Read kapsiki Ɛzayi 24 Bible Online

Ɛzayi 24 - kapsiki bible

Ɛzayi 24

¹Kateve beze Mahwətə te hɛɗi lema, kateve beze ŋkɛ te. Katezhɛremte hɛɗi lema ŋkɛ, katetazemte mbeli nyi te ŋkɛ.

²Wəsə nya kwetɛŋe nde temene nda geva ke yɛ nde dzeghe Shala le wəndə nya gəmə, ke yɛ nde sleke ŋkwa le nde mene slene ta ŋkɛ, ke yɛ meghekɛa ghɛ le kwatera ta nta, ke yɛ nde pamte wəsə le wəndə nya kepa, ke yɛ nde nzəɓə nda wəsə ke mbeli le nde nzəɓə ke yɛ nde mcɛlə le nde titikwə.

³Pɛtɛ tebeze hɛɗi, pɛtɛ tefəhwe geva wəshi nyi te, kala nya tarete Mahwətə.

⁴Nehwene ya te hɛɗi lema, ŋzla yaŋzla ŋkɛ. Beze ya te hɛɗi lema, ŋzla yaŋzla ŋkɛ. Nahe ghweme kebezenyɛ kanya kwetɛŋe le hɛɗi perə.

⁵Nahe hɛɗi kezhɛrenyɛ wale wale mbe seɗa ta mbeli nyi te, va nya dzawanji hɛ kənəa wəshi mahalegə, nahe hɛ zhɛrave nda wəmbə ke wəshi nyi kehi, nahe hɛ kenehemte jikə geva nya kaghala ghala.

⁶Vatse terenyɛ hɛɗi va bezla ta Shala, yaka ta fete ta nci ya kwa ghəa mbeli nyi te. Vatse teremte geva mbeli nyi te hɛɗi, deke ɓɛhwɛ tene hɛ te.

⁷Nehwene ya te tɛ mɛnɛfɛ, dene yadene rɛzɛŋe, ŋələvə yaŋələvə pɛtɛa mbeli nyi kese fare fare.

⁸Nahe zlama nya yitea yɛ dimə kekiɗi, nahe zlewezla nya hwa yɛ gəsəkə keza, nahe farefa nya yitea gagera keghereŋe.

⁹Mba mbeli kasa tɛ yitea yɛ cimə we. Ma wəshi kesa nyi kemesle mesle ne, ndɛalɛake tenza hɛ sha ka sa wəshi.

¹⁰Nahe meleme nya shaka shaka keŋzlanyɛ, pɛtɛ yɛ ghɛ keŋzle ŋzle, kashɛma mbeli dzeki hɛ.

¹¹Lewela yatsa mbeli dzeyi kwa yɛ hweŋkwa yitea tɛ, rayɛ sebe kezanyɛ te zlama, nahe farefa keŋkamte geva te hɛɗi.

¹²Deke ŋkwa nyi keŋzla ŋzla ka tene mbe meleme, keŋzla ŋzla ŋkwa kedzeki, kakwəfi tene ŋkɛ.

¹³Ma te hɛɗi lema, hwa mbeli ne, katenza ŋkwa kala bekele nya mpamte ya mbeli te, kala rɛzɛŋe nya ndamte ya mbeli te, vəa ŋkwa nya kiɗinyɛ nda ta rɛzɛŋe.

¹⁴Kategha cimə mbeli nyi mba teghweme, katetsahe zləvəa Mahwətə hɛ. Ma ke hɛ sha tetsa gaghwe shave pelɛ hɛɗi nyi laka ŋkwa kepəkwə ta veci:

¹⁵«Pelɛ hɛɗi nyi laka ŋkwa kesame ta veci ne, ve mə zləvə te Mahwətə. Dzeyi te hɛɗi nyi te ndərə ne, tsahe sləa Shala Mahwətə ta Israyɛl.»

¹⁶Se te mendɛkwe ta hɛɗi ne, ma ke cimə fate ghen'yɛ: «Zləvə ya te wəndə nya tiɗiɗi!» Ama 'ya ne, ma 'ya sha ghəa ɗa: «Nahe ŋa ɗa, nahe ŋa ɗa, wa nya ɗa te 'ya gɛ!» Nahe ka pamte ŋkwa kepamte ŋkwa. Nda ŋkwa yapamte ka pamte ŋkwa.

¹⁷Ma ghazlənə, ki nya lɛame ba'a keleŋa ne, kaŋa ŋayɛ hɛ pɛtɛ, gheyɛ mbeli nyi te hɛɗi.

¹⁸Ma wəndə nya ketehwɛ va lewela ghazlənə ne, kateteɗe ŋkɛ kwa ki nya lɛame. Ma kesame ŋkɛ kwa ki ne, katekese ŋkɛ keleŋa. Nahe wəfela nyi pelɛ ghweme keghwenemte geva, nahe yɛ shihəa hɛɗi kegaŋkəɗəte geva.

¹⁹Kapeperawe hɛɗi, kawətəhə ŋkɛ, kagaŋkəɗə ŋkɛ.

²⁰Kala nde ghwəyi ghwəyi ne, katetsepe tsepe geva hɛɗi, katevereŋwə geva ŋkɛ kala ghwəli va sefə. Kateteɗe ŋkɛ va ɗaŋeɗa ta fete ta ŋkɛ. Katesate ŋkɛ te ŋkwa we.

²¹Ma te vecia shɛ ne, kateme Mahwətə pelɛ ghweme te wəvəsəa yɛ saseregwa ba'a kwake te hɛɗi te ka meghea kɛfi nyi te hɛɗi lema.

²²Pɛtɛ tenza hɛ ketsene tsene kala ka daŋgayɛ kwa ki nya wəba. Katenza hɛ keŋzle ŋzle mbe daŋgayɛ. Ma kwa sebe ta və kwele kwele ne, kategeze wəshi nyi menete hɛ hɛ te ghwə.

²³Gheme tenza tere va hawe, ngərə ngərə tenza veci va hawe. Kwa nza ŋkɛ ne, Mahwətə nde berete nde tenza kameghe mbe Zhɛrəzalɛm, pelɛ ghweme ta Siyon. Kateɓele zləvəa ŋkɛ kwa kema ta mbelia jama nyi mbe meleme.