Read kapsiki Cimə nya zeɗe ma 5 Bible Online

Cimə nya zeɗe ma 5 - kapsiki bible

Cimə nya zeɗe ma 5

¹'Ya kadzawa ntsa ta ɗa wəzha ta meyɛ ɗa, meghwate ɗa. 'Ya kanda 'wərdə ganyɛa ɗa ba'a kweci wəfe ta 'wərdə ta ɗa. 'Ya kazeme geləa mze ta ɗa, 'ya kasa tɛa ɗa ba'a ŋ'wa ta ɗa. Ka mcɛhɛ ɗa, zeme mə, sa mə, ghwəyi mə ghəa ŋayɛ le ɗe.

²Yitea hɛ 'ya, ama le ntsə mehele ta ɗa. Pa 'ya fate gaka ta wəsə, wəndə nya ɗe 'ya nde tsa gelembe. Pelemte ɗa ŋkwa wəzha ta meyɛ ɗa, meghwate ɗa, ghwəɗəŋkwə ta ɗa nya ɗema beze te. Nahe ghəa ɗa kenza bətə mbe mɛnɛ ba'a yɛ shintia ɗa kenza ncɛhwɛaɓɛ va mɛnɛa viɗi.

³Nahe 'ya keseɗemte lekwesa ta ɗa, katezhɛne 'ya kaseɗe ŋkɛ na? Nahe 'ya kepɛmte yɛ seɗa ta ɗa, katezhɛne 'ya kamene reɗa te hɛ na?

⁴Pa wəndə nya ɗe 'ya haghe dzeve dzeki te wəfela nya yitea gelembe, tagha gɛ, pa helia ɗa slanyɛ.

⁵Pelɛhetɛme 'ya sate te ŋkwa kezha pele nda ŋkwa. Nahe yɛ dzeve ta ɗa kenza bətə mbe 'wərdə ganyɛ, kahwɛ 'wərdəa shɛ sawa te ŋwalea dzeve ta ɗa kadzete wəsə keŋzle cɛ.

⁶Pa 'ya pelemte nda ŋkwa ke wəndə nya ɗe 'ya. Ama nahe ŋkɛ keslənyɛ, mba ŋkɛ tagha we. Cape 'ya kashave kezha zele ŋkɛ. Kazele ŋkɛ 'ya, ama kesləyi ŋkɛ 'ya we. Kaheka ŋkɛ 'ya, ama kazhɛne ɗa ŋkɛ we.

⁷Pa 'ya keme le ka ya ŋkwa nyi kedzasle meleme. Pa hɛ ɗate ɗa, pa hɛ ɗakɛ ɗa le zhi, pa hɛ kelehwe wəsə kedəpə ghə ta ɗa.

⁸Ŋwalea kwɛ nyi mbe Zhɛrəzalɛm, kampi ŋayɛ dzeve 'ya: ma kekeme yɛ le wəndə nya ɗe 'ya ne, wa ghena nya tegeze nda yɛ wa? Nahe 'ya kenza shewə va ɗe deŋwa gɛ!

⁹Ma gha nya ndeɗe ma hwa mi ne, wa wəsə nya va wəndə nya ɗe na za ma ke kwete wəndə wa? Kaganda ne, wa wəsə nya ve za ma ke kwete wəndə nda 'yɛwe ghena nya kala nya na va ghen'yɛ wa?

¹⁰Ma wəndə nya ɗe 'ya ne, wərə mbeli kaɗepete ŋkɛ hwa mbeli 10.000, nahe ŋkɛ kenza waŋe ba'a rasle.

¹¹Nahe ghəa ŋkɛ kenza kamze kwa tere tere nya ganyɛ. Nahe yɛ shintia ghəa ŋkɛ kenza teyɛɓe, nahe hɛ kenza ŋkereyi kala ghame.

¹²Nahe yɛ ntsə ta ŋkɛ kenza kala yɛ ghwəɗəŋkwə mɛa hələbə. Ma kwa nza hɛ dzeyi mɛa kwapɛ ne, kala wəsə nya nza hɛ hwa ŋ'wa.

¹³Nahe yɛ ghweleme ta ŋkɛ kenza kala ntsa nya kezəŋwə nya nza gwəzə nyi kezəŋwə megela kwa. Nahe yɛ bəzhia mɛa ŋkɛ kenza kala ghwə ta gatawəfa nya hwɛ 'wərdə ganyɛ sawa mbe.

¹⁴Nahe yɛ dzeve ta ŋkɛ kenza kala takase mze kwa tere tere nya kerafe rafe le pelɛ kwa sleke sleke. Nahe geva ta ŋkɛ kenza kala slene ta cewe kwa njehe njehe nya nza pelɛ kwa lɛa lɛa ghweme kənə.

¹⁵Nahe yɛ seɗa ta ŋkɛ kenza kala yɛ selə kwacaregesla nyi kemɓe mɓe te wəshi mze kwa tere tere nya ganyɛ. Nahe kema ta ŋkɛ kenza kala yɛ ghweme ta Liban. Nahe ŋkɛ kenza tekeleke kala yɛ lekeleke.

¹⁶Nahe mɛa ŋkɛ kenza zeɗekə kamɓisə, nahe pɛtɛa geva ta ŋkɛ kenza kawəsə kemawe. Wa nya tsetse nza ta wəndə nya ɗe 'ya, wa nya tsetse nza ta meghwate ɗa gɛ ŋwalea kwɛ nyi mbe Zhɛrəzalɛm!