Read kapsiki Ɛzayi 13 Bible Online

Ɛzayi 13 - kapsiki bible

Ɛzayi 13

¹Wa nya ghena nya kemave Ɛzayi, wəzege ta Amots te ghəa Babilone nya:

²«Ma pelɛ ghweme nya dɛrɛŋe rɛŋe ne, mɓe mə drape, tsa nda mə lewela ke ka sewajɛ, ɓake mə hɛ le dzeve kezha dzeki hɛ kwa yɛ mɛ degha ta mbeli ganji.

³'Ya nde gezete nda ghena ke mbeli nyi keveyi geva kaŋa ɗa, 'ya nde hekake ka katsala kɛfia ka sewajɛa ɗa, mbeli kezlama yitea hərə ŋkwa ta ɗa kezha ncɛ hwepe ta wənəa ɗa.»

⁴Fa mə gaka ta kwete wəsə hwa yɛ ghweme: kala gaka ta mbeli kwele kwele ŋkɛ. Fa mə gaka ta yɛ hɛɗi, ta hwelefefi nyi ketsenete geva. Mahwətə nde berete nde newe nza ta ka sewajɛ nyi ketedzemte mpa.

⁵Se te kwete hɛɗi nya cakeɗa, se te mendɛkwe ta hɛɗi se hɛ kezha beze hɛɗi pɛtɛ: Mahwətə ba'a mbeli nyi ncɛ hwepe wənəa ŋkɛ ŋkɛ laka hɛ.

⁶Nehwene mə, kwa nza ŋkɛ takwa takwa vecia Mahwətə. Katese ŋkɛ kala ndiremi nya kese va Shala nde berete.

⁷Vatse nza yɛ dzeve ta mbeli pɛtɛ kempə mpə ba'a mehele ta nci ketaze taze.

⁸Nahe hɛ keghazlənənji, kazhɛ nda yɛ mekwereŋe ba'a yɛ geva ta nci ke hɛ, kaheha hɛ kala male nya keteya. Heheɓake newe ghəa nci hɛ. Teheɗe kema kwa ghə va hɛ.

⁹Wa nya vecia Mahwətə nya kase, vecia zhɛma heli, vecia ghwə ta hwepe wənə nya wəba nya ketezhɛre hɛɗi kaɓerama nya dɛrɛŋe rɛŋe ba'a nya keteza sebe te ka jaɗafa.

¹⁰Katezhɛne saseregwa nyi te ghweme ba'a yɛ wəvəsəa nci kaɓele we. Ngərə ngərə tenza veci samema ta ŋkɛ kwa ghɛ, katezhɛne tere kaɓele we.

¹¹Ma ke Shala: «Kateme 'ya te hɛɗi lema va 'yaghwa mehele ta ŋkɛ, te mbeli nyi ndiremi ndiremi mehele va fete ta nci. Kateza sebe 'ya te kele ghə ta ka ŋkele ntsə, kateshifə zlama ta ka ghwərə ghwərəa ntsə 'ya.

¹²Katezhɛre mbeli 'ya dzawe ma ke ŋ'we mze kwa tere tere nya wɛŋe, dzawe ma ke ŋ'we ke mze kwa tere tere nya kese te hɛɗia Ofir.»

¹³Vatse gɛ ne, kategaŋkəɗə ghweme, kategaŋkəɗə hɛɗi te shihəa ŋkɛ va beze ta wənəa Mahwətə nde berete, va ghwə ta hwepe ta wənəa ŋkɛ.

¹⁴Tagha gɛ, katezhɛre geva yayata wəndə kalə sha hwelefe ta ŋkɛ, katehwɛ yayata wəndə kalə kadzete hɛɗia ŋkɛ kala kɛme nya keka mbeli, kala timɛti nyi ɗema wəndə shɛ kezha tsene hɛ.

¹⁵Katententepe have mbeli te pɛtɛa mbeli nyi tesləyi mbeli, katempə pɛtɛa mbeli nyi tekeseve mbeli va kafayɛ.

¹⁶Katempəmte geva ŋwalea nci kwa ntsə ta nci, katefəhwe geva wəshi nyi dzeyi ki ghɛa nci, kaɓelahe mbeli le mia nci kaberete.

¹⁷Ma ke Shala: «'Ya kateghwene ka Mɛde nyi keɗema ghena ta cɛdɛ ba'a nyi keɓelama mze kwa tere tere yitea hɛ.

¹⁸Katempə ka mempɛhwetɛti have ta nci, katesərə yɛ velɛnjɛ hɛ we, katezhɛ nda heli ke hɛ yitea ŋwalea fəshi we.»

¹⁹Ma Babilone, meleme nya ganyɛ te hɛɗi, wəsə kepesa geva nya zlama ka Kaldɛ yite ne, kala yɛ Sodome le Gomore nyi vate ndiremi Shala te hɛ tenza ŋkɛ.

²⁰Katezhɛne mbeli kanza mbe tɛape we, kaghala ghala tenza ŋkɛ kaɗema mbeli mbe. Ya ka Arab ne, katemɓe cɛ lekwesa ta nci hɛ mbe we, ya ka ya wəshi ne, kateghereŋe hɛ mbe we.

²¹Ama yɛ wəve ka tenza dzeyi mbe, yɛ təwəvəŋə ka teviɗi geva dzeyi ki ghɛ nyi mbe, yɛ zhenɛgə ka tenza dzeyi mbe ba'a yɛ zhɛfa lɛmə ka tejɛgwəli dzeyi mbe.

²²Yɛ deghwavaŋwe ka tenehwene dzeyi mbe ghɛ nyi bebiya bebiya ba'a yɛ kelɛ gamba ka tembɛahwɛ dzeyi ki yɛ ghɛ ganji. Takwa takwa vəa kiɗi ta Babilone kase, katemtsehe geva yɛ hɛa ŋkɛ we.