Read kapsiki Cimə nya zeɗe ma 3 Bible Online

Cimə nya zeɗe ma 3 - kapsiki bible

Cimə nya zeɗe ma 3

¹Ma te gezle ta ɗa heviɗi ne, kasepa wəndə nya ɗe 'ya 'ya. Kasepa ŋkɛ 'ya, ama kesləyi ŋkɛ 'ya we.

²Katesate 'ya te ŋkwa, katedzasle meleme 'ya, katedzeghwa 'ya dzeyi kwa yɛ hweŋkwa ba'a dzeyi te yɛ ŋkwa kebeke. Katesepa wəndə nya ɗe 'ya 'ya. Kasepa ŋkɛ 'ya, ama kasləyi ŋkɛ 'ya we.

³Pa 'ya keme le ka ya ŋkwa nyi kedzasle meleme, ma 'ya sha hɛ: «Nahe yɛ kenakɛ wəndə nya ɗe 'ya tse na?»

⁴Zlakemtema ta ɗa ke hɛ ne, pa 'ya sləyi wəndə nya ɗe 'ya. Pa 'ya keseve ŋkɛ te dzeve, katezhɛne 'ya kapele ŋkɛ keɗema 'ya kekeleghe ŋkɛ kadzembe cɛa meyɛ ɗa, kadzembe cɛa male nya keyake ɗa we.

⁵Yawa, ŋwalea kwɛ nyi mbe Zhɛrəzalɛm, kazeme ŋayɛ fela 'ya le sləa yɛ kɛme keɗema le nyi hwa gamba: feɗeghema ɗe yɛ ma, feɗeghema ŋkɛ yɛ kaɗema nde kenaka kaɗe ma.

⁶Wa wəndə nya kese nya te ɓerama kala geɗeɗe ta n'yia ghwə nya kezəŋwə kala 'wərdə ganyɛ, 'wərdə kwa hə hə ba'a pɛtɛa 'wərdə nyi kese te kweci hɛɗi wa?

⁷Wa nya meghe Salomon nya pelɛ pasla nya kele mbeli, dzasle ŋkɛ kwa ka katsala kɛfi 60 nyi kaka katsala kɛfi nyi mbe Israyɛl.

⁸Kafayɛ ya yitea dzeve va hɛ pɛtɛ ba'a nahe hɛ ketekeve mpa. Kafayɛ ya hwa hwə va yayata wəndə kezha ya ghəa ŋkɛ va ghazlənə nya heviɗi.

⁹Nahe Salomon kemenete wəsə kentishɛ nya kele mbeli yitea sheghwəa ka Liban.

¹⁰Nahe ŋkɛ kefikɛ yɛ seɗa ta ŋkɛ le mze kwa tɛawetɛa, ŋkwa kedəŋəzə ta ŋkɛ le mze kwa tere tere, ŋkwa kentishɛ ta ŋkɛ le zlave kwa gheme nya ganyɛ. Nahe ŋwalea kwɛ nyi mbe Zhɛrəzalɛm ketsate ŋkwa nya te hwəa ŋkɛ le ɗe.

¹¹Ŋwalea kwɛ nyi mbe Zhɛrəzalɛm, nde mə kanewe meghe Salomon. Derə meghe nya ndeke nda meghekɛ te vecia wəme geva, te veci nya nza ŋkɛ mbe zlama ya yitea ghəa ŋkɛ.