Read kapsiki Ɛzayi 55 Bible Online

Ɛzayi 55 - kapsiki bible

Ɛzayi 55

¹Yawa, gheyɛ pɛtɛ nyi zhɛ ŋayɛ ndere, se mə kadzemɛa yɛmə. Ya cɛdɛ ɗema va gheyɛ ne, se mə. Kele mə wəsə kezeme gəmə, tɛ keɗema ŋ'wa gəmə.

²Yitea wa bete cɛdɛ ta ŋayɛ yɛ te wəsə nya keɗema kawəsə kezeme wa? Yitea wa leɓe ghəa ŋayɛ yɛ yitea wəsə nya keɗema kabehekɛ ŋkwa wa? Fa mə ghena ta ɗa megela, ma tsagha, katezeme wəsə kezeme ganyɛ yɛ, katezlama yɛ yitea wəshi kezeme nyi zeɗe zeɗe.

³Ghwene mə sleme ta ŋayɛ, se mə sha 'ya, fa mə ghena ta ɗa yitea nza yɛ teghweme. Katemene jikə geva nya kaghala ghala 'ya le gheyɛ, kaganda temene ŋayɛ wəshi ganji nyi meɗeyi nda 'ya ke David 'ya.

⁴Nahe 'ya keveyi ŋkɛ kande negha fete kezha hwelefefi, kawəndə nya te ghə nya kesleke mbeli.

⁵Israyɛl, kateheka hwelefe nya ɗepema na na, katehwɛ hwelefe nya keɗepema ŋa kase sha gha tewəmbəreke nya nza Mahwətə kaShala ta ŋa, tewəmbəreke Shala nya kaganda ta Israyɛl nya kendeke ŋa zləvə.

⁶Zele mə Mahwətə te və nya nza mbeli kasləyi ŋkɛ, Səkwə mə ŋkɛ te və nya nza ŋkɛ dekwe yitea gheyɛ.

⁷Sərəakɛ dzeghwa ta ŋkɛ nde 'yaghwa mehele, sərəakɛ zəzə kwa ndiremia ŋkɛ nde ndiremia mehele. Zhɛre geva ŋkɛ kase sha Mahwətə nya ketezhɛ heli yite, sha Shala ta ɓəmə nya kekele ghena kwele kwele seyi te wənə.

⁸Ma ke Mahwətə: «Kenza yɛ zəzə ta ɗa kazəzə ta ŋayɛ we, kenza yɛ dzeghwa ta ɗa kadzeghwa ta ŋayɛ we.

⁹Kala ŋkwa nya kwelɛ yɛ ghweme le hɛɗi ne, tsagha ŋkwa kwelɛ yɛ dzeghwa ta ɗa le yɛ dzeghwa ta ŋayɛ, yɛ zəzə ta ɗa le yɛ zəzə ta ŋayɛ.

¹⁰Sawa pelɛ ghweme me va ba'a kwacakelɛ, ama kazhɛne geva hɛ kadzeme kaɗema keleɓekɛ hɛɗi, kaɗema kedəɗəməte hɛɗi ba'a kaɗema kepesete ya ta wəshi we. Tagha gɛ, kateve nda felehwe ta wəshi ba'a wəsə kezeme hɛ ke mbeli.

¹¹Tsagha mene geva ŋkɛ le ghena nya kesame kwa mɛa ɗa: kazhɛne geva ŋkɛ kase sha 'ya pala pala, kaɗema kemenete ɗe ta ɗa ba'a keterekete wəsə nya ghwenakɛ 'ya yite we.»

¹²Kaganda ne, kateshave yɛ mbe Babilone le zlama, katedzete hɛɗia ŋayɛ yɛ mbe kwelɛŋe. Kwa kema ta ŋayɛ ne, katetsa gaghwe yɛ ghweme ba'a yɛ wəmbə. Katempi dzeve pɛtɛa wəfe nyi hwa gamba.

¹³Katepese vɛ te ŋkwa yɛ tigə, katepese sewahe te ŋkwa yɛ ndəŋwə. Katemene geva pɛtɛa wəshia shɛhɛ kazləvəa Mahwətə, kawəsə kencɛ wəsə nya kaghala ghala nya kaɗema kazamte geva.