Read kapsiki Ka Lɛvi 12 Bible Online

Ka Lɛvi 12 - kapsiki bible

Ka Lɛvi 12

¹Ma ke Mahwətə sha Moyize:

²«Ma pa na sha ka Israyɛl: Ma keyake wəzege teza male ne, wale wale nza nde kahɛ mberefaŋe kala nya te və nya nza wəshi yite.

³Ma te kwa deghese ta hɛ ne, pa mbeli slamte nda mɓɛta ke wəzege.

⁴Ma kwa sebe ta ŋkɛ, pa malea shɛ menete hɛ mahekenemsə mahekeneghəmbe kapɛ ghəa nta va mimi nya kese kasawa yite. Wəsə nya keveyi geva tekeleke shɛ kakwaɗe nde we, kadzembe ŋkwa nya keveyi geva tekeleke nde hwa'a te və nya kiɗi yaɓe geva ta nta we.

⁵Ma kenza nde wəzha makwa yayake nde ne, wale wale nza nde kashikwə bake, kala nya te və nya nza wəshi yite. Kwa sebe ta ŋkɛ, pa nde menete hɛ ŋkwaŋemsə ŋkwaŋeghəmbe kapɛ ghəa nta va mimi nya kese kasawa yite.

⁶Ma vəa ŋkwa nya kiɗi vəa yaɓe geva ta nta kwa sebe ta ya ta wəzege teza keɗema wəzha makwa ne, pa nde keleke nda game nya kemenete va kwetɛŋe kezha dzeghe melɛ kwa tere tere ba'a gheɗepe keɗema ghwəɗəŋkwə kezha dzeghe melɛ keyaɓe jaɗafa ke nde dzeghe Shala mɛa ŋkwa kedzembe cɛ lekwesa kebegeme geva.

⁷Pa nde dzeghe Shala dzeghekɛ nda melɛ shɛhɛ ke Mahwətə, kwa sebe ta ŋkɛ, pa ɓelate gəsəkəa yaɓe ŋkwa kənəa malea shɛ. Ma se te vəa shɛ ne, wɛŋe nde keyaɓe yaɓe va mimi nya kese kasawa yite.» Nyi ya kaghena nyi kegezete geva te ghəa male nya keyake wəzege teza keɗema wəzha makwa.

⁸Ma kedewə berete ta male kezha kemave game ne, pa nde fəke ghwəɗəŋkwə bake keɗema gheɗepe bake. Ma kwete hwa 'yɛa shɛhɛ ne, kezha dzeghe melɛ kwa tere tere, ma kwete ne, kezha dzeghe melɛ keyaɓe jaɗafa. Ma vəa ŋkwa nya ɓelate gəsəkəa yaɓe ŋkwa nde dzeghe Shala kənəa malea shɛ ne, wɛŋe yaɓe geva nde.