Read kapsiki Ɛzayi 16 Bible Online

Ɛzayi 16 - kapsiki bible

Ɛzayi 16

¹Se mbe Sɛla nya mɛa ɓerama ne, ghwene nda mə game ke wəndə nya kesleke hɛɗi, meghea ka Zhəwda nya pelɛ ghweme ta Siyon.

²Kala 'yɛ nyi kezlə nyi ŋkamte hɛ mbeli te ghɛa nci ne, tsagha tenza mia ka Mowab te ŋkwa nyi nza mbeli kajivenji te hələa Arnon te.

³Ma ke hɛ sha 'yɛwe va Zhɛrəzalɛm: «Ncɛ n'yɛ ntsehwele, mene zəzə. Ma talala veci kwa ghə ne, ve shenaŋkwe ta ŋa kənəa ghen'yɛ kala viɗi, wəfərəakɛ mbeli nyi kewəfərənji, ncɛma mbeli nyi kehwɛnji na ma.

⁴Pelakɛ mbelia n'yɛ nyi kewəfərənji kanza te hɛɗia ŋa, nza kaŋkwa kewəfərə ta nci va nde mpə ŋkwa. Ma vəa ŋkwa nya tekiɗinyɛ yaka, nya tenahenyɛ mene berete, nya tezanyɛ sebe te nde ŋkeɗe ŋkwa te hɛɗi ne,

⁵Katenza pasla bereteke laka ganyɛa mehele kaŋa hwelefe ta David. Katenza nde meha ghwə nya kezele wəsə nya tiɗiɗi ba'a nza tiɗiɗi pelɛ.»

⁶Nahe ghen'yɛ kefate kele ghə ta Mowab, kele ghə ta ŋkɛ nya wəba, ŋkele ntsə ta ŋkɛ, gezleŋema ghə ta ŋkɛ ba'a fegea ŋkɛ nyi gəmə.

⁷Ama tsetsenya ne, ghə yaŋgaɗe ka Mowab yitea Mowab, pɛtɛ hɛ kaŋgaɗe ghə. Ŋələvə yaŋələvə hɛ yitea ghwempe ta rɛzɛŋe nyi keɓe mbeli mbe Kir-Hɛrɛs. Kwele kwele tazenji mehele ta nci.

⁸Kwa nza ŋkɛ hale yahale wəve nyi mbe Hɛshebon ba'a wəvea rɛzɛŋe nyi mbe Sibma. Nahe tɛa nci kese kaghwəyi ka sleke hwelefefi. Hwa'a mbe Yazɛr se bezlea nci ba'a nahe hɛ kese kapese te ɓerama. Pa pelɛ kema ta ndərə peslaghe geva dzeve ta nci.

⁹Vatse nehwene 'ya yitea rɛzɛŋe nyi mbe Sibma kala nya nehwene mbeli nyi Yazɛr yite. Katebete nehwene 'ya kənə gheyɛ, gheyɛ Hɛshebon le Ɛlalɛ. Kwa nza ŋkɛ ma te və nya nda yɛ rɛzɛŋe ba'a nya mene wəshi yɛ se te wəve ne, nahe yɛ gaghwe kekiɗinji.

¹⁰Nahe sebe kezanyɛ te zlama ba'a farefa yitea yɛ ntsa ta wəfe ta ŋayɛ. Ma dzeyi mbe yɛ wəvea rɛzɛŋea ŋayɛ ne, kazhɛne mbeli kafa yɛ gaghwe ba'a yɛ yɛyi we. Kazhɛne mbeli kahetəsə yɛ rɛzɛŋe kadzawa yɛ weta we, nahe yɛ yɛyi kekiɗinji.

¹¹Vatse nehwene hwəa ɗa kala gaka ta gagera yitea Mowab, zhɛ ɗa heli yitea Kir-Hɛrɛs.

¹²Katenewe ka Mowab mbeli kaleɓe ghə kadzeme yɛ kələŋə, kadzembe kasəkwə ghə pelɛ ŋkwa nya keveyi geva tekeleke, ama wəsə shɛ kakemave hɛ we.

¹³Nya ya kaghena nya gezete Mahwətə te ghəa Mowab vəashi.

¹⁴Ama tsetsenya ne, ma ke Mahwətə: «Mbe va mahekene kape kape, kala va nyi mene nde mene slene cɛdɛ ne, katekelemte geva zləvə te Mowab. Ya mbeli nyi mbe nza kwele kwele ne, deke mbeli ɓɛhwɛ ka tetene, mbeli nyi ɗema zləvə te hɛ.»