Read kapsiki Ɛzayi 2 Bible Online

Ɛzayi 2 - kapsiki bible

Ɛzayi 2

¹Ghena nya kegezete nda geva ke Ɛzayi, wəzege ta Amots te yɛ hɛɗia Zhəwda le meleme ta Zhɛrəzalɛm.

²Ma mbe və nya ketese ne, katenza ghweme ta ghɛa Mahwətə biya ma ke kweci ghweme ba'a katenza ŋkɛ dzəgwəɗəmə ma ke kweci wəmbə. Tagha gɛ, katese pɛtɛa hwelefefi kadzehwe.

³Katese mbeli kwele kwele kadzembe. Ma ke hɛ sha tegeze: «Nde mə, dzeme ɓəmə ghweme ta Mahwətə, ghɛa Shala ta Zhakob. Kateteke ɓəmə wəshi nyi ɗe ŋkɛ va gheɓəmə ŋkɛ, katedzeghwa gheɓəmə kwa hweŋkwa ta ŋkɛ.» Kwa nza ŋkɛ ne, mbe Siyon shave wəsə mahalegə ba'a mbe Zhɛrəzalɛm shave ghena ta Mahwətə.

⁴Katenza ŋkɛ kande meha ghwə kwelɛ hwelefefi, kande sla fete kwelɛ mbeli kwele kwele. Kategezla yɛ sakwə hɛ yitea yɛ kafayɛa nci ba'a kategezla yɛ hwətə hɛ yitea yɛ megha ta nci. Katezhɛne kwete hwelefe kakafe kafayɛ yitea kwete we, katezhɛne mbeli kateke ntsehwelea mpa we.

⁵Gheyɛ hwelefefia Zhakob, nde mə, dzeghwa ɓəmə yitea waŋe ta Mahwətə.

⁶Shala, nahe na kewəfəyite mbelia ŋa, hwelefefia Zhakob. Vatse nza ka ŋa zlera nyi keshave laka ŋkwa kesame ta veci viɗi te hɛɗia nci, kwele kwele ka newe nza ta wəshi nyi te ghweme te kala nya nza hɛ hwa ka Filisti, kwele kwele mene zhɛre dzeve le ka se se.

⁷Viɗi hɛɗia nci va mze kwa tɛawetɛa ba'a mze kwa tere tere, kaɓelate wəshia nci nyi nza zləvə te mbeli we. Viɗi hɛɗia nci va gədəwəa lɛmə, kwele kwele yɛ wəmata kempa ta nci.

⁸Viɗi hɛɗia nci va wəshi nyi zhɛrete mbeli kashala, kagwəɗəŋə hɛ mbe kema ta wəshi nyi menete dzeve ta nci, mbe kema ta wəshi nyi hite dzeve ta nci.

⁹Vatse tegwəɗəŋənji ba'a teshifənji mbeli pɛtɛ. Kesema hɛ na sate te ŋkwa ma.

¹⁰Wəfərə ŋayɛ mə hwa yɛ gela, dzembe ŋayɛ mə mbe hɛɗi kezha wəfərə va ghazlənə va Mahwətə ba'a va ɓele ta zləvəa ŋkɛ.

¹¹Katekweshame geva ntsə ta mbeli nyi kenewe ŋkwa le ŋkele ntsə, kategwəɗəŋə ka kele ghə. Ma te vecia shɛ ne, deke Mahwətə nde tenza kawəndə kwele.

¹²Kwa nza ŋkɛ ne, nahe Mahwətə nde berete kenteyi hɛ kezha meha ghwə te yayata wəsə nya keŋkele ntsə ba'a nya kekele ghə, te wəsə nya kezhɛre ghəa ŋkɛ wəbake kezha shifə ŋkɛ.

¹³Te pɛtɛa cɛana nyi bebiya bebiya mbe Liban, te pɛtɛa balepale nyi mbe Bashan,

¹⁴te pɛtɛa ghweme nyi bebiya bebiya, te pɛtɛa wəmbə nyi dzəgwəɗəmə dzəgwəɗəmə,

¹⁵te pɛtɛa ŋkwa keya ŋkwa nyi bebiya bebiya, te pɛtɛa zli nyi berete berete,

¹⁶te pɛtɛa kwambelə nyi mbe Tarsis ba'a te pɛtɛa kwambelə nyi ganji ganji.

¹⁷Kategwəɗəŋə mbeli nyi kekele ghə, kateshifə geva mbeli nyi keŋkele ntsə. Ma te vecia shɛ ne, deke Mahwətə nde tenza kawəndə kwele.

¹⁸Rayɛ teza sebe te wəshi nyi zhɛrete mbeli kashala.

¹⁹Katedzembe yɛ zlera mbeli ba'a katedzawa ghɛ nyi mbe hɛɗi mbeli kezha wəfərə va ghazlənə va Mahwətə ba'a va ɓele ta zləvəa ŋkɛ, vəa ŋkwa nya tesate ŋkɛ te ŋkwa kezha dake hɛɗi.

²⁰Ma te vecia shɛ ne, katebete nda wəshi nyi le mze kwa tɛawetɛa ba'a nyi le mze kwa tere tere nyi zhɛrete hɛ kashala, nyi menete hɛ kezha gwəɗəŋə kwa kema ta nci mbeli ke yɛ kwə ba'a ke yɛ mezlekwe zlekwe.

²¹Katedzawa yɛ zlera ba'a ghɛ nyi mbe hɛɗi hɛ, kezha wəfərə va ghazlənə va Mahwətə ba'a va ɓele ta zləvəa ŋkɛ, vəa ŋkwa nya tesate ŋkɛ te ŋkwa kezha dake hɛɗi.

²²Vema ghə yɛ te wəndə ŋelɛ nya nza mpia ŋkɛ kala sefə nya keseyi mbe ŋshi ma. Wa zləvə nya te tse wa?