Read kapsiki Ka Lɛvi 11 Bible Online

Ka Lɛvi 11 - kapsiki bible

Ka Lɛvi 11

¹Ma ke Mahwətə sha yɛ Moyize le Aron:

²«Ma pe yɛ sha ka Israyɛl: Ma hwa wəshi keseɗa nyi te hɛɗi, wərə yɛ kazeme

³nyi nza cɛpe keperawe perawe te hɛ ba'a nyi kegwəɓə gwəzə.

⁴Ma hwa wəshi keseɗa nyi kegwəɓə gwəzə ba'a hwa nyi nza cɛpea nci keperawe perawe tsagha gɛ ne, zemema wəshi keseɗa nyi yɛ ma: zlegwemə, va nya nza nde kagwəɓə gwəzə, ama kaɗema cɛpea ŋkɛ keperawe. Wale wale nza ŋkɛ kaŋa ŋayɛ.

⁵Kese, va nya nza nde kagwəɓə gwəzə, ama kaɗema cɛpe te. Wale wale nza ŋkɛ kaŋa ŋayɛ.

⁶Vɛra, va nya nza nde kagwəɓə gwəzə, ama kaɗema cɛpe te. Wale wale nza ŋkɛ kaŋa ŋayɛ.

⁷Gərədə, va nya nza cɛpe te, ama kaɗema nde kagwəɓə gwəzə. Wale wale nza ŋkɛ kaŋa ŋayɛ.

⁸Zemema slia wəshi keseɗa shɛhɛ yɛ ma. Kwaɗema hɛ yɛ vəa ŋkwa nya mpənji hɛ ma. Newe mə hɛ kawəshi nyi wale wale.

⁹Ma hwa wəshi nyi kwa yɛmə, kwa ndərə keɗema kwa hələ ne, wərə yɛ kazeme nyi nza yɛ bazla keyiɗə ba'a jɛpəli te hɛ.

¹⁰Ama mba yɛ kezeme nyi ɗema yɛ bazla keyiɗə keɗema yɛ jɛpəli te hɛ, ya wəshi nyi ɓɛhwɛ ɓɛhwɛ nyi kwa yɛmə keɗema kweci wəshi nyi hwa yɛmə.

¹¹Nza hɛ kawəshi nyi wale wale sha gheyɛ. Zemema slia nci yɛ ba'a kwaɗema hɛ yɛ kempə hɛ ma.

¹²Mba yɛ kezeme wəshi nyi mbe yɛmə nyi ɗema yɛ bazla keyiɗə keɗema jɛpəli te hɛ.

¹³Ma hwa yɛ 'yɛ ne, wa nyi 'yɛ nyi hi yɛ kanewe ka'yɛ nyi wale wale nyi: zele, zleŋa kwa livə, damba tsaraka,

¹⁴he kwə, kweci mama ta yɛ zleŋa,

¹⁵mama ta yɛ ghame,

¹⁶zhenɛgə, təwəvəŋə ghweme, yiɗə yɛmə, mama ta yɛ mazavɛ,

¹⁷təwəvəŋə wəfe, kanare gamba, tewəvəŋə gamba,

¹⁸təwəvəŋə kwa tɛawetɛa, ghagha, zleŋa,

¹⁹kwaghela, mama ta nteɗe ŋwələ, wəsəa kwadzakwə ba'a mezlekwe zlekwe.

²⁰Newe mə wəshi nyi ɓɛhwɛ ɓɛhwɛ nyi nza bidzə ba'a seɗa yite kawəshi nyi wale wale.

²¹Ama wərə yɛ kazeme nyi nza seɗa yite kezha mpereke te hɛɗi,

²²geze ta ŋkɛ, mama ta yɛ hegi ba'a yɛ dzale.

²³Ama pɛtɛa kweci wəshi nyi ɓɛhwɛ ɓɛhwɛ nyi nza bidzə ba'a seɗa wəfaɗe yite ne, newe mə hɛ kawəshi nyi wale wale.

²⁴Ma kekwaɗakɛ kweci wəshi keseɗa wəndə ne, wale wale zhɛre ŋkɛ. Ma yayata wəndə nya kekwaɗakɛ wəsə kwa mte mte ta nci ne, wale wale nza ŋkɛ pa va tɛhwɛɗi.

²⁵Ma yayata wəndə nya kekelete wəsə kwa mte mte ta nci ne, katetsewe yɛ lekwesa ta ŋkɛ ŋkɛ. Wale wale nza ŋkɛ pa va tɛhwɛɗi.

²⁶Ma yayata wəsə keseɗa nya nza cɛpea ŋkɛ keperawe perawe, ama kaɗema nde kagwəɓə gwəzə ne, wale wale nza nde sha gheyɛ. Ma yayata wəndə nya kekwaɗakɛ ŋkɛ ne, wale wale nza ŋkɛ.

²⁷Ma wəshi keseɗa pɛtɛ nyi nza seɗa wəfaɗe yite, nyi ɗema cɛpe te hɛ ne, wale wale nza hɛ sha gheyɛ. Ma yayata wəndə nya kekwaɗakɛ hɛ kempə hɛ ne, wale wale nza ŋkɛ pa va tɛhwɛɗi.

²⁸Ma yayata wəndə nya kekelete wəsə kwa mte mte ta nci ne, katetsewe yɛ lekwesa ta ŋkɛ ŋkɛ ba'a wale wale nza ŋkɛ pa va tɛhwɛɗi. Kwa nza ŋkɛ ne, wale wale hɛ sha gheyɛ.

²⁹Ma hwa wəba ta wəshi keseɗa nyi ɓɛhwɛ ɓɛhwɛ nyi kentsehe geva dzate te hɛɗi, wa nyi wəshi nyi wale wale nyi: vələ hɛɗi, kwə, mama ta yɛ letse,

³⁰yɛ hwərə hwərə gela, yɛ kwashenewəfe, yɛ ghwazha, yɛ letse kwa yɛmə ba'a yɛ hweŋe.

³¹Nyi ya kawəshi keseɗa nyi wale wale sha gheyɛ. Ma yayata wəndə nya kekwaɗakɛ hɛ kempə hɛ ne, wale wale nza ŋkɛ pa va tɛhwɛɗi.

³²Ma kemtenyɛ ba'a keteɗenyɛ kwete hwa hɛ te wəsə: kwalekwə, lekwesa, hweta, slibə keɗema yayata wəsə kemene slene ne, pa mbeli yaɓemte wəsəa shɛ. Wale wale nza ŋkɛ pa va tɛhwɛɗi, ma kwa sebe ta ŋkɛ ne, kazhɛne ŋkɛ kanza wɛŋe.

³³Ma keteɗe kwete hwa wəshia shɛhɛ kadzawa wəsə nya ŋate mbeli le rekɛ ne, wale wale nza wəshi nyi kwa pɛtɛ. Kwa sebe ta ŋkɛ, pa mbeli mpəmte wəsəa shɛ.

³⁴Ma keshekeyi yɛmə nya kese kwa mbeli te wəsə kezeme ne, wale wale tezhɛre wəsə kezemea shɛ. Ya gheŋkɛ nza kawəsə kesa ne, wale walea shɛ zhɛre ŋkɛ, ya tsema tsema wəsə nya nza ŋkɛ kwa.

³⁵Ma yayata wəsə nya teɗe kwete hwa wəshi keseɗa nyi kempə mpəa shɛhɛ te ne, wale wale zhɛre ŋkɛ. Ma kenza ŋkɛ kadəghwə keɗema kareghwetɛ ne, pa mbeli mpəmte, kwa nza ŋkɛ ne, kawəshi nyi wale wale hi yɛ kanewe hɛ.

³⁶Ama keteɗe wəsə kwa mte mte kadzawa ghwa keɗema belageji ne, wɛŋe nza yɛmə. Ama wale wale zhɛre wəndə nya kekelakame wəsə kwa mte mtea shɛ.

³⁷Ma keteɗe wəsə kwa mte mte te felehwe ta wəshi ketsawe ne, wɛŋe nza felehwe ta wəshia shɛhɛ.

³⁸Ama keteɗe ŋkɛ te wəshi nyi beteyi mbeli hwa yɛmə kezha ta ne, wale wale zhɛre hɛ.

³⁹Ma kemtenyɛ wəsə keseɗa nya zeme mbeli ne, wale wale nza yayata wəndə nya kekwaɗakɛ wəsə kwa mte mtea shɛ pa va tɛhwɛɗi.

⁴⁰Ma wəndə nya kezehwe slia wəsə kwa mte mtea shɛ ne, katetsewe lekwesa ta ŋkɛ ŋkɛ, ama wale wale nza ŋkɛ pa va tɛhwɛɗi. Ma wəndə nya kekelete wəsə kwa mte mtea shɛ ne, katetsewe lekwesa ta ŋkɛ ŋkɛ, ama wale wale nza ŋkɛ pa va tɛhwɛɗi perə.

⁴¹Ma wəshi keseɗa pɛtɛ nyi ɓɛhwɛ ɓɛhwɛ nyi kentsehe geva dzate te hɛɗi ne, zemema hɛ yɛ ma.

⁴²Zemema wəshi nyi kentsehe geva dzate te hɛɗi, nyi kedzeghwa le hwə te hɛɗi, ya nyi kedzeghwa te seɗa wəfaɗe keɗema kwele ma ke wəfaɗe yɛ ma.

⁴³Mba yɛ kezhɛre ghəa ŋayɛ kambeli nyi wale wale laka kwaɗe wəshia shɛhɛ. Pelema ghəa ŋayɛ yɛ kakwaɗe ŋayɛ hɛ ma, va nya nza ŋkɛ ne, wale wale tezhɛre yɛ.

⁴⁴'Ya ya kaMahwətə, Shala ta ŋayɛ. Zele mə kanza kambeli nyi keveyi geva tekeleke, kwa nza ŋkɛ ne, nahe 'ya keveyi geva tekeleke. Zhɛrema ghəa ŋayɛ yɛ wale wale laka kwaɗe wəshi nyi ɓɛhwɛ ɓɛhwɛ nyi kentsehe geva dzate te hɛɗi ma.

⁴⁵'Ya ya kaMahwətə nya kefəakave ŋayɛ shave mbe Ɛzhipte yitea nza kaShala ta ŋayɛ. Nza mə kambeli nyi keveyi geva tekeleke, kwa nza ŋkɛ ne, nahe 'ya keveyi geva tekeleke.»

⁴⁶Nyi ya kaghena nyi kegezete geva te ghəa wəshi keseɗa, yɛ 'yɛ, wəshi nyi mbe yɛmə ba'a wəshi nyi ɓɛhwɛ ɓɛhwɛ nyi kentsehe geva dzate te hɛɗi.

⁴⁷Ghena shɛhɛ ka nehe wəshi keseɗa nyi wɛŋe wɛŋe le nyi wale wale, nyi nza mbeli kazeme le nyi ɗema mbeli kazeme.