Read kapsiki Ɛzayi 30 Bible Online

Ɛzayi 30 - kapsiki bible

Ɛzayi 30

¹Ma ke Mahwətə: Ndiremi ya te ŋwale nyi kaka fama ghena! Slene nyi keɗema kese va 'ya yamene hɛ. Jikə geva nyi zəzəave nda ma 'ya ke hɛ yamene hɛ. Tsagha gɛ ne, jaɗafa yamene hɛ kadzeghəa jaɗafa.

²Kadzawa Ɛzhipte hɛ kaɗema kafa va 'ya, kezha wəfərə kwa ghwədərəa Farawon ba'a kezha zele ŋkwa kewəfərə yitea shenaŋkwe ta Ɛzhipte!

³Katepəli nda hawe ghwədərəa Farawon ke hɛ, katekelemte zləvə wəfərə yitea shenaŋkwe ta Ɛzhipte te hɛ.

⁴Nahe mbeli nyi te ghəa nci kentsehe mbe Sowan, nahe ka ghwene ta nci kekekave Hanɛs.

⁵Ama katezhɛ nda hawe ke hɛ pɛtɛ va mbeli nyi keɗema kakemanakɛ hɛ. Katekemanakɛ hɛ hɛ keɗema katekete hɛ hɛ we. Deke hawe yateve hɛ te hɛ ba'a zləvə yatekele hɛ seyi te hɛ.

⁶Kadzawa wəshi keseɗa nyi nza wəshi te hɛ laka Nɛgɛv. Dzawa laka hɛɗia yaka, ghazlənə, yirə ta mehele, ŋezhili ba'a ŋemia nivɛrə, yɛ mentsape ba'a shishi meŋele ne, fə yafə mcɛlə ba'a wəshi nyi nza zləvə te hɛ hɛ te wəmbəa kwara lɛmə ba'a zlegweməa lɛmə. Fə yafə nda hɛ hɛ ke hwelefe nya keɗema kaketekɛ hɛ.

⁷Kaganda ne, sefə ba'a gəmə kemane ta Ɛzhipte. Vatse ndeke nda slə 'ya “kaRahab nya ŋkwepɛ”.

⁸Ma ke Shala sha Ɛzayi: «Kwiɗi tsetsenya, ma kwa kema ta nci ne, rafete wəshi nyi te pelɛ nya slapesla, rafete hɛ te palepa perə. Ma te kwete hɛ ne, katenza hɛ kawəsə kanegha fete nya kaghala ghala.»

⁹Kwa nza ŋkɛ ne, mbeli nyi kefama ghena hɛ, ŋwale nyi kesla tseŋwə hɛ ŋwale nyi keɗema kafa ghena ta Mahwətə.

¹⁰Ma ke sha ka kelɛŋə: «Zhɛnema yɛ kanewe wəshi ma.» Ma ke sha ka mɛ ŋkwa: «Zhɛnema yɛ kageze n'yɛ kaganda ma, geze n'yɛ mə ghena nyi zeɗehwe n'yɛ, geze n'yɛ mə ghena nyi teghete yɛ.

¹¹Same ŋayɛ mə kwa hweŋkwa ganyɛ, slə ŋayɛ mə kwa hweŋkwa nya tiɗiɗi. Zhɛnema yɛ kageze n'yɛ ghena ta Shala nya kaganda ta Israyɛl ma.»

¹²Vatse gɛ ne, wa nya ghena nya geze Shala nya kaganda ta Israyɛl nya: «Ma va nya ɗema ghena ta ɗa yɛ, nya ve nda ghə yɛ ke mene berete ba'a nya dɛŋe geva yɛ te mbəɗəkwə ne,

¹³katenza beze ghena shɛ kaŋa ŋayɛ kala perawe nya te zli biya. Katenca tsehwembeke te zlia shɛ. Taghanyɛ ne, kateŋzla ŋkɛ.

¹⁴Katempə geva zlia shɛ kala kələa ghwelepe ta nde ŋa ghene. Katetene ŋkɛ we, katesləyi kələ nya wəba mbeli hwa hɛ kezha henze ghwə te reghwetɛ keɗema kezha gə yɛmə same kwa ghwa we.»

¹⁵Wa nya ghena nya geze Mahwətə, Shala nya kaganda ta Israyɛl nya: Ma nda nza yɛ kambele ne, nda yɛ kazhɛre geva kase 'ya ba'a nda yɛ kanza gweɗakwe. Ma berete ta ŋayɛ ne, mbe nza gweɗakwe ba'a mbe ve ɗa ghəa ŋayɛ. Ama kaɗe yɛ we.

¹⁶Ma pe yɛ zhɛnete: «Ewə, katehwɛ n'yɛ ghen'yɛ le gədəwə!» Kaganda ne, katehwɛ ŋayɛ gheyɛ. Ma pe yɛ ɓiyitsa: «Kahe kahe tehwɛ gədəwəa lɛməa n'yɛ.» Yawa, wɛre wɛre ma tenza mbeli nyi kekeka ŋayɛ.

¹⁷Ma kwetɛŋe nde ghema ne, mbelia ŋayɛ slibə yateɗa ŋkɛ. Ma va ɗa ta mbeli mcɛfe ne, katehwɛ yɛ pɛtɛ. Ma kakwa keɗaŋe ne, kala sheghwəa drape nya kwa ghəa ghweme, kala drape nya pelɛ wəmbə tenza mbelia ŋayɛ nyi ketene teghweme.

¹⁸Ama vəa zlaɓa heli yitea gheyɛ yaneghe Mahwətə, katesate ŋkɛ te ŋkwa kezha ncɛ ŋayɛ ganyɛa ŋkɛ, kwa nza ŋkɛ Mahwətə ya kaShala nya tiɗiɗi. Zlama ya va mbeli nyi keneghe mbele ta nci ve.

¹⁹Gheyɛ ka Siyon nyi mbe Zhɛrəzalɛm, katezhɛne yɛ kanehwene we. Katezlaɓa heli ŋkɛ yitea gheyɛ vəa ŋkwa nya tetsa nda lewela yɛ. Fatema ta ŋkɛ ne, katezhɛne ŋayɛ ŋkɛ.

²⁰Kateve ŋayɛ ɗafa Mahwətə te vəa ndiremi, katesa ŋayɛ yɛmə ŋkɛ te vəa yaka. Katezhɛne wəndə nya keteke ŋayɛ wəsə kawəfərə ghəa ŋkɛ we, katenewe ŋkɛ yɛ le ntsə ta ŋayɛ.

²¹Ma vəa ŋkwa nya tejive yɛ laka bela kwa zeme keɗema laka bela kwa gwela ne, ma pe yɛ sha tefa ghena kwetere wəmbəa ŋayɛ: «Nya ya kahweŋkwa, dzeghwa mə kwa.»

²²Kawəshi nyi wale wale tenewe shala nyi vɛsəaghe mze kwa tɛawetɛa yɛ kənəa hɛ ba'a sheghwə nyi fiaghe mze kwa tere tere yɛ kənəa hɛ yɛ. Katebete yɛ kala wəshi reɗa, ma pe yɛ sha tegeze nda ke hɛ: «Jive mə pelɛ!»

²³Tagha gɛ ne, kateme nda va ŋkɛ ke wəshi nyi tsawame yɛ mbe hɛɗi. Ma wəshi kezeme nyi temene ŋayɛ hɛɗi ne, kwele kwele ba'a kezeɗe zeɗenji tenza hɛ. Te vecia shɛ ne, katezeme gwəzə wəshi keseɗa ta ŋayɛ te ŋkwa keya wəshi nyi jama jama.

²⁴Ma yɛ sla ba'a kwara lɛmə nyi kewəza ne, katezeme zhawa nyi menahwe ghwene mbeli hwe hɛ. Katetaze zhawa shɛhɛ mbeli te hɛɗi le hwətə ba'a 'yɛmbe.

²⁵Ma te veci mpə ŋkwa nya wəba, vəa ŋkwa nya teŋzlanji cɛ nyi bebiya bebiya ne, katehwɛ yɛ yɛmə kwele kwele sawa pelɛ yɛ ghweme ba'a yɛ wəmbə.

²⁶Ma te veci nya tepeɗe yɛ zhia mbeli ŋkɛ Mahwətə, ma vəa ŋkwa nya tempi zhia nci ŋkɛ ne, kateɓele tere kala ɓele ta veci, kateɓele veci mberefaŋe zhigə za ma ke nya ghalanza.

²⁷Wa nya sləa Mahwətə nya kase cakeɗake, kala ghwə nya tse hwepe ta wənəa ŋkɛ, nahe ŋkɛ kenza ɗaŋe ɗaŋe. Ghena wənə ka same kwa mɛa ŋkɛ, kala ghwə nya ketse ghena ŋkɛ.

²⁸Kala ghwa nya kefə pɛtɛa wəshi zhɛne mpi ta ŋkɛ. Katetsake tsake hwelefefi ŋkɛ kwa lareya ta ndiremi, kateve nda lɛ ŋkɛ mbe mɛ ke hɛ kezha fə hɛ kadzete ŋkwa nya ɗema hɛ.

²⁹Ma gheyɛ mbeli nyi mbe Zhɛrəzalɛm ne, kategha cimə yɛ kala nya te viɗia gəsəkə, katenza wənəa ŋayɛ fare fare kala mbeli nyi kedzeghwa yitea vɛ ta shela, nyi kedzeme laka ghweme ta Mahwətə, laka Shala nya kakeleɓa ta Israyɛl.

³⁰Kategaka ŋwələa ŋkɛ nya ghazlənə mbeli ve Mahwətə, katencɛ berete ta dzeve ta ŋkɛ ŋkɛ. Katencɛ ghwə ta hwepe ta wənəa ŋkɛ ŋkɛ hwa tse ta ghwə nya ketse, hwa sefəa va nya wəba ba'a va kwacakelɛ.

³¹Va gaka ta ŋwələa Mahwətə ba'a yɛ ɗa ta geta ta ŋkɛ ne, katezhɛ nda ghazlənə ke Asiri.

³²Kala me ta geta nya ɗa ŋkɛ Mahwətə le ne, katetsa yɛ dimə ba'a yɛ getsepele mbeli yite. Katekafe dzeve ŋkɛ kezha ɗa Asiri.

³³Nahe ghwə kehite geva warakenyɛ, nahe ŋkɛ kenza kezha meghe perə. Kwa ki nya beŋwe ba'a nya lɛame ne, taghele ghele mbeli ketseɓate sheghwə kwele kwele kezha ghwə. Tagha gɛ, katendə zhɛne mpi ta Mahwətə yite kala ghwə ta gezla nya wəba.