Read kapsiki Ɛzayi 37 Bible Online

Ɛzayi 37 - kapsiki bible

Ɛzayi 37

¹Ma kwa fate ghena ta nci meghe Ɛzɛkiyas ne, pa ŋkwahemte yɛ lekwesa ta ŋkɛ, mɓɛke ŋkɛ hwepahwe wəsə hwa hwə ba'a cape ŋkɛ kadzembe ghɛa Mahwətə.

²Pa ŋkɛ ghwenakɛ Ɛliyakim, wəndə nya te ghəa ghɛa meghe, Shebna, nde rafe wəshi ba'a ka dzeghe Shala nyi kevɛakɛ sefə kalə sha nde mɛ ŋkwa Ɛzayi, wəzege ta Amots. Wəsə yahwehwepahwe mbelia shɛhɛ hwa hwə perə.

³Ma ke hɛ shɛ: «Wa nya ghena nya geze Ɛzɛkiyas nya: Ma veci nya ne, vecia ndiremi, ɗa ba'a hawe ŋkɛ. Ma ke mbeli sha kwete ghena: nahe və kesawa ta wəzege kwa hwə kese, ama berete shɛ va meghekɛ kezha ya ŋkɛ we.

⁴Ya kwete katefa ghena ta wəndə nya te ghəa ka sewajɛ nya ghweneke nde sleke ŋkɛ, meghe nya mbe Asiri kezha ŋele Shala teghweme Shala Mahwətə ta ŋa. Ya kwete kateve ɗa Shala Mahwətə ta ŋa te tewəmbəreke ghena nyi fate nyi ŋkɛ. Ma gha gɛ Ɛzayi Səkwə Mahwətə kezha mbeli nyi ketene nyi teghweme.»

⁵Ma kwa kiɗimte geze ghena ta nci mbeli nyi ghwenakɛ meghe Ɛzɛkiyas sha Ɛzayi ne,

⁶ma ke Ɛzayi sha hɛ: «Ma pe yɛ sha nde sleke ŋayɛ: Wa nya ghena nya geze Mahwətə nya: Ghazlənəma na va ghena nyi fate nyi na, ghena nyi ŋelekɛ ɗa nyi ka mene slene ta meghe nya mbe Asiri le hɛ ma.

⁷Katefa kwete ghena meghea nci. Tagha gɛ, kateve nda zəzə kezhɛne geva kadzete hɛɗia ŋkɛ 'ya. Te hɛɗia shɛ tepesle ŋkɛ 'ya le kafayɛ.»

⁸Tewətelɛwe wəndə nya te ghəa ka sewajɛ zhɛneke geva kase sha meghe nya mbe Asiri nya kehave nda mpa ke Libna. Kwa nza ŋkɛ ne, nahe ŋkɛ kefate tsema tsema slənyɛ meghe mbe Lakish.

⁹Fa ke meghe nya mbe Asiri ne, se yase Tiraka, nde Ɛtiyopi nya kameghea ka Ɛzhipte kezha ha nda mpa. Fatema ta ŋkɛ ne, pa ghweneghe nda mbeli ke Ɛzɛkiyas,

¹⁰meghea ka Zhəwda. Ma ke hɛ shɛ: «Ghwetema ŋa Shala ta ŋa nya vate ghə nya na te ma, ma ke: Kateve geva Zhɛrəzalɛm mbe dzeve ta meghea ka Asiri we.

¹¹Gha le ghəa ŋa ne, nahe na kefate wəsə nya menete nda ka meghea kɛfia ka Asiri ke hɛɗi nyi zamte sebe hɛ te hɛ. Ma zəzə na ne, pələsə tenza na na?

¹²Nahe yɛ shala ta hwelefefi nyi zamte sebe ka shihɛ ɗa te hɛ kembelemte Gozan, Haran, Rɛsɛf ba'a Tɛlasar, wədəa meleme ta ka Ɛdɛn na?

¹³Tema meghe nya mbe Hamat, meghe nya mbe Arpad, meghe nya mbe Layir, nya mbe Sefarvayim, nya mbe Hɛna ba'a nya mbe Ava wa?»

¹⁴Laŋe Ɛzɛkiyas te palepa nya mɛa dzeve ta mbeli nyi ghweneke mbeli, pa jaŋgate. Kwa sebe ta ŋkɛ ne, cape ŋkɛ kadzembe ghɛa Mahwətə, pa peleyi palepa shɛ kwa kema ta Mahwətə.

¹⁵Kwa sebe ta ŋkɛ, pa səkwəte Mahwətə, ma ke:

¹⁶«Mahwətə nde berete, Shala ta Israyɛl, ma gha nya mentishɛ kənəa ka shɛrəbɛŋe ne, deke gha ya kaShala ta hɛɗi nyi te hɛɗi lema. Gha nde pate ghweme ba'a hɛɗi.

¹⁷Mahwətə, ghwenemte sleme shɛ na fave megela! Mahwətə, pelemte ntsə shɛ na neweve megela! Fa ŋele nya ŋele ŋa nyi mbeli nyi ghweneke nyi Sɛnakɛrib le hɛ gi Shala teghweme!

¹⁸Mahwətə, kaganda zamte sebe ka meghea kɛfia ka Asiri te kweci hwelefefi ba'a hɛɗia nci.

¹⁹Nahe hɛ kebeteyi yɛ shala ta nci mbe ghwə. Kwa nza ŋkɛ ne, kenza hɛ kashala ganji. Deke wəshi nyi menete dzeve ta wəndə ŋelɛ yitea sheghwə keɗema yitea pelɛ hɛ. Nahe hɛ kezamte sebe te hɛ.

²⁰Ama gha gɛ Shala Mahwətə ta n'yɛ, mbelete n'yɛ va dzeve ta Sɛnakɛrib. Ma tsagha gɛ, kateɗepe pɛtɛa hɛɗi nyi te hɛɗi lema, deke gha ya kaMahwətə.»

²¹Tagha gɛ, ma ke Ɛzayi, wəzege ta Amots ghweneghe nda mɛ ke Ɛzɛkiyas: «Wa nya ghena nya geze Mahwətə, Shala ta Israyɛl nya se na kasəkwə ŋkɛ te ghəa ghena ta Sɛnakɛrib, meghe nya mbe Asiri nya:

²²Fate ghena nyi geze Mahwətə te Sɛnakɛrib: Kaɓela ŋa meleme ta Siyon we, gha yayiɗə ŋkɛ. Gha yaŋ'wəshi meleme ta Zhɛrəzalɛm, ghə yagagəzə nde kwetere wəmbəa ŋa.

²³Wa yaŋelekɛ na ba'a yayiɗəkɛ na wa? Kənəa wa se na kaŋgezle wa? Wa yase na kanewe le ŋkele ntsə wa? 'Ya Shala nya kaganda ta Israyɛl gɛ na!

²⁴Laka ka ghwene ta ŋa ne, nahe na keŋelekɛ ɗa, 'ya Mahwətə. Ma pa na gezete: ‹Ma 'ya Sɛnakɛrib, te zlaɓa ta wəmata kempa nyi kwele kwele va 'ya ne, nahe 'ya kedzeme ghəa yɛ ghweme, pa pelɛ ghəa ghweme ta Liban. Nahe 'ya ketsetsasleve lekelekea ŋkɛ nyi bebiya bebiya ma ba'a vɛ ta ŋkɛ nyi ndeɗe ndeɗe ma. Nahe 'ya kentsehe pelɛ ghweme ta ŋkɛ nya biya ma ba'a mbe ghɛa wəfe ta ŋkɛ nya ndeɗe ma.

²⁵Nahe 'ya kelate yɛ belageji ba'a kesesakɛ yɛməa nci. Nahe 'ya kehehasemte yɛ dzeve ta Nil kwa ŋkeɗeyi seɗa 'ya mbe Ɛzhipte.›

²⁶Yawa, Sɛnakɛrib, nda keɗepe na wəka? Se vəashi slekete wəshia shɛhɛ 'ya. Vəashi himte hweŋkwa ta nci 'ya. Se hecanyɛ menete zəzəa shɛ 'ya. Tsetsenya ne, 'ya kayipə hɛ kadzawa. Nahe 'ya keveyi kezha zhɛre meleme nyi berete berete kakwəfi.

²⁷Kaka dewə berete mbeli nyi mbe melemea shɛhɛ, kazhɛ nda ghazlənə ba'a hawe ke hɛ. Nahe hɛ kenza kala gwəzə nyi kwamte, kala tramza nyi gwereɗɛa gwereɗɛa, kala gwəzə nyi dzeyi te dɛɓere nyi kənəa cɛ nyi ghwelemte sefə nya kesame zeweve ta ghweme.

²⁸Nahe 'ya keɗepemte ŋa: vəa ŋkwa nya sate na te ŋkwa keɗema nya ntishɛ na, vəa ŋkwa nya shave na ki ghɛ keɗema nya dzeki na, vəa ŋkwa nya hwepete wənə na va 'ya.

²⁹Ma va nya hwepete wənə na va 'ya ba'a nya fate ghena ŋkele ntsə ta ŋa 'ya ne, 'ya kateve ŋa hiwə hiwə mbe ŋshi ba'a lɛ mbe mɛ. Katezhɛne ŋa 'ya dzeyi te sebe kwa hweŋkwa nya se nya na.

³⁰Wa nya wəsə kencɛ wəsə nya kaŋa ŋa gɛ Ɛzɛkiyas: ma ɓeshi kava ne, ha ta gapele yatezeme mbeli, tsagha heshi tsetse ŋkwa. Ama te kwa mahekene ta va ne, katetsawe ha yɛ ba'a katemene ha yɛ, katemɓe yɛ rɛzɛŋe yɛ ba'a katezeme ya ta nci yɛ.

³¹Ma mbeli nyi ketene teghweme te hɛɗia Zhəwda ne, katenza hɛ kala magwɛaɓa ta wəfe. Kateha yɛ slərə mɛnɛfɛ hɛ dzawa mbe hɛɗi ba'a katenza yɛ ya dzeyi te dzeve ta nci.

³²Kwa nza ŋkɛ ne, kateshave mbeli nyi ketene mbe Zhɛrəzalɛm, kateghereŋe mbeli nyi ketene teghweme pelɛ ghweme ta Siyon. Nya ya kawəsə nya temene Mahwətə nde berete tewəmbəreke ɗe ta ŋkɛ nya wəba.»

³³Ma ke Ɛzayi mtsehete: «Vatse gɛ ne, wa nya ghena nya geze Mahwətə te ghəa meghe nya mbe Asiri nya: Katedzembe meleme nya ŋkɛ we, katehe have ŋkɛ kadzembe we, kateha nda mpa ŋkɛ le yɛ gelə we, katetsene hɛɗi ŋkɛ dzeyi yitea melemea shɛ we.

³⁴Katezhɛne geva ŋkɛ kwa hweŋkwa nya kelete ŋkɛ kase. Katedzembe meleme nya ŋkɛ we. 'Ya Mahwətə nde gezete.

³⁵Kateya meleme nya 'ya ba'a katembele ŋkɛ 'ya, va nya nza 'ya kaShala ba'a tewəmbəreke David, nde mene slene ta ɗa.»

³⁶Pa nde ghwene ta Mahwətə se kadzembe ghedəkwəa ka Asiri ba'a mpəmte zhili 185.000. Satema ta mbeli te ŋkwa masheke ne, pa mbeli nyi ketene teghweme ntsate pɛtɛa mbeli nyi kempə mpə.

³⁷Tagha gɛ, pa Sɛnakɛrib, meghe nya mbe Asiri zhɛneghe geva kalə kanza mbe Ninive.

³⁸Ma kwete hɛ, vəa ŋkwa nya nza ŋkɛ kasəkwə ghə mbe ghɛa Nisrok, shala ta ŋkɛ ne, pa kweci ŋwalea ŋkɛ bake, yɛ Adramɛlɛk le Sarɛsɛr peslekɛ ŋkɛ le kafayɛ ba'a hwɛnji kadzete hɛɗia Ararat. Pa Asarhadon, wəzege ta ŋkɛ dzete meghe te ŋkwa ŋkɛ.