Read kapsiki Ɛzayi 17 Bible Online

Ɛzayi 17 - kapsiki bible

Ɛzayi 17

¹Ghena nya kegezete geva te ghəa Damas. Temə vireɗi ne, katezhɛne Damas kanza kameleme we, kakwəfi tenza ŋkɛ.

²Ma meleme nyi dzeyi yite ne, katewəfəyite geva hɛ kaghala ghala. Kateve nda geva hɛ ke wəshi keseɗa. Katenza hɛ dzeyi mbe hɛ, wəndə shɛ kateghakɛ hɛ we.

³Katezhɛne zli kanza yitea Ɛfrayim, ya meghe mbe Damas we. Ma ka Siri nyi ketetene ne, katenza zləvə te hɛ za ma ke ka Israyɛl we. Mahwətə nde berete nde gezete.

⁴Ma te vecia shɛ ne, katenza zləvə te ka Israyɛl we, katezhɛre kele ta nci kapahe.

⁵Katenza ŋkɛ kala wəsə nya te vəa mene wəshi te wəve, vəa ŋkwa nya tsehave ghəa ha ba'a nya tsenete ghwɛpɛ mbeli. Katenza ŋkɛ kala wəsə nya kwa zlərəa Refay, vəa ŋkwa nya tsamte ha mbeli te wəve.

⁶Deke ɓɛhwɛ tetene mbeli mbe Israyɛl kala bekele nya bekwemte ya mbeli sawa te le geta. Katetene ya bake keɗema mahekene pelɛ ghəa ŋkɛ, ya wəfaɗe keɗema mcɛfe dzeyi te yɛ dzeve ta ŋkɛ. Shala Mahwətə ta ka Israyɛl nde gezete.

⁷Ma te vecia shɛ ne, katenza ntsə ta wəndə ŋelɛ te nde pate ŋkɛ, kateve ntsə ŋkɛ te Shala nya keveyi geva tekeleke ta Israyɛl.

⁸Katezhɛne ŋkɛ kave ntsə te reghwetɛ nyi menete nyi ŋkɛ le dzeve ta ŋkɛ we, katezhɛne ŋkɛ kanewe selə nyi keveyi geva tekeleke, ya wəshi ketere 'wərdə nyi menete ŋwalea dzeve ta ŋkɛ we.

⁹Ma te vecia shɛ ne, katewəfəyite geva meleme nyi nza zli yitea hɛ mbe Israyɛl kala nya wəfəyite geva meleme ta ka Hava ba'a ŋa ka Amor vəashi kwa senji ka Israyɛl. Kaɓerama nya dɛrɛŋe rɛŋe tenza hɛ.

¹⁰Israyɛl, nahe na kezaghəyite Shala nya kembele ŋa, kese na kazəzə Keleɓa nya kaŋkwa kewəfərə ta ŋa we. Vatse nda pese wəfe nyi ganji ganji na ba'a nda tsawe felehwe ta wəshi nyi kese te kweci hɛɗi na.

¹¹Ma te veci nya mɓete hɛ na ne, kanewe newe na nda kele hɛ. Ma wəsə nya tsawete na masheke ne, katebete ghwə ŋkɛ te vecia shɛnyɛ. Ama rayɛ teza sebe te wəshi nyi te wəve vəa ŋkwa nya se ndiremi, ghwɛ shɛ yitea ndiremia shɛ we.

¹²Wa nya ndiremi gɛ! Mbeli kwele kwele ka gwəgwə. Kala gaka ta ndərə gaka hɛ. Kala gaka ghwa le berete gaka mbelia shɛhɛ.

¹³Kala wədzərə ta ghwa gaka mbelia shɛhɛ. Ɗa yaɗa hɛ Shala, hwɛ yahwɛ hɛ kalə cakeɗake. Nahe hɛ keŋkamte kala cɛkəvə va sefə nya kesawa hwa yɛ ghweme, kala ya ta tigə kwara va sefə nya wəba.

¹⁴Ma hetɛhwɛɗi ne, ghazlənə nde zhɛ ŋkwa, Ma nda tekiɗi ŋkwa ne, mba sebe te hɛ we. Nya ya kawəsə nya ketemene nda geva ke mbeli nyi kefə wəshia ɓəmə, kaɗa nya ketenza te mbeli nyi kezləgwə wəshi ɓəmə.