Read kapsiki Ɛzayi 31 Bible Online

Ɛzayi 31 - kapsiki bible

Ɛzayi 31

¹Ndiremi ya te mbeli nyi kedzawa Ɛzhipte kezha zele kemane! Te yɛ gədəwəa lɛmə ve ghə hɛ, ke wəmata nyi kempa ndeke nda ghə hɛ, va nya nza hɛ kwele kwele ba'a ke ka zleɗe gədəwəa lɛmə, va nya nza hɛ keberete beretenji. Ama kanewe Shala nya kaganda ta Israyɛl hɛ we, kazele Mahwətə hɛ we!

²Ama gheŋkɛ ne, kentsehwele ntsehwele ŋkɛ, wərə ŋkɛ kakeleke ndiremi. Kambeɗe ghena nya gezete ŋkɛ ŋkɛ we. Kasate ŋkɛ te ŋkwa yitea ka 'yaghwa mehele, ba'a yitea ka ndiremia mehele nyi heka mbeli yitea kemane.

³Deke mbeli ka Ɛzhipte, kenza hɛ kashala we. Deke wəshi keseɗa gədəwəa lɛməa nci, kenza hɛ kakwete wəsə we. Ma vəa ŋkwa nya tekafe dzeve Mahwətə ne, katetsa nde kemane ŋkwa tehene, kateteɗe wəndə nya kemane mbeli. Kateza sebe te hɛ bake nci.

⁴Wa nya ghena nya gezete ɗa Mahwətə nya: «Ma vəa ŋkwa nya ghwəghwə nivɛrə keɗema wəzege ta nivɛrə kənəa wəsə nya keseve ŋkɛ, ya mbeli hekake wəvəsəa ka ya wəshi yite ne, kaghazlənə ŋkɛ va lewela ta nci, keɗema kahweredzekwe ŋkɛ gaka ta nci we. Tsagha tesawa Mahwətə nde berete kezha mpa pelɛ ghweme ta Siyon ba'a pelɛ wəmbəa ŋkɛ.»

⁵Kala nya pelake yɛ bidzəa ŋkɛ 'yɛ ne, tsagha teya Zhɛrəzalɛm Mahwətə nde berete. Kateya ŋkɛ ŋkɛ ba'a katembele ŋkɛ ŋkɛ, katekemane ŋkɛ ŋkɛ ba'a katembeɗe ŋkɛ ŋkɛ.

⁶Ka Israyɛl, zhɛne mə geva kase sha wəndə nya zhɛrave nda wəmbə yɛ tsape tsape.

⁷Ma te kwete hɛ ne, yayata wəndəa ŋayɛ katebete yɛ shala mze kwa tɛawetɛa ba'a yɛ shala mze kwa tere tere nyi mene menete ŋkɛ le dzeve ta ŋkɛ.

⁸Kateteɗe Asiri va kafayɛ nya keɗema kaŋa mbeli kafayɛa wəndə ŋelɛ nde teza sebe te we. Katehwɛ ka Asiri va kafayɛa shɛ, kateve nda slene mava mbeli ke ka mempɛhwetɛtia nci.

⁹Katehwɛnji nyi berete berete ta nci va ghazlənə, katewəfə drapea nci mbeli nyi te ghə va yirə ta nci. Mahwətə nde gezete, gheŋkɛ nya nza ghwə ta ŋkɛ pelɛ Siyon, ba'a laɗe ta ŋkɛ mbe Zhɛrəzalɛm.