ meghea ɗa ne, kazəŋwə 'wərdəa ɗa kizə kizə.

¹³Nahe wəndə nya ɗe 'ya kenza sha 'ya kala hwepe ta 'wərdə ganyɛ nya kwelɛ ŋ'wa va 'ya.

¹⁴Nahe wəndə nya ɗe 'ya kenza sha 'ya kala ghwedzekwe ta ghwə ta rəghwə mbe wəvea rɛzɛŋe nya mbe Ɛn-Gɛdi.

¹⁵Ganyɛke na meghwate ɗa, ganyɛke na deŋwa! Kala yɛ ghwəɗəŋkwə ntsə ta ŋa.

¹⁶Kendeɗe ŋa na, gha nya ɗe 'ya, kendeɗe ŋa na deŋwa! Gwəzə nyi menjaɓa ya kagezle ta ɓə.

¹⁷Dzeve ta lekeleke ya kasheghwə nyi jive te ghɛa ɓə, yɛ vɛ ya dzeyi vare dewe nya yite.