Read kapsiki Ɛzayi 14 Bible Online

Ɛzayi 14 - kapsiki bible

Ɛzayi 14

¹Katezhɛ heli Mahwətə yitea hwelefefia Zhakob, katezhɛne ŋkɛ kanta Israyɛl. Katezhɛne ka Israyɛl kadzete te hɛɗia nci. Katejikə geva ka mentiɓə le hɛ ba'a katenza hwa mbelia Zhakob.

²Katekemane hɛ kweci mbeli ba'a katefə hɛ hɛ kadzete hɛɗia nci. Tagha te hɛɗi nya kaŋa Mahwətə gɛ ne, katenehe hɛ ka Israyɛl kaka mavashia nci ba'a kaka kwaterashia nci. Katefə mbeli nyi kese kave hɛ kaka mavashi hɛ kaka mavashi. Katenza hɛ kaka sleke mbeli nyi kese kasa nda yaka ke hɛ.

³Ka Israyɛl, ma te veci nya tendeke ŋayɛ zhɛne mpi Mahwətə, kwa sebe ta yaka, taze ta mehele ba'a slene mava nya dzawe nyi kendeke ŋayɛ geva ne,

⁴ma pe yɛ sha tegha cimə te ghəa meghea ka Babilone: Tsema kiɗinyɛ nza ta nde sa nda yaka ke mbeli gɛ wa? Tsema kiɗinyɛ nza ta nde ŋkele ntsə gɛ wa?

⁵Nahe Mahwətə keɓelemte geta ta ka 'yaghwa mehele, geta kwa slekwa ta ka ghwərə ghwərəa ntsə,

⁶geta nya kese kame te mbeli le wənə le wənə, nya kese kame te mbeli kaɗema zhɛne mpi yite, nya kese ka'yɛ mbeli le berete ba'a nya kese kasa nda yaka nya dzawe ke mbeli.

⁷Tərəslə hɛɗi lema kazhɛne mpi ba'a kanza gwezlayɛ. Gaghwe yatsa mbeli.

⁸Pa le yɛ wəfe kazlama te wəsə nya kemenete ŋa geva. Ma ke yɛ vɛ ba'a yɛ lekelekea ka Liban sha geze: «Ma ghala nza na kwa kwele ne, wəndə shɛ kezhɛne kasame kampə n'yɛ we.»

⁹Gwəgwə yagwəgwə mbelia kwahɛɗi kezha se kakemane ŋa dzawama ta ŋa. Feɗeghe yafeɗeghe geva mbeli nyi kempə mpə kezha gha, pɛtɛa mbeli nyi kese te ghə te hɛɗi lema. Kafə ka meghea kɛfi nyi te ghəa hwelefefi ŋkɛ sawa pelɛ pasla ta nci.

¹⁰Ma ke hɛ pɛtɛ sha geze ŋa: «Gha perə ne, wa nya na kande dewə ŋeli kala ghen'yɛ, nahe na kezhɛre ŋa yipə yipə le ghen'yɛ!

¹¹Nahe zləvəa ŋa kadzawa ghɛa mbelia kwahɛɗi yitea gaka ta gagera. Yɛ mɛmɗi ya kagezle ta ŋa ba'a menciɗi ya kagweda ta ŋa.»

¹²Tsema menete geva ŋkɛ nda teɗe ŋa na sawa pelɛ ghweme, gha nya kasaseregwa kwa kiɗi ŋkwa gɛ wa? Wa nya na tehwepərə hwa hɛɗi, gha nya kese kahərə hwelefefi gɛ!

¹³Ma pa na sha se kageze: «Katedzeme 'ya hwa'a pelɛ ghweme, kateve pasla ta ɗa 'ya te ghəa yɛ saseregwa ta Shala, katenza 'ya pelɛ ghweme nya tsene geva yɛ shala te kwa keɗaŋe ta hɛɗi nya laka bela kwa gwela.

¹⁴Katedzeme ghəa ləmbə 'ya, kala Shala tehwə ghweme tenza 'ya.»

¹⁵Ama nahe na kedzawa ghɛa mbelia kwahɛɗi, kedzawa zeweve ta ghɛa mbelia kwahɛɗi.

¹⁶Ma mbeli nyi kenewe ŋa ne, gha yamare hɛ megela. Ma ke hɛ sha 'yɛwe: «Nya ya kawəndə nya kese nya kagaŋkəɗə hɛɗi ba'a nya se nya yɛ hɛɗia ka meghe kabare bare ve,

¹⁷nya kese nya kazhɛre hɛɗi lema kaɓerama, nya kese nya kaŋzla yɛ meleme ba'a nya kese kapele ka daŋgayɛ na?»

¹⁸Pɛtɛa ka meghea kɛfia kweci hwelefefi, kaɗema ghala, kazhɛne mpi mbe zləvə, yayata wəndə kwa kwele ta ŋkɛ.

¹⁹Ama gha ne, nahe mbeli kenegheyi ŋa cakeɗake yitea kwele ta ŋa. Kala ndiremia wəzege nya kemtenyɛ kwa hwə na, kala wəndə nya tsenaghe mbeli nyi kempə va kafayɛ mbeli kənə ba'a nyi kebeteyi geva te pelɛ nyi kwa ghɛa mbelia kwahɛɗi na.

²⁰Ama katela ŋa mbeli zlaɓe le hɛ we, kwa nza ŋkɛ ne, nahe na kebezemte hɛɗia ŋa, nahe na kezamte sebe te mbelia ŋa. Katezhɛne mbeli kahekɛme hwelefe ta ka 'yaghwa mehele tɛape we.

²¹Hi mə geva kezha mpə ŋwale tezhili te fete ta ka yitehɛ nci, yagha hɛ kasate te ŋkwa kezha kelehwe hɛɗi ba'a kezha viɗikɛ meleme nyi te hɛɗi lema.

²²Ma ke Mahwətə nde berete: «Katesate 'ya te ŋkwa yitea ka Babilone, kateza sebe 'ya te sləa Babilone, te mbeli nyi ketene teghweme mbe, te ŋwalea nci ba'a te pɛtɛa mbeli nyi keteya kwa sebe ta nci.

²³Katezhɛre melemea shɛ 'ya kaŋkwa yɛmə nya nza yɛ meŋkəɗə te. Katetsale Babilone 'ya le shimə nya keza sebe te wəshi pɛtɛ. 'Ya Mahwətə nde berete nde gezete.»

²⁴Ma ke Mahwətə nde berete zemete fela: «Katemene geva wəsə nya zəzəte 'ya, kateyipə geva wəsə nya tarete 'ya kadzawa.

²⁵Kateza sebe 'ya te berete ta ka Asiri te hɛɗia ɗa, kateŋkeɗe ŋkɛ 'ya hwa yɛ ghweme ta ɗa. Kala sheghwə nya te welɛ va sla kewəza vaghe berete ta nci hɛ kənəa mbelia ɗa, katekelemte ŋkɛ 'ya. Katekelemte geva wəsə nya ɗaŋeɗa ta nci kwa ghəa nci.»

²⁶Nya ya kawəsə nya tarete Mahwətə kaŋa hɛɗi lema, nya ya kaɗa nya vate ŋkɛ te pɛtɛa hwelefefi.

²⁷Ma vəa ŋkwa nya tarete wəsə Mahwətə nde berete ne, wa nde nza kafɛamte wəsəa shɛ wa? Ma vəa ŋkwa nya kafete dzeve ŋkɛ kaɗa ŋkwa ne, wa nde nza kazhɛnakawa dzevea shɛ wa?

²⁸Ma te va nya mte meghe Ahaz, ma ke Shala:

²⁹Ma gheyɛ ka Filisti pɛtɛ ne, zlamama yɛ va nya ɓelenyɛ geta nya kese kame te gheyɛ ma. Kwa nza ŋkɛ ne, kateshave mentsape mbe mahwama ta shishi ba'a kateshave madzeghwaya mbe mentsape.

³⁰Katezeme wəshi kezeme ka titikwəa kɛfi behe behe, katenza ka dewə ŋeli gwezlayɛ. Ama gheyɛ ka Filisti ne, katedene ŋayɛ ka ghema ta ŋayɛ le ma, katempə mbelia ŋayɛ nyi ketetene teghweme hɛ.

³¹Gheyɛ gelembe nyi mɛa meleme, ŋgaɗe mə ghə, gheyɛ meleme, tsa mə lewela. Nahe Filisti pɛtɛ keŋzla, kwa nza ŋkɛ tələ yatələ n'yi sawa laka bela kwa gwela, ama wəndə shɛ keshavenyɛ hwa wəvəsəa ka sewajɛ we.

³²Tsema tezhɛne nda mbeli ke ka ghwene ta ka Filisti tse wa? Wa nya tsetse: Mahwətə le ghəa ŋkɛ nde ŋslete Siyon, mbe tenza ka titikwəa kɛfi nyi hwa mbelia ŋkɛ gwezlayɛ.