Read kapsiki Ɛzayi 39 Bible Online

Ɛzayi 39 - kapsiki bible

Ɛzayi 39

¹Ma te vəa shɛ ne, pa meghea ka Babilone, Mɛrodak-Baladan, wəzege ta Baladan, ghweneghe nda mbeli le palepa ba'a wəsə gəmə ke Ɛzɛkiyas, kwa nza ŋkɛ nahe ŋkɛ kefate shewə se ŋkɛ ba'a nahe ŋkɛ kembe.

²Pa Ɛzɛkiyas zlamate zlama te se ta mbelia shɛhɛ ba'a ncɛmte nda ŋkwa kebete wəshi nyi nza zləvə te hɛ, mze kwa tɛawetɛa, mze kwa tere tere, 'wərdə ba'a n'yi nya kezəŋwə kizə kizə ke hɛ. Pa ŋkɛ ncɛte nda ŋkwa kebete wəshi kempa ta ŋkɛ ba'a pɛtɛa wəshia ŋkɛ nyi wəfərəakɛ ŋkɛ perə. Wəsə kewəfərəakɛ Ɛzɛkiyas va hɛ ki ghɛa ŋkɛ keɗema te hɛɗia ŋkɛ we.

³Kwa sebe ta ŋkɛ ne, hwa'a nde mɛ ŋkwa Ɛzayi se sha meghe Ɛzɛkiyas, ma ke shɛ: «Wa ke mbeli nyi sha gha wa? Tema se hɛ wa?» Ma ke Ɛzɛkiyas zhɛnete nda: «Se cakeɗake hɛ kanewe ɗa, se mbe Babilone.»

⁴Ma ke Ɛzayi zhɛkwa: «Wa wəsə nya nakɛ hɛ ki ghɛa ŋa wa?» Ma ke Ɛzɛkiyas zhɛnete: «Pɛtɛa wəshi nyi ki ghɛa ɗa nakɛ hɛ. Wəsə nya wəfərəakɛ 'ya shɛ kaɗema 'ya kencɛte nda ke hɛ we.»

⁵Ma ke Ɛzayi sha Ɛzɛkiyas: «Fa ghena nya geze Mahwətə nde berete:

⁶‹Katese veci nya tefəmte pɛtɛa wəshi nyi ki ghɛa ŋa, pɛtɛa wəshi nyi tsenete ka shihɛ ŋa pa ɓeshi nya mbeli kajive Babilone. Kaganda ne, wəsə shɛ katetene we, ke Mahwətə.

⁷Katefə hwelefefia ŋa, ŋwale nyi ketesawa mbe gha mbeli. Katenza hɛ kaka tsewe tsewe nyi ki ghɛa meghea ka Babilone.›»

⁸Ma ke Ɛzɛkiyas sha Ɛzayi: «Ghena ta Mahwətə nya gezete nya na ne, ghena ganyɛ ŋkɛ.» Ma ke mbe ghəa ŋkɛ: «Katenza kwelɛŋe ba'a nza gwezlayɛ shɛ kala nza ta hɛa ɗa teghweme.»