Read kapsiki Ɛzayi 42 Bible Online

Ɛzayi 42 - kapsiki bible

Ɛzayi 42

¹Ma ke Shala: «Wa nya nde mene slene ta ɗa nya, kakese ŋkɛ 'ya te dzeve, zeɗehwe ɗa nta nya ntave ŋkɛ 'ya. Nahe 'ya kevaghe Sefəa ɗa kənə kezha ve nda dzeghwa tiɗiɗi ŋkɛ ke hwelefefi.

²Kaŋgezle ŋkɛ we, kageze ghena ŋkɛ le berete we, kafa ŋwələa ŋkɛ mbeli hwa mbeli kwa hweŋkwa we.

³Kaɓele ha nya keteɓəsə teɓəsə ŋkɛ we, kapesle paterela nya ghəlizhi ŋkɛ we. Ama wəsə nya kehi nya teve 'ya yatekele ŋkɛ kase.

⁴Katenza geva ta ŋkɛ keta ta we, katenza ŋkɛ keyirə yirə pa te və nya veyi kaganda ŋkɛ te hɛɗi we. Katemawe hɛɗi nyi dzeyi te yɛmə kafa ghena ta ŋkɛ.»

⁵Wa nya ghena nya geze Shala Mahwətə nya kepate ghweme ba'a nya kepeleyi ŋkɛ, nya kepelakeyi hɛɗi ba'a wəshi nyi te, nya kendeke nda mpi ke mbeli nyi dzeyi te ba'a zhɛne mpi ke mbeli nyi kedzeghwa te nya:

⁶«Ma 'ya nya kaMahwətə ne, nahe 'ya kehekakɛ ŋa laka nza tiɗiɗi, nahe 'ya kekeseve ŋa te dzeve, nahe 'ya keyate ŋa kezha ve ŋa kajikə geva le mbeli, kawaŋea hwelefefi.

⁷Katepele nda ntsə na ke ka ghwələa kɛfi, katefə ka daŋgayɛ na same kwa daŋgayɛ ba'a mbeli nyi mbe ŋkwesle same kwa daŋgayɛ.

⁸'Ya ya kaMahwətə, tsetse sləa ɗa, kave nda zləvəa ɗa 'ya ke kwete wəndə we, kasərə nda kwelea ɗa 'ya ke kweci shala we.

⁹Nahe wəshi nyi keghate kemenete geva, wəshi mɛnɛfɛ yageze ŋayɛ 'ya tsetsenya. 'Ya kageze ŋayɛ hɛ, nda temene geva hɛ.»

¹⁰Gha nda mə cimə mɛnɛfɛ ke Mahwətə. Tsahe mə ŋkɛ se te mendɛkwe ta hɛɗi gheyɛ mbeli nyi kedzeghwa te ndərə, gheyɛ wəshi nyi kwa ndərə ba'a gheyɛ mbeli nyi cakeɗa cakeɗa.

¹¹Gha cimə mbeli nyi mbe meleme nyi te ɓerama, tsagha ghedəkwə nyi mbe Kɛdar. Tsa gaghwe mbeli nyi mbe Sɛla, gha geza hɛ sawa pelɛ ghəa yɛ ghweme.

¹²Ve zləvə mbeli te Mahwətə, tsahe ŋkɛ mbeli nyi cakeɗa cakeɗa le berete.

¹³Kateshave Mahwətə kala katsala sewajɛ, kahwepe ghə ŋkɛ kala nde mpa. Katsa kaka ŋkɛ le berete, kahərə ka ghema ta ŋkɛ ŋkɛ.

¹⁴Ma ke Shala: «Se ghalanza ne, divə nza ɗa 'ya, ghena shɛ kese 'ya kageze we, nahe 'ya kekeseyi ghəa ɗa. Ma tsetsenya ne, 'ya katetsa lewela. Kala male nya keheha va ya ne, 'ya kaŋələvə, 'ya kagafe ba'a 'ya kashɛshɛŋkwefe.

¹⁵'Ya katetsəhwə yɛ ghweme ba'a yɛ wəmbə, 'ya kateghwele pɛtɛa wəshi nyi kepese pelɛ hɛ, 'ya katezhɛre yɛ hələ kahɛɗi nya helaŋe helaŋe ba'a 'ya katehase yɛ ndərə.

¹⁶Kateve nda dzeghwa 'ya ke ka ghwələa kɛfi kwa hweŋkwa nya ɗepema hɛ, katebeghe hɛ 'ya kwa hweŋkwa nyi ɗepema hɛ. Ma te kema ta nci ne, 'ya katezhɛre ŋkwesle kawaŋe ba'a ŋkwa nyi kaki kaki kaŋkwa nyi ɓerayɛ ɓerayɛ. Nyi ya kawəshi nyi temene 'ya, kateɗema 'ya mene hɛ we.

¹⁷Katedzeyi mbeli nyi keve nda ghə ke wəshi nyi feɗete mbeli te sebe, katezhɛ nda hawe ke mbeli nyi kendeke nda ghə ke wəshi nyi vɛsəte mbeli le mze. ‹Gheyɛ ya kashala ta n'yɛ›, a ke hɛ sha geze nda ke hɛ.

¹⁸Gheyɛ ka mədəŋəa kɛfi, fa mə ghena gɛ! Gheyɛ ka ghwələa kɛfi, newe mə ŋkwa gɛ!

¹⁹Wa wəndə nya kaghwələ keɗema nde mene slene ta ɗa tse wa? Wa wəndə nya kamədəŋə kala wəndə nya ghwene 'ya tse wa? Kaganda ne, wa wəndə nya kaghwələ kala wəndə nya kekemave kwelɛŋe wa? Wa wəndə nya kamədəŋə kala nde mene slene ta Mahwətə wa?

²⁰Wəshi kwele kwele yanakɛ na, ama kese na kave hɛ yitea ghə we. Keghwene ghwene sleme te gha, ama wəsə shɛ kefate na we.»

²¹Nahe Mahwətə keɗehwe tewəmbəreke tiɗiɗia ŋkɛ kazhɛre wəsə mahalegəa ŋkɛ wəbake ba'a ganyɛke.

²²Ama wa nya hwelefe nya fəhwe ba'a zləgwəhwe wəshia ŋkɛ mbeli nya. Pɛtɛ mbelia ŋkɛ keŋzle ŋzle dzeyi kwa yɛ ki, kewəfərə wəfərə dzeyi mbe yɛ daŋgayɛ. Nahe mbeli kefəhwe wəshia nci, wəndə shɛ kezha mbele hɛ we. Nahe mbeli kezləgwəhwe wəshia nci, wəndə shɛ kegeze: “Zhɛneyi mə hɛ”, ke we.

²³Wa nde teve sleme yitea ghena nyi hwa gheyɛ wa? Wa nde tefa ba'a nde tefave te kwete hɛ wa?

²⁴Wa nde pelave nda Israyɛl, hwelefe ta Zhakob ke mbeli nyi kefəhwe wəshia nci, ke mbeli nyi kezləgwəhwe wəshia nci wa? Ashɛ Mahwətə nya menete nda jaɗafa gheɓəmə wəka? Kese Israyɛl kaɗe kazele hweŋkwa nya ncɛte nda ŋkɛ we, kese ŋkɛ kafa wəsə mahalegəa ŋkɛ we.

²⁵Vatse shekaghe ghwə ta hwepe wənəa ŋkɛ ba'a vaghe mpa nya dzawe ŋkɛ kənəa Israyɛl. Dzasle ghwə ta hwepe wənəa shɛ ndəyite ghwə yite, ama wəsə shɛ kefate Israyɛl we. Pa ghwəa shɛ teremte mbeli, ama kese Israyɛl kakele zəzə te we.