Read kapsiki Ɛzayi 63 Bible Online

Ɛzayi 63 - kapsiki bible

Ɛzayi 63

¹Wa wəndə nya kese nya mbe Ɛdom, mbe Bosra, le lekwesa nyi jave jave le yirə kwa ghɛmɛ wa? Ghwəpə mbe karalame ganyɛ ne, kadzeghwa ŋkɛ le kema yitea ghweme ba'a kafege ŋkɛ le berete ta ŋkɛ. Ma ke Shala: «'Ya ŋkɛ, 'ya nde geze ghena tiɗiɗi, 'ya yanza berete kembele ŋkwa ve.»

²Va wa nza yirə kwa ghɛmɛ te karalamea ŋa ba'a nza yɛ lekwesa ta ŋa jave jave kala wəndə nya kese kaŋkeɗe rɛzɛŋe wa?

³Kaganda ne, kwetɛŋe ɗa se 'ya kaŋkeɗe rɛzɛŋe kwa ŋkwa keŋkeɗe ŋkɛ, wəndə shɛ hwa hwelefefi kese le 'ya we. Tagha gɛ, pa 'ya ŋkeɗemte hɛ le wənə le wənə, pa 'ya mpaslɛmte hɛ va beze ta wənəa ɗa. Pa mimia nci ŋkisəate geva te yɛ lekwesa ta ɗa, pa 'ya jave javemte pɛtɛa yɛ lekwesa ta ɗa.

⁴Kwa wənəa ɗa ne, nahe 'ya ketarete wa dewa ta ɗa, nahe və kembele mbelia ɗa kese.

⁵Ma newe 'ya sha ŋkwa ne, nde kemane ɗa shɛ we. Kwetɛ kwetɛŋe mehele ta ɗa tazenyɛ va nya ɗema nde kemane ɗa shɛ. Tagha gɛ, pa 'ya tarete sate te ŋkwa le ghəa ɗa, hwepe wənəa ɗa nde mtsehete ɗa berete.

⁶Pa 'ya ŋkeɗemte mbeli le wənə le wənə, pa 'ya ghwəyimte hɛ mbe hwepe ta wənəa ɗa ba'a pa 'ya shekeyi mimia nci te hɛɗi.

⁷'Ya katezəzə wəshi ganjia Mahwətə ba'a tsahe nyi keve zləvə te Mahwətə: pɛtɛa wəshi nyi menete ɓəmə Mahwətə, wəba ta ganyɛa ŋkɛ laka ka Israyɛl, pɛtɛa wəshi nyi menete ŋkɛ laka ɗe ba'a wəshi ganjia ŋkɛ nyi kwele kwele.

⁸Ma ke sha se kageze: «Kaganda ne, nahe hɛ kenza kambelia ɗa, kaŋwale nyi keɗema kaghwete ɗa.» Nahe ŋkɛ kese kande mbele hɛ perə.

⁹Ma mbe pɛtɛa yaka ta nci ne, wəndə shɛ keghwenakɛ ŋkɛ kezha kemane hɛ we, ama gheŋkɛ le ghəa ŋkɛ nde mbelete hɛ. Ma mbe ɗe ta ŋkɛ ba'a mbe zhɛ helia ŋkɛ ne, gheŋkɛ le ghəa nde mbeɗeke hɛ. Nahe ŋkɛ kese kakese hɛ sate te ŋkwa ba'a kafə hɛ mbe pɛtɛa nza ta nci nya vəashi.

¹⁰Ama pa hɛ nzanji kaka fama ghena, pa hɛ zhɛnete nda ghə ke sefəa ŋkɛ nya keveyi geva tekeleke. Tagha gɛ, pa zhɛrenyɛ kande jaga ta nci ba'a ntake ŋkɛ le ghəa ŋkɛ kampa le hɛ.

¹¹Tagha gɛ, ma ke mbelia ŋkɛ zəzəte hɛ nyi vəashi, hɛ nyi te vəa Moyize: «Tema nde fəakame hɛ same kwa ndərə zlaɓe le ka ya wəshi keseɗa ta ŋkɛ gɛ wa? Tema Nde vame sefəa ŋkɛ nya keveyi geva tekeleke mbe hɛ gɛ wa?

¹²Ma mbe dzeghwa ne, gheŋkɛ nde se katawe Moyize le mɓəa ŋkɛ nya berete. Nahe ŋkɛ keŋate ŋkwa te yɛmə te kema ta nci kezha nza zləvəa ŋkɛ kaghala ghala.

¹³Gheŋkɛ nde fəghe hɛ jive kwelɛ yɛmə kala gədəwə nya kwamte te ɓerama kaɗema tehene ketsakɛ hɛ.

¹⁴Kala wəshi keseɗa nyi kedzawa zlərə ne tsagha fəghe hɛ sefəa Mahwətə kadzete ŋkwa kezhɛne mpi.» Tsetse beghakɛ mbelia ŋa na kezha ve nda zləvə ke ghəa ŋa.

¹⁵Sawa pelɛ ghweme ne, newe ŋkwa, sawa pelɛ ŋkwa kenza ta ŋa nya ganyɛ ba'a nya keveyi geva tekeleke ne, newe wəsə nya kemene n'yɛ geva: Tema wəba ta ɗe ta ŋa ba'a berete ta ŋa wa? Tema zhɛ helia ŋa ba'a ganyɛa ŋa laka ghen'yɛ wa?

¹⁶Ndagwara gha ya kayiteyɛa n'yɛ, kwa nza ŋkɛ ma Abraham nya kashia n'yɛ ne, keɗepe n'yɛ ŋkɛ we, keɗepete n'yɛ Israyɛl perə we. Ama gha Mahwətə ya kayiteyɛa n'yɛ, “Nde mbele n'yɛ” ya kasləa ŋa se vəashi.

¹⁷Mahwətə, va wa sərəakɛ n'yɛ na kandeŋe cakeɗake yitea hweŋkwa ta ŋa, zhɛrete mehele ta n'yɛ na ntɛaŋe ntɛaŋe laka ɗema hawe va gha wa? Zhɛneke geva kezha ka mene slene ta ŋa, tewəmbəreke mbeli nyi kaŋa ŋa.

¹⁸Ma ghen'yɛ mbelia ŋa nyi keveyi geva tekeleke ne, kavə ɓɛhwɛ se hɛɗi kaŋa n'yɛ. Nahe ka ghema ta n'yɛ kekelemte zləvə te ghɛa ŋa nya keveyi geva tekeleke.

¹⁹Nahe ghen'yɛ ketemə kwele kwele kambeli nyi zhɛnema na kasleke hɛ, kambeli nyi zhɛnema sləa ŋa kanza te hɛ. Ma ya kaperawemte ghweme na ba'a ma ya kasawa na ne, nza kategaŋkəɗə yɛ ghweme kwa kema ta ŋa,