Read kapsiki Ɛzayi 27 Bible Online

Ɛzayi 27 - kapsiki bible

Ɛzayi 27

¹Ma te vecia shɛ ne, katekele kafayɛa ŋkɛ nya wəba, nya ntɛaŋe ntɛaŋe ba'a nya berete Mahwətə yitea shishi meŋele nya kashishi[1] nya kehwɛ ba'a nya ɗema mbeli kakeseve. Katepesle shishi meŋele nya kwa ndərə ŋkɛ.

²Ma te vecia shɛ ne, gha mə cimə yitea wəvea rɛzɛŋe nya nza tɛa ŋkɛ zeɗekə.

³'Ya Mahwətə ya kande ya wəvea rɛzɛŋea shɛ, te və nya kehi gə nda yɛmə 'ya. Veci le viɗi ya ŋkɛ 'ya kezha ɗema mbeli kabezemte.

⁴Mba wənəa ɗa kehwepe hwepe ve we. Ama ketenakɛ yɛ tigə ba'a yɛ tigə kwara 'ya ne, kateme 'ya kənəa hɛ ba'a kateteremte hɛ 'ya.

⁵Ama kewəfərənyɛ wəndə kwa ghwədərəa ɗa ne, katenza ŋkɛ kwelɛŋe le 'ya, kaganda ne, katenza ŋkɛ kwelɛŋe le 'ya.

⁶Ma mbe və nyi ketese ne, kateha yɛ slərə mbelia Zhakob, Kateɗəkwə ba'a katebete ghwə Israyɛl, kateviɗi hɛɗi lema ŋkɛ le yɛ ya ta ŋkɛ.

⁷Nahe Mahwətə keɗate mbelia ŋkɛ kala nya ɗate mbeli nyi kese kaɗa hɛ ŋkɛ na? Nahe ŋkɛ kempəmte hɛ kala nya mpəmte mbeli nyi kese kampə hɛ ŋkɛ na?

⁸Ewə, ama nahe ŋkɛ kemehate ghwə te hɛ laka ŋkamte hɛ, laka fəghe hɛ kadzete kwete hɛɗi. Nahe ŋkɛ ketsalemte le sefəa ŋkɛ nya berete, te vecia sefə nya kesame kwa zeweve ta ghweme.

⁹Wa tsetse tesehwemte geva fete ta Zhakob, wa nya wəsə temene kele ta jaɗafa ta ŋkɛ te wənə nya: katehə pɛtɛa pelɛa yɛ reghwetɛ mbeli kezha nza hɛ kala teɓehwe. Katezhɛne seləa nyi keveyi geva tekeleke ba'a wəshi ketere 'wərdə kanza meghereŋe we.

¹⁰Katezhɛne mbeli kanza mbe meleme nya berete we, shaka shaka ba'a kewəfə wəfə tenza ŋkɛ kala ɓerama. Katezeme gwəzə levea lɛmə te, katetsa beke hɛ te ba'a kateɓeɓatse slekea yɛ wəfe hɛ te.

¹¹Ma vəa ŋkwa nya teghwelenji yɛ dzeve ta wəfe ne, kateɓelenji hɛ. Katese mi kandə ghwə yitea hɛ. Kaganda ne, ghə va mbelia shɛhɛ we: vatse ɗema Nde pate hɛ kazhɛ heli yitea hɛ, Nde menete hɛ kakemane hɛ.

¹²Ma te vecia shɛ ne, kateleke ha ta ŋkɛ Mahwətə, se mɛa Efrate hwa'a mɛa hələa Ɛzhipte. Ma gheyɛ ka Israyɛl ne, katevɛane ŋayɛ ŋkɛ kwete kwete kala ghəa ha.

¹³Ma te vecia shɛ ne, katevɛ geva vəaŋə. Tagha gɛ, kateshave mbeli nyi kezanji pelɛ Asiri ba'a mbeli nyi keŋkaghe geva kadzawa Ɛzhipte. Katese hɛ kagwəɗəŋə mbe kema ta Mahwətə pelɛ ghweme nya keveyi geva tekeleke mbe Zhɛrəzalɛm.