Read kapsiki Ɛzayi 28 Bible Online

Ɛzayi 28 - kapsiki bible

Ɛzayi 28

¹Wa nya ndiremi te Samari gɛ! Ma ka sa wəshi kesa nyi mbe Ɛfrayim ne, fare fare hɛ yitea meleme nya kala derə meghe nya. Ma pelɛ wəmbə nya kənəa zlərə ganyɛ ne, nahe nde kepesakɛ geva megela. Ama kala ghwə ta wəfe nyi ketiwɛɗinji kwa ghəa mbeli nyi keghwəyi ghwəyi va tɛ nde.

²Se yase wəndə nya berete ba'a kehwepe ghə nya ghweneke Mahwətə. Yipə yipə nde le va nya nza kwacakelɛ hwe, le sefə nya wəba nya kebeze wəshi ba'a le va nya keshekeyi geva paca paca te hɛɗi. Le berete wele wəshi wəndəa shɛ te hɛɗi.

³Kateŋkeɗe geva derə meghe, meleme nya nza nya ka ghwəyi ghwəyi nyi mbe Ɛfrayim fare fare yite mbe seɗa.

⁴Kateŋkeɗemte geva ghwə ta wəfe nyi ketiwɛɗi tiwɛɗi, nyi kepesa ŋkɛ nyi megela mbe seɗa pelɛ wəmbə nya kənəa zlərə ganyɛ. Yipə yipə tenza Samari dasekwa nyi kenehenji kabereɗe. Nakɛma ta mbeli ke hɛ ne, nda yanda hɛ kezha zeme hɛ taghanyɛ.

⁵Ma te vecia shɛ ne, katenza Mahwətə nde berete derə meghe ganyɛ, kagetse ganyɛ ba'a kawəsə kepesa geva ta mbelia ŋkɛ nyi ketene teghweme.

⁶Gheŋkɛ nde teve nda sefəa nza tiɗiɗi ke mbeli nyi kemeha ghwə. Kateve berete ŋkɛ ke mbeli nyi kezhɛne ka ghema dzeyi te sebe mɛa ŋkwa kedzeki meleme.

⁷Pa le ka dzeghe Shala ba'a ka mɛ ŋkwa keza za va tɛ, tsepe tsepe yatsepe tsepe hɛ va wəshi kesa nyi ghyana ghyana. Keza za hɛ va wəshi kesa, keghwəyi ghwəyi hɛ va tɛ, tsepe tsepe yatsepe tsepe hɛ va wəshi kesa nyi ghyana ghyana. Za yaza nda za ghena ke hɛ va tɛ, teɗe yateɗe hɛ mbe meha ghwə ta nci.

⁸Rayɛ rayɛ ŋkwa kezeme wəsə kezeme ta nci va vənəhwə ta nci, ŋkwa shɛ ɗema reɗa te we.

⁹Ma ke hɛ sha geze: «Ke wa ɗe Ɛzayi kateke nda wəshi tse wa? Ke wa ɗe ŋkɛ kancɛ nda zeweve ta ghena wa? Ke ŋwalea fəshi nyi kwatefɛa yitea ŋ'wa na? Ke velɛnjɛ nyi kwatesawa te ŋ'wa na?

¹⁰Fama mə ghena nya geze ŋkɛ: ‹Kaya kaya kaya, wanya wanya wanya, waca waca waca, yawa yawa yawa.›»

¹¹Yawa, ma tsetsenya gɛ ne, Mahwətə kategeze nda ghena ke mbeli nyi le ghena ta kwete hwelefe, le ghena nyi teɗema hɛ kafave.

¹²Ndagwara ma ke gezete nda ke hɛ: «Wa nya zhɛne mpi nya, sərəakɛ mə wəndə nya leɓakwe kazhɛne mpi. Wa nya gweɗakwe nya.» Ama kese hɛ kaɗe kafa we.

¹³Vatse gɛ, tsetse tenza ghena ta Mahwətə kaŋa nci: «Kaya kaya kaya, wanya wanya wanya, waca waca waca, yawa yawa yawa.» Tagha gɛ, kateteɗe hɛ te kwa gɛŋkilə vəa ŋkwa nya dzeghwa hɛ, kateɓeɓele dəŋə te hɛ. Katekese hɛ keleŋa ba'a katekesehwe hɛ mbeli.

¹⁴Gheyɛ ka ŋ'wəshi ŋkwa nyi kesleke ka Zhɛrəzalɛm, fa mə ghena nya geze Mahwətə:

¹⁵Ma pe yɛ sha geze: «Nahe ghen'yɛ kemenete jikə geva le mte ba'a ketsahwe ghena le ghɛa mbelia kwahɛɗi. Ma vəa ŋkwa nya tese ndiremi nya wəba ne, katekwaɗe n'yɛ ŋkɛ we, kwa nza ŋkɛ nahe n'yɛ keveyi tseŋwə kaŋkwa kewəfərə ba'a mbəɗəkwə kaŋkwa kentikə.»

¹⁶Vatse gɛ, wa nya ghena nya geze Shala Mahwətə nya: «'Ya kave pelɛa shihə nya ntɛaŋentɛa mbe Siyon, pelɛa megwekwe nya nza zləvə te, pelɛ nya kemɓeyi geva megela. Kateteɗe wəndə nya kedɛŋe geva te we.

¹⁷Wəsə nya tiɗiɗi nde tenza kazewe kedzeghe wəsə ta ɗa, nza tiɗiɗi nde tenza wəsə kedzeghe tiɗiɗia ŋkwa dzemedze.» Ama katebeze ŋkwa kewəfərə ta tseŋwə kwacakelɛ, katekelehwe ŋkwa kentikə ta ŋayɛ ghwa.

¹⁸Katenehemte geva jikə geva nya menete yɛ le mte, katedzehwe ghena nya tsahwe yɛ le ghɛa mbelia kwahɛɗi we. Ma vəa ŋkwa nya tese ndiremi nya wəba ne, katempə ŋayɛ ŋkɛ kadzete hɛɗi.

¹⁹Ma te yayata və nya tese ŋkɛ ne, katekese ŋayɛ ŋkɛ. Kwa nza ŋkɛ ne, katese ŋkɛ masheke, heveci ba'a heviɗi. Ma vəa ŋkwa nya tefa ghena ta ŋkɛ mbeli ne, mtiwə tenza mbeli va ghazlənə.

²⁰Kwa nza ŋkɛ ma ke kwete ghena ŋela: kebaslɛ tenza gezle kezha ɓelahe te, keslɛahe tenza gwada kezha dəpə kənəa geva.

²¹Kaganda ne, katesate Mahwətə te ŋkwa kala nya pelɛ ghweme ta Perasim. Katebare bare ŋkɛ va wənə kala nya kwa zlərəa Gabawon, kezha mene slene ta ŋkɛ, slene meŋele ta ŋkɛ, kezha yipə slene ta ŋkɛ kadzawa, slene nya kesenevema geva.

²²Ma tsetsenya ne, zhɛnema yɛ kaŋ'wəshi ŋkwa ma. Ma keɗema ŋkɛ tsagha ne, katembake ntsə geva zewe lɛ nyi yitea welɛa ŋayɛ. Kwa nza ŋkɛ nahe 'ya kefate va Shala Mahwətə nde berete tsema tsema tarete ŋkɛ kaza sebe te hɛɗi lema.

²³Ghwene mə sleme, fa ɗa mə ŋa ɗa! Kese mə mehele, fa mə ghena ta ɗa!

²⁴Ma nde wəza nya keɗe katsawe wəshi ne, kaza vəa ŋkɛ ŋkɛ kezha bəzli, kezha pa yɛ taŋa ba'a kezha pehwe bəzli na?

²⁵Ama kwa sebe ta nya pehwemte ŋkɛ ne, kaŋkisə felehwe ta mbereshi ba'a deweze ŋkɛ. Zhɛne ne, katsawe ha, mɛheɓi ba'a megi ŋkɛ. Kakwa keɗaŋe, katsawe kəsəŋə ŋkɛ dzeyi mɛa wəve.

²⁶Shala ta ŋkɛ nde tekete nda wəsə nya hi ŋkɛ kamene, nahe ŋkɛ ketekete nda ŋkɛ.

²⁷Kadzaŋele mbereshi mbeli le lɛ kwa njaŋa ŋa kedzaŋele ha we. Kadzeyi seɗa ta wəmata keleke ha hwa deweze we. Ama geta yabekwe yɛ mbereshi le deweze mbeli le.

²⁸Ma vəa ŋkwa nya leke ha nde wəza ne, kajive kajive leke ŋkɛ we. Yɛ seɗa ta wəmata ba'a wəshi keseɗa yapele ŋkɛ dzate hwe, ama kampəmte ha hɛ we.

²⁹Ma ntsehwele nya kala nya ne, va Mahwətə nde berete se ŋkɛ perə. Nde ncɛ ntsehwele ganyɛ ŋkɛ, wəbake ɗepe mene wəshi ta ŋkɛ.