Read kapsiki Ɛzayi 19 Bible Online

Ɛzayi 19 - kapsiki bible

Ɛzayi 19

¹Ghena nya kegezete geva te ghəa Ɛzhipte. Wa nya Mahwətə nya te ləmbə nya kedzeghwa kahe kahe, gheŋkɛ kadzembe Ɛzhipte. Bare bare yabare bare wəshi nyi zhɛrete ka Ɛzhipte kashala mbe kema ta ŋkɛ ba'a sla yaslesla helia ka Ɛzhipte.

²Ma ke sha Mahwətə: «'Ya kateheheɗe ka Ɛzhipte kezha mpa yayata wəndə le menənyɛ, yayata wəndə le nde ghedəkwəa ŋkɛ, meleme le meleme, hɛɗi le hɛɗi.

³Katetaze mehele ta ka Ɛzhipte, kateza sebe 'ya te wəshi nyi zəzə hɛ. Katefa ghena hɛ va wəshi nyi zhɛrete hɛ kashala ba'a va ka gepe ŋkwa kwa weta, va ka beze ŋkwa ba'a va ka kelɛŋə.

⁴Kateve Ɛzhipte 'ya mbe dzeve ta ka sleke ŋkwa nyi 'yaghwa 'yaghwa mehele, meghe nya ndiremia mehele nde tenza te ghəa nci.» Nya ya kaghena nya geze Shala Mahwətə nde berete.

⁵Katehasenyɛ yɛmə nya kwa ndərə, katenza helaŋe helaŋe keghwele ghwele.

⁶Katezəŋwə yɛmə nyi dzeyi kwelɛ yɛ hələ, kateshifə ba'a katehase yɛ dzeve ta Nil, katetiwɛɗi yɛ mahawa ba'a yɛ ghwəvərə.

⁷Kateghwelenji gwəzə nyi dzeyi mɛa hələa Nil ba'a nyi dzeyi te ŋkwa nya jikə geva ŋkɛ le ndərə, pɛtɛa wəshi nyi kepese dzeyi mɛa Nil. Katefəhwe hɛ sefə, wəsə shɛ katetene we.

⁸Kateŋgaɗe ghə ka kese kelepe, katenehwene pɛtɛa mbeli nyi kebete dzara kadzawa Nil, katedene mbeli nyi kenegha zamba te yɛmə.

⁹Katezhɛ nda hawe ke ka leme pawa, kwetɛ kwetɛŋe tenza mehele ta mi nyi keleme pawa ba'a zhili nyi ketsa ŋkɛ.

¹⁰Kedene dene tenza geva ta ka tsa wəshi, kwetɛ kwetɛŋe tenza mehele ta ka mene slene te kwaba.

¹¹Kaka dewə mehele tenza mbeli nyi te ghə mbe Sowan, kaka gezhia kɛfi tenza ka ɗepemte wəshi nyi yitea Farawon. Ma ke sha tegeze nda ke Farawon: «Wəzege ta nde ɗepemte wəshi, hwelefe ta ka meghea kɛfi nyi vəashi.»

¹²Farawon, tema ka ɗepemte wəshia ŋa gɛ wa? Gezete ŋa ba'a ncɛte wəsə nya tarete Mahwətə nde berete kamene nda ke Ɛzhipte hɛ gi ga!

¹³Nahe mbeli nyi te ghə mbe Sowan kezhɛrenji kaka dewə mehele, nahe nyi mbe Mɛmfis keghwetete ghəa nci. Nahe mbeli nyi te ghəa hwelefefi keghweteyi Ɛzhipte kwa hweŋkwa nya ndiremi.

¹⁴Nahe Mahwətə ke'yiwəlemte mehele ta nci. Ɛzhipte yave hɛ kwa hweŋkwa nya ndiremi mbe yayata slene nya mene ŋkɛ. Yipə yipə Ɛzhipte le nde ghwəyi ghwəyi nya kedevələ geva dzate hwa vənəhwə ta ŋkɛ.

¹⁵Wəndə shɛ katezhɛne kamene wəsə mbe Ɛzhipte, ya ghə keɗema sheghe, ya yɛ dzeve ta peha keɗema yɛ ghwəvərə we.

¹⁶Ma te kwete hɛ ne, katenza ka Ɛzhipte kala mi. Katebare bare hɛ va ghazlənə vəa ŋkwa nya tekafe dzeve Mahwətə nde berete kezha ɗa hɛ.

¹⁷Kawəsə keghazlənə tenza hɛɗia Zhəwda sha ka Ɛzhipte. Ma te yayata və nya hekɛmete ŋkɛ mbeli kwa kema ta nci ne, katebare bare va wəsə nya tarete Mahwətə kamene nda ke hɛ.

¹⁸Ma te vecia shɛ ne, katenza meleme mcɛfe nyi tegeze ghena ta Ɛbrə mbeli mbe hɛ ba'a nyi tezeme fela mbeli nyi mbe hɛ kezha nza jikə le Mahwətə nde berete te hɛɗia Ɛzhipte. Ma kwete hwa melemea shɛhɛ ne, Meleme ta veci teheka ŋkɛ mbeli.

¹⁹Ma te vecia shɛ ne, katenza reghwetɛa Mahwətə te tepe ta hɛɗia Ɛzhipte ba'a gɛaŋa ta Mahwətə terasle yitea ghala ta ŋkɛ.

²⁰Katenza ŋkɛ kawəsə kencɛ wəsə ba'a kawəsə kenegha fete kaŋa Mahwətə nde berete te hɛɗia Ɛzhipte. Ma ketetsave nda lewela ka Ɛzhipte ke Mahwətə va mbeli nyi kesa nda yaka ke hɛ ne, kateghwene nda nde mbele ŋkwa nya keteya hɛ ba'a nya ketembele hɛ ŋkɛ ke hɛ.

²¹Tagha gɛ, katencɛ nda ghəa ŋkɛ Mahwətə ke ka Ɛzhipte, kateɗepete ŋkɛ ka Ɛzhipte te vecia shɛ. Katemene nda slene hɛ laka dzeghe nda melɛ ba'a fə nda wəshi. Katemene nda meɗe mɛ hɛ ke Mahwətə ba'a kateyipə hɛ hɛ kadzawa.

²²Ma vəa ŋkwa nya teɗate ka Ɛzhipte Mahwətə ne, katembe hɛ ŋkɛ. Katezhɛne geva hɛ kase sha Mahwətə nya ketefa səkwə ta nci ba'a nya ketembe hɛ.

²³Ma te vecia shɛ ne, kateslə hweŋkwa shave mbe Ɛzhipte hwa'a mbe Asiri. Katedzembe ka Ɛzhipte ka Asiri ba'a katedzembe Asiri ka Ɛzhipte. Katemene nda slene hɛ kanya kwetɛŋe ke Shala.

²⁴Ma te vecia shɛ ne, kakwa mahekene tenza Israyɛl kadzeyitea yɛ Ɛzhipte le Asiri. Nya ya kawəpi nya keteve nda geva ke hɛɗi lema.

²⁵Katewəpi hɛɗi lema Mahwətə nde berete, ma ke sha tegeze: «Kewəpi wəpi nza ka Ɛzhipte nyi kambelia ɗa, ka Asiri nyi pate 'ya le dzeve ta ɗa ba'a ka Israyɛl nyi kaŋa ɗa!»