Read kapsiki Ɛzayi 4 Bible Online

Ɛzayi 4 - kapsiki bible

Ɛzayi 4

¹Ma te vecia shɛ ne, katekese za kwetɛŋe mi mberefaŋe, ma ke hɛ sha tegeze nda: «Katezeme nda zeme n'yɛ ke ghəa n'yɛ, ba'a kateseɗe nda lekwesa n'yɛ ke geva n'yɛ. Kelemte hawe te ghen'yɛ nahe laka yɛ kanza ghen'yɛ kamia ŋa!»

²Ma te kwete veci ne, katepese kwete wəsə nya ganyɛ ba'a nya nza zləvə te Mahwətə. Kateve nda farefa ba'a zləvə wəshi nyi temene hɛɗi ke mbeli nyi ketene teghweme mbe Israyɛl.

³Tagha gɛ, kateheka mbeli nyi ketetene mbe Siyon, nyi ketetene teghweme mbe Zhɛrəzalɛm mbeli “kambeli nyi keveyi nda geva tekeleke ke Shala”. Katenza hɛ pɛtɛ kambeli nyi rafete geva sləa nci kezha nza teghweme mbe Zhɛrəzalɛm.

⁴Ma vəa ŋkwa nya teyaɓemte reɗa ta mi nyi mbe Siyon ba'a nya teyaɓemte mimi nya keshekeyi geva mbe Zhɛrəzalɛm Shala laka sefəa nza tiɗiɗi ba'a sefəa nza wɛŋe ne,

⁵katenca ləmbə Mahwətə kənəa pɛtɛa ghweme ta Siyon ba'a kənəa mbeli nyi ketsenete geva pelɛ heveci, n'yia ghwə ba'a ghɛnia ghwə heviɗi. Zləvəa ŋkɛ nde tenza kənəa yayata ŋkwa.

⁶Katenza ŋkɛ kaghwəli nya kemene shenaŋkwe va ghyana ta ŋkwa nya heveci, kaŋkwa kewəfərə ba'a kaŋkwa kenza va sefəa va ba'a va va.