Read kapsiki Ɛzayi 29 Bible Online

Ɛzayi 29 - kapsiki bible

Ɛzayi 29

¹Ɗa ya te Ariyɛl, te Ariyɛl, meleme ta Zhɛrəzalɛm nya se David mbe! Wərə na kamene yɛ gəsəkəa ŋa keva keva,

²ama katesa ŋa yaka 'ya Ariyɛl. Kateŋgaɗe ghə na ba'a kateŋələvə na, ama katenza sha 'ya kala reghwetɛ nya tere wəshi keseɗa mbeli te.

³Kala David ne, katemene ghedəkwəa ɗa 'ya dzeyi yitea gha, kateŋa zli 'ya dzeyi yitea gha, katepa yɛ wəmata kempa 'ya yitea gha.

⁴Kateŋzla na kadzete hɛɗi, katefa ŋwələa ŋa mbeli same hɛɗi, katesame ghena ta ŋa kwa hɛɗi kala ŋa wəndə nya kesamenyɛ kwa kwele. Kategeze ghena na same kwa hɛɗi kala kwahyɛ.

⁵Kala tələ ta keləwə tenza wəvəsəa ka jaga ta ŋa, kala mezaɗe nyi fə sefə tenza wəvəsəa ka ghwərə ghwərəa ntsə. Ma taghanyɛ ne,

⁶Katembele ŋa Mahwətə nde berete mbe berazlɛ ta va, mbe gaka nya ghazlənə mbeli ve, mbe yɛ va nya wəba le sefə nya wəba ba'a mbe tse ta ghwə nya wəba.

⁷Kala wəsə nya te shiwə ba'a kala wəsə nya nakɛ wəndə heviɗi tenza wəvəsəa mbeli nyi kempa le gha, Ariyɛl, pɛtɛa mbeli nyi keha ŋa mpa, gha ba'a zli nya yitea gha ba'a keteɗe kaza sebe te gha.

⁸Katenza ŋkɛ kala wəndə nya shewə va ma nya keshiwə le zeme wəsə kezeme, ama feɗeghema ta ŋkɛ ne, mba hwəa ŋkɛ slɛape slɛape. Keɗema ne, kala wəndə nya shewə va ndere nya keshiwə le sa yɛmə, ama feɗeghema ta ŋkɛ ne kedene dene ŋkɛ ba'a hase hase ŋwələa ŋkɛ. Tsagha tenza wəvəsəa mbeli nyi kese kampa le ghweme ta Siyon.

⁹Nza mə heheɓake ba'a tikə tikə, Zhɛre mə kaka ghwələa kɛfi ba'a nza mə kaka nakɛma ŋkwa. Nza mə keghwəyi ghwəyi, ama kaɗema va tɛ, tsepe tsepe mə, ama kaɗema va ghwəyi ta wəshi kesa sa.

¹⁰Kwa nza ŋkɛ ne, nahe Mahwətə keveyite mehele ta ŋayɛ yitea hɛ nya wəba, nahe ŋkɛ keŋzlemte ntsə te ka mɛ ŋkwa ta ŋayɛ, nahe ŋkɛ kedəpəmte kema ta ka kelɛŋəa ŋayɛ.

¹¹Ma wəshi nyi kencɛte geva nyi ne, kala ghena nyi te palepa nya kendɛaŋe ndɛaŋe nya ve nda mbeli ke wəndə nya keɗepe jaŋga. Ma ke mbeli shɛ: «Jaŋgate palepa nya.» Ama ma ke zhɛnete: «Kajaŋgate 'ya, va nya nza palepa shɛ kendɛaŋe ndɛaŋe we.»

¹²Tagha gɛ, pa mbeli ndeke nda ke wəndə nya keɗepema jaŋga, ma ke mbeli shɛ: «Jaŋgate palepa nya.» Ama ma ke zhɛnete: «Keɗepe jaŋga 'ya we.»

¹³Ma ke Mahwətə gezete: «Deke le mɛ hende ɗa geva mbeli nyi, deke bəzhia mɛa nci ka tsahe ɗa. Ama cakeɗake wənəa nci le 'ya. Ma hawe nya hawe hɛ va 'ya ne, deke ghena nyi tekave nda mbeli ke hɛ.

¹⁴Vatse gɛ ne, 'ya katemtsehe mene wəshi meŋele kwa kema ta mbeli nyi. Bətə tenza ntsehwelea ka ntsehwele ntsehwele, kateghərəmte geva ɗepe wəsə ta ka ɗepemte wəshi.»

¹⁵Ndiremi ya te mbeli nyi kemene wəshi tewəfərə kezha wəfərə zəzə ta nci va Mahwətə! Mbe ŋkwesle mene wəshia nci hɛ. Ma ke hɛ sha geze: «Wa nde nza kanakɛ ɓəmə wa? Wa nde ɗepe wəsə nya mene gheɓəmə wa?»

¹⁶Wa nya gezhia ŋayɛ yɛ gɛ! Kakelete nde ŋa ghene mbeli kaghene na? Kagezete wəsə nya menete wəndə: «Gheŋkɛ nde menete ɗa we», ke shɛ na? Kagezete ghene: «Wəsə keɗepe ŋa ŋkɛ we», ke sha nde ŋa ghene na?

¹⁷Temə vireɗi ne, katezhɛre Liban kantsa ta wəfe nyi keya, katezhɛre ntsa kaghɛa wəfe.

¹⁸Ma te vecia shɛ ne, katefa ghena nya mbe palepa ka mədəŋəa kɛfi, katenewe ŋkwa ka ghwələa kɛfi shavema ta nci mbe ŋkwesle nya diŋwədi.

¹⁹Katekemave zlama nya wəba ka dewə ŋeli mbe Mahwətə. Katetsa gaghwe tewəmbəreke Shala nya kaganda ta ka Israyɛl.

²⁰Kwa nza ŋkɛ ne, katenza kiɗi ta ka ghwərə ghwərəa ntsə, kateza sebe te ka ŋkele ntsə. Mɛke tenza sebe te mbeli nyi kezele mene nda wəsə kwa ndiremi ke mbeli,

²¹tsagha mbeli nyi kesla nda tseŋwə ke wəndə te ghwə, mbeli nyi keŋa nda keleŋa ke ka meha ghwə ba'a mbeli nyi keve nda fete ke wəndə nya ɗema fete ve.

²²Vatse gɛ, wa nya ghena nya geze nda Mahwətə, Shala ta hwelefe ta Zhakob, gheŋkɛ nya kembeɗeke Abraham nya: «Tsetsenya ne, katezhɛne hawe kanza te Zhakob, katezhɛne kema ta ŋkɛ kanza tɛarawe rawe we.

²³Ma vəa ŋkwa nya tenewe slene ta ɗa ŋwalea ŋkɛ te tepe ta nci ne, kateve sləa ɗa hɛ tekeleke, kateve Shala ta Zhakob hɛ tekeleke, kateghazlənə hɛ va Shala ta Israyɛl.

²⁴Kateɗepe wəshi ka dewə mehele, kateyɛ ghena ka ntɛaŋentɛa ghə.»