Read kapsiki Ɛzayi 22 Bible Online

Ɛzayi 22 - kapsiki bible

Ɛzayi 22

¹Ghena te ghəa zlərə nya newe wəshi mbeli kwa. Ka Zhɛrəzalɛm, va wa dzeme ŋayɛ yɛ pɛtɛ pelɛ dɛɓere nyi kənəa yɛ cɛ wa?

²Zhɛrəzalɛm, va wa nza na kameleme nya kegaka, nya kegaŋkəɗə ba'a nya nza gəsəkə mbe wa? Kempə mbelia ŋa nyi kempənji va kafayɛ we, kempənji hɛ kwamte mpa we.

³Nahe mbeli nyi te ghəa ka sewajɛa ŋa kehwɛnji, nahe ka he have kekekeseve hɛ kaka mavashi. Pɛtɛa mbeli nyi kesləyi geva kekesehwe geva kaka mavashi, ya mbeli nyi kehwɛnji cakeɗake.

⁴Tsetsenya gɛ ne, ma 'ya sha gheyɛ: «Pelema ntsə yɛ yitea 'ya ma, pelakɛ ɗa mə kanehwene sərəɓə sərəɓə. Nahe hwelefe ta ɗa kezamte geva, ama dzeghema yɛ kagweɗakwe ɗa ma.

⁵Kwa nza ŋkɛ ma ɓeshi ne, nahe Shala Mahwətə nde berete keghweneke ɓəmə taze ta mehele, teɗe ba'a ghazlənə.» Ma kwa zlərə nya newe wəshi mbeli ne, ŋzla yaŋzla zli nya wəba, tsa yatsa yɛ lewela dzeme laka yɛ ghweme.

⁶Fə yafə yɛ gwecɛ ka Ɛlam. Mbeli ya shɛ dzeyi kwa yɛ wəmata kempa, ka zleɗe gədəwəa lɛmə ya shɛ. Geləa nci yahi ka sewajɛa ka Kir.

⁷Zhɛrəzalɛm, viɗi zlərə nyi ganji ganji ma hwa yɛ zlərəa ŋa va wəmata kempa. Geva yahi ka zleɗe gədəwəa lɛmə mɛa degha ta ŋa.

⁸Mba gelə kənəa Zhəwda we Ma vəa ŋkwa shɛ ne, nahe yɛ kevate ntsə te wəshi kempa nyi tewəfərə mbe cɛ nya mbe Ghɛa wəfe.

⁹Nahe yɛ kenakɛ pɛtɛa ŋzla nyi te zli nya yitea meleme ta David, nahe yɛ ketseneyi yɛmə kwa ghwa nya kwayite.

¹⁰Nahe yɛ keɓelate ghɛ nyi mbe Zhɛrəzalɛm, nahe yɛ kempəmte kweci ghɛ kezha ve nda berete ke zli.

¹¹Nahe yɛ kehite ŋkwa ketsene yɛmə kwelɛ zli nyi bake kezha yɛmə nya kwa ŋkwa ketsene nya vəashi. Ama kese yɛ kave ntsə te nde mene wəshia shɛhɛ we. Hi yahi hɛ ŋkɛ se vəashi, ama kenakɛ ŋkɛ yɛ we.

¹²Ma te vecia shɛ ne, nahe Shala Mahwətə nde berete kese kageze ŋayɛ kanehwene ba'a kaŋgaɗe ghə, kaŋsə ghə ba'a kahwepe zewe hwa hwə.

¹³Ama zlama ba'a farefa ŋkɛ: kahene yɛ sla mbeli, kasla ghə mbeli te timɛti, kazeme sli mbeli, kasa tɛ mbeli. Ma pe yɛ gezete: «Zeme ɓəmə wəshi kezeme ba'a sa ɓəmə wəshi kesa, kwa nza ŋkɛ katempə gheɓəmə hendɛ.»

¹⁴Ma ke Mahwətə nde berete gezete ɗa ghena nya: «Katekelemte geva jaɗafa ta ŋayɛ nya te wənə pa te mte ta ŋayɛ we.» Nya ya kaghena nya geze Mahwətə nde berete.

¹⁵Ma ke Shala Mahwətə nde berete sha 'ya: «Kwiɗi sha Shebna, wəndə kwele ba'a wəndə nya te ghəa wəshi ki ghɛa meghe. Ma pa na shɛ:

¹⁶Wa wəsəa ŋa nya teke wa? Wa menə ŋa nya teke kezha la ŋa kwele teke, kezha la ŋa kwele nya lɛame ba'a kezha la ŋkwa kenza mbe keleɓa wa?

¹⁷Yawa, kateneghamte ŋa Mahwətə, katevehe ŋa ŋkɛ ya gha nza kabereŋwe,

¹⁸katenzere ŋa ŋkɛ kala kweɗembezlɛ kalə kadzete hɛɗi nya bezle. Te hɛɗia shɛ temte na, zlaɓe le wəmata kempa ta ŋa nyi ganji ganji, gha nya keve hawe te ghɛa nde sleke ŋa!

¹⁹Ma ke Shala: Katekeka ŋa 'ya seyi te ŋkwa ŋa, katekele ŋa 'ya seyi te slene ta ŋa.

²⁰Ma te vecia shɛ ne, kateheka nde mene slene ta ɗa Ɛliyakim, wəzege ta Hilkiya 'ya.

²¹Kateseɗe nda lekwesa slene ta ŋa 'ya, katehwepe nda hətə 'ya yitea yitə, katedape nda berete ta ŋa 'ya. Gheŋkɛ nde tenza kayitenyɛa ka Zhɛrəzalɛm ba'a kaŋa hɛɗia Zhəwda.

²²Kateve nda wəsə keŋzle ghɛa David 'ya. Ma vəa ŋkwa nya teghwenemte ŋkɛ ne, wəndə shɛ kateŋzlete we. Ma vəa ŋkwa teŋzlete ŋkɛ ne, wəndə shɛ kateghwenemte we.

²³Katebaŋe ŋkɛ 'ya kala sheghwə nya gəzə gəzə te ŋkwa nya ntɛaŋentɛa. Katenza ŋkɛ kawəsə keve nda zləvə ke ghɛa yitenyɛ.»

²⁴Ama pɛtɛa mbeli nyi ki ghɛa yitenyɛ nyi cakeɗa cakeɗa ba'a nyi dekwe dekwe katedɛŋe geva te kala yɛ kwanja, se te mama ta yɛ helape hwa'a te mama ta yɛ ghwelepe. Wa nya ɗaŋeɗa ta wəshi te gɛ!

²⁵Ma ke Mahwətə nde berete: «Ma te kwete hɛ ne, kateɓele sheghwə nya gəzə gəzəa shɛ. Ndagwara te ŋkwa nya ntɛaŋentɛa baŋeyi geva ŋkɛ. Kateɓele ŋkɛ ba'a kateteɗe ŋkɛ. Tagha gɛ, katempə wəshi nyi ɗaŋeɗa ɗaŋeɗa nyi te. Nya ya kaghena nya geze Mahwətə.