Read kapsiki Ɛzayi 48 Bible Online

Ɛzayi 48 - kapsiki bible

Ɛzayi 48

¹Fa mə ghena nya, gheyɛ mbelia Zhakob, gheyɛ nyi keheka ghəa ŋayɛ le sləa Israyɛl, gheyɛ hwelefefia Zhəwda, gheyɛ nyi kezeme fela le sləa Mahwətə, gheyɛ nyi ketsahe Shala ta Israyɛl kaɗema le wənə kwetɛŋe ba'a kaganda,

²gheyɛ nyi keheka ghəa ŋayɛ “Kaka meleme nya keveyi geva tekeleke”, gheyɛ nyi kedɛŋe geva te Shala ta Israyɛl nya nza sləa ŋkɛ “kaMahwətə nde berete”.

³Ma ke Shala gezete: «Ma vəashi ne, nahe 'ya kegezete wəshi nyi kemenete geva, kwa mɛa ɗa same hɛ, nahe 'ya kegezete ŋayɛ hɛ. Taghanyɛ 'ya menete ne, pa hɛ ncake geva.

⁴Ama nahe 'ya keɗepe ŋayɛ kaka ntɛaŋentɛa ghə, kaɗe yɛ kafa ghena we, ntɛaŋe ntɛaŋe mehele ta ŋayɛ.

⁵Vatse gezete ŋayɛ wəshia shɛhɛ 'ya warake. Nahe 'ya kefate ŋayɛ hɛ, tewə hɛ kenaka kase. Tsagha ne, kategeze yɛ: ‹Shala ta ɗa nde menete, shala sheghwəa ɗa keɗema shala mzea ɗa nde gezete›, pe yɛ we.

⁶Nahe yɛ kefate ghena nya gezete 'ya, nahe yɛ kenakɛ tsema tsema yipəyi geva ŋkɛ kwa. Kateɗepete ghena shɛ yɛ tse yi? Se tsetsenya ne, 'ya kageze wəshi mɛnɛfɛ nyi wəmbəyi 'ya ba'a nyi ɗepema yɛ.

⁷Kenza wəshia shɛhɛ kawəshi nyi heca we, ama tsetsenya tepa hɛ 'ya. Pa ɓeshi nya ne, kegha yɛ kafate hɛ tɛape we. Kaɗe 'ya kageze yɛ: ‹Nahe n'yɛ keɗepe hɛ›, pe yɛ we.

⁸Wəsə shɛ kefate yɛ we, wəsə shɛ keɗepete yɛ we, ghena shɛ kedzawa sleme ta ŋayɛ warakenyɛ we. Kwa nza ŋkɛ ne, nahe 'ya keɗepe kaka pamte ŋkwa yɛ, yama ta ŋayɛ ne, ‹kaka fama ghena› heka ŋayɛ mbeli.

⁹Ama va nya nza 'ya kaShala ne, 'ya kakese wənəa ɗa. Ma kezha zləvəa ɗa ne, 'ya kaya ŋayɛ kezha ɗema kaza sebe te gheyɛ.

¹⁰Nahe 'ya kepɛmte ŋayɛ wɛŋe le ghwə, kaɗema le ghwə nya kala ŋa mze kwa tɛawetɛa, ama mbe ghwə ta yaka pɛmte ŋayɛ 'ya.

¹¹Ma nda menete 'ya tsagha ne, kezha ghəa ɗa, kaganda ne, kezha ghəa ɗa. Kwa nza ŋkɛ ne, kazereghete 'ya kezha kelemte geva zləvə te sləa ɗa we. Kave nda zləvəa ɗa 'ya ke kwete wəndə we.»

¹²Ma ke Shala: «Fa ɗa ŋa ɗa, hwelefe ta Zhakob, Israyɛl, gha nya hekakɛ 'ya. Kazhɛre pa 'ya we: 'ya ya kande ghate ba'a 'ya ya kande keɗaŋe.

¹³Dzeve ta ɗa nde veyi shihəa hɛɗi, dzeve kwa zeme ta ŋa nde peleyi ghweme. Ɗa ma ta ɗa kehekɛmete sləa nci ne, nda kancɛ geva hɛ taghanyɛ.

¹⁴Tsenete mə geva pɛtɛa ŋayɛ ba'a fate mə. Wa nde gezete wəsəa shɛ hwa hɛ wa? Ma wəndə nya ɗe Mahwətə ne, katemene ɗe ta ŋkɛ ŋkɛ te Babilone, kateme dzeve ta ŋkɛ te ka Kaldɛ.

¹⁵'Ya, deke 'ya nde gezete ghena. Kaganda ne, 'ya nde hekakɛ ŋkɛ, 'ya nde keleke ŋkɛ kase, katejive slene nyi mene ŋkɛ te kema.»

¹⁶Hende ɗa mə geva kase ba'a fa mə ghena nya: Se te ghatenyɛ ne, kegha 'ya kagezete ghena tewəfərə we. Se te və nya menete geva wəshia shɛhɛ ne, nahe 'ya kenza tagha. Tsetsenya gɛ, Shala Mahwətə nde ghwene ɗa le Sefəa ŋkɛ.

¹⁷Wa nya ghena nya gezete Mahwətə nde mbele ŋa, Shala nya kaganda ta Israyɛl nya: «'Ya ya kaMahwətə Shala ta ŋa, 'ya nde teke ŋa wəshi nyi kekemane ŋa, 'ya nde beghe ŋa kwa hweŋkwa nya dzeghwa na.

¹⁸Ama, ma nda nahe na kefate ghena nyi gezete ŋa nyi 'ya ne, nza kala hələ tenza kwelɛŋea ŋa, kala yɛ gaŋkeɓe ta ndərə tenza tiɗiɗia ŋa!

¹⁹Nza kala ndaleghe kwa hələ tenza ŋwalea ŋa, nza kala kweya tenza hwelefefia ŋa. Kateza sebe te sləa nci kwa kema ta ɗa tɛape we.»

²⁰Shave mə mbe Babilone, hwɛ mə seyi te hɛɗia ka Kaldɛ. Le tsa gaghwe ne, zlapete mə ghena mɛnɛfɛa shɛ, pesleyi mə ghena shɛ hwa'a te mendɛkwe ta hɛɗi, ma pe yɛ sha geze: «Nahe Mahwətə kembelete Zhakob, nde mene slene ta ŋkɛ.»

²¹Katezhɛ nda ndere ke hɛ te hɛɗi nyi keghwele ghwele nyi tefə hɛ ŋkɛ kadzete we. Katentsa nda yɛmə ŋkɛ shave mbe gela ke hɛ, kateperawe gela ŋkɛ yitea hwɛ yɛmə shave mbe.

²²Ma ke Mahwətə: «Zeɗe nza shɛ kaŋa ka 'yaghwa mehele we.»