Read kapsiki Ɛzayi 52 Bible Online

Ɛzayi 52 - kapsiki bible

Ɛzayi 52

¹Feɗeghe gɛ Siyon! Feɗeghe ŋa kahe kahe gɛ! Ncɛte berete ta ŋa gɛ Zhɛrəzalɛm, meleme nya keveyi geva tekeleke, seɗete lekwesa ganjia ŋa gɛ! Kwa nza ŋkɛ ne, katezhɛne ka slamtema mɓɛta, mbeli nyi wale wale kadzembe gha we.

²Bekwemte keləwə nya te geva ta ŋa, sate ŋa shɛ na ntishɛ ŋa te ŋkwa ŋa, gha Zhɛrəzalɛm nya kwa daŋgayɛ. Ŋslemte zewe lɛ nya kwa welɛa ŋa, gha wəzha ta Siyon nya kesehwe mbeli.

³Kwa nza ŋkɛ ne, wa nya ghena nya geze nda Mahwətə ke mbelia ŋkɛ nya: «Nahe yɛ kepamte geva gəmə, katembeɗe geva yɛ kaɗema le cɛdɛ.»

⁴Ma ke Shala Mahwətə ɓiyitsa: «Kaghate ne, nahe mbelia ɗa kedzawanji kezha wəfərə kwa Ɛzhipte. Ma kakwa keɗaŋe ne, Asiri nde se kasa nda yaka ke hɛ.

⁵Mbe ghena nya tsetsenya nya ne, wa yaŋ'we 'ya wa? 'Ya Mahwətə nde geze. Kwa nza ŋkɛ ne, nahe mbelia ɗa kefəhwe geva gəmə. Gaghwe yatsa ka ghwərə ghwərəa ntsə, 'ya yaŋele hɛ kevə kevə.

⁶Vatse teɗepe sləa ɗa mbelia ɗa wa ŋkɛ wa ŋkɛ 'ya te kwete hɛ. Kaganda ne, kateɗepete hɛ 'ya nde geze: Wa nya 'ya nya», a 'ya.

⁷Wa nya zlama yitea newe sawa ta nde zlape ghena mɛnɛfɛ nya ganyɛ hwa yɛ ghweme gɛ! Kwelɛŋe, zeɗe nza ba'a mbele yazlape ŋkɛ. Ma ke sha gha, gha Siyon: «Nahe Shala ta ŋa kenza kameghe.»

⁸Fama ŋwələa ka tɛŋe ŋkwa ta ŋa: gaghwe yatsa hɛ kanya kwetɛŋe, va nya nakɛ Mahwətə hɛ le ntsə ta nci kazhɛne geva kadzembe Siyon.

⁹Kwəfi nyi mbe Zhɛrəzalɛm, tsa mə gaghwe. Mahwətə kagwəfə nda ghə ke mbelia ŋkɛ, gheŋkɛ kambeɗe Zhɛrəzalɛm.

¹⁰Kwa ntsə pɛtɛa hwelefefi ne, nahe Mahwətə kencɛte berete ta ŋkɛ nya keveyi geva tekeleke, Hwa'a te mendɛkwe ta hɛɗi lema ne, katenewe mbeli tsema tsema mbele ɓəmə Shala ta ɓəmə.

¹¹Slə mə, slə mə, Shave mə mbe. Kwaɗema wəsə nya wale wale yɛ ma. Shave mə mbe Babilone, pɛmte mə ghəa ŋayɛ wɛŋe, gheyɛ nyi kefə wəshi nyi keveyi geva kezha slene ta Mahwətə.

¹²Shavema yɛ mbe le hwɛ ma, sləma yɛ mbe le ghazlənə ma. Kwa nza ŋkɛ ne, Mahwətə nde tenza te kema ta ŋayɛ, Shala ta Israyɛl nde tenza kwa sebe ta ŋayɛ.

¹³Ma ke Shala: «Katejive nde mene slene ta ɗa te kema, kateŋ'we kwele ŋkɛ, katenza zləvə te ba'a katenza ŋkɛ te ŋkwa ganyɛ.

¹⁴Kwele kwele mbeli nyi keghazlənənji va nya nakɛ ŋkɛ hɛ, tsape tsape bezenyɛ kema ta ŋkɛ, kezhɛne ŋkɛ kanza kala wəndə ŋelɛ we.

¹⁵Tsetsenya ne, kwele kwele hwelefefi nyi ketenza heheɓake tewəmbəreke gheŋkɛ, katenza mɛa ka meghea kɛfi keŋzle ŋzle, kwa nza ŋkɛ keyipəte geva wəsə nya newe hɛ le wəsə nya gezete nda mbeli ke hɛ we, tekeleke wəsə nya mare hɛ le wəsə nya fate hɛ kageze mbeli.»