Read kapsiki Ɛzayi 53 Bible Online

Ɛzayi 53 - kapsiki bible

Ɛzayi 53

¹Wa nde yɛhwe ghena mɛnɛfɛ nya fate nya gheɓəmə kageze mbeli wa? Wa nde ɗepete berete ta Mahwətə wa?

²Kwa kema ta ŋkɛ ne, nahe nde mene slene kekele kala wəsə kwatepese, kala slərə nya keshave mbe hɛɗi nya keghwele ghwele. Kenza ŋkɛ ganyɛke keɗema wəɗə wəɗə yitea newe ŋkɛ gheɓəmə we, wəsə shɛ te kamawe gheɓəmə we.

³Kawəndə nya ɓelama ŋkɛ mbeli ba'a nya wesle geva mbeli ve se ŋkɛ, kawəndə nya kesa gəli ba'a nya keseneve yaka se ŋkɛ. Kawəndə nya zhɛre kema mbeli ve se ŋkɛ. Kaganda ne, kaɓela ŋkɛ gheɓəmə we, kawəndə nya ɗema zləvə te ve ŋkɛ gheɓəmə.

⁴Ndagwara gəli nyi te gheɓəmə yakelehwe ŋkɛ, yaka nyi te gheɓəmə yazereghehwe ŋkɛ. Ma ke gheɓəmə sha zəzə kwalɛ ŋa ɓəmə: Shala nde vate ndiremi nya wəba, nde ɗate ŋkɛ ba'a nde kelemte zləvə te.

⁵Ama tewəmbəreke yɛ fama ghena ta ɓəmə mpahwemte ŋkɛ mbeli, tewəmbəreke yɛ jaɗafa ta ɓəmə sahwe nda yaka mbeli. Ɗa nya keve ɓəmə kwelɛŋe nde dzeghənyɛ, laka yɛ zhia ŋkɛ kemave mbe gheɓəmə.

⁶Kala timɛti nyi kendeŋenji se gheɓəmə, yayata wəndə kese kakele ŋa ŋkɛ hweŋkwa. Ama nahe Mahwətə keveyi fete ta pɛtɛa ɓəmə kwa ghəa ŋkɛ.

⁷Ma kwa sa nda yaka mbeli ne, kese ŋkɛ kazhɛne ghə we, kese ŋkɛ kaghwene mɛ we. Kala zhɛgwəa təmə nya ŋka mbeli kadzete ŋkwa kehene wəshi, kala təmə kwa kema ta ka tsehe shinti te ne, nahe ŋkɛ kenzanyɛ divə.

⁸Pa mbeli keseve ŋkɛ, ndeke nda fete ba'a peslekɛ ŋkɛ. Ama wa nde se kazele zeweve ta ghena shɛ hwa ka mandalahɛnyɛ wa? Nahe mbeli kekelemte ŋkɛ hwa mbeli nyi teghweme, nahe mbeli kepeslekɛ ŋkɛ tewəmbəreke fama ghena ta hwelefe ta ŋkɛ.

⁹Nahe mbeli kelamte ŋkɛ hwa ka 'yaghwa mehele, nahe kwele ta ŋkɛ kenza hwa ka mcɛləa kɛfi. Ndagwara berete shɛ kemenete ŋkɛ te wəndə we, kegha ŋkɛ kamenete mbəɗəkwə we.

¹⁰Ama nahe Mahwətə keɗehwe kasa yaka ŋkɛ. Nahe ŋkɛ kezhɛneyi wəndə nya kezamte mpia ŋkɛ te ŋkwa kweci mbeli te ŋkwa ŋkɛ. Katenza hwelefe yitea nde mene slene ta ŋkɛ ba'a katetemə ŋkɛ kwele kwele teghweme. Gheŋkɛ nde tetereke ɗe ta Mahwətə.

¹¹Tewəmbəreke yaka nyi sahwe ŋkɛ ne, katenewe waŋe ŋkɛ, katebehe ŋkɛ va zeɗe nza. Ma nde mene slene ta ɗa nya kawəndə nya tiɗiɗi ne, kateve nda nza tiɗiɗi ŋkɛ ke mbeli kwele kwele, va nya veyi yɛ jaɗafa ta nci ŋkɛ kwa ghəa ŋkɛ.

¹²Vatse nda teve ŋkɛ 'ya hwa mbelia jama, katenehe wəshi nyi fəke ka ghema ŋkɛ le mbeli nyi berete berete. Kwa nza ŋkɛ ne, nahe ŋkɛ kepelave nda ghəa ŋkɛ ke mte, ba'a nahe ŋkɛ keɓelahwe geva hwa ka mpə ŋkwa. Kaganda ne, nahe ŋkɛ kevaghe jaɗafa ta mbeli kwele kwele ba'a nahe ŋkɛ kesate te ŋkwa kezha ka beze ghena.