Read kapsiki Ka Lɛvi 17 Bible Online

Ka Lɛvi 17 - kapsiki bible

Ka Lɛvi 17

¹Ma ke Mahwətə sha Moyize:

²«Ma pa na sha Aron, ŋwale tezhilia ŋkɛ ba'a pɛtɛa ka Israyɛl: Wa nya ghena nya geze Mahwətə nya:

³Ma keɗe nde Israyɛl kasla ghə te mca, təmə keɗema kwe mbe ghedəkwə keɗema pelɛke te wəmbəa ghedəkwə ne,

⁴pa keleke wəsə keseɗa shɛ kase kadzemɛa cɛ lekwesa kebegeme geva, kezha ve nda kawəsə gəmə ke Mahwətə, mɛa ŋkwa nya keveyi geva tekeleke. Ma kemenetema ŋkɛ tsagha ne, kateve ŋkɛ mbeli kande beze ghena va nya shekakɛ mimia wəsə nya teghweme ŋkɛ: kateŋkamte ŋkɛ mbeli shave hwa ka Israyɛl.

⁵Ma tsagha ne, katefə wəshi nyi ɗe hɛ kadzeghe melɛ le hɛ kwamte hwa gamba ka Israyɛl kase. Katefə nda hɛ hɛ kase kadzemɛa cɛ lekwesa kebegeme geva ke nde dzeghe Shala kezha dzeghe nda melɛ kejikə ghə le hɛ ke Mahwətə.

⁶Kateyisə mimia wəsə keseɗa shɛ nde dzeghe Shala te reghwetɛ nya mɛa cɛ lekwesa kebegeme geva ba'a katetere bela nyi nza merege te ŋkɛ. Zeɗehwe nda tenza n'yia ŋkɛ nya kezəŋwə megela ke Mahwətə.

⁷Ma tsagha ne, katezhɛne ka Israyɛl kadzeghe nda melɛ ke kweci shala nyi nza pa ta nci kala zhɛfa lɛmə nyi ve nda ghə hɛ we. Kawəsə mahalegə nya kaghala ghala ba'a nya keshi keshi nza ŋkɛ kaŋa nci.

⁸Ma pa na sha hɛ ɓiyitsa: Ma keɗe nde Israyɛl keɗema nde se se nya hwa hɛ kadzeghe melɛ kwa tere tere keɗema kwete melɛ ne,

⁹pa keleke wəsə keseɗa shɛ kase kadzemɛa cɛ lekwesa kebegeme geva kezha ve nda kawəsə gəmə ke Mahwətə. Ma kemenetema ŋkɛ tsagha ne, kateŋkamte geva ŋkɛ shave hwa ka Israyɛl.

¹⁰Ma kenza nde Israyɛl keɗema nde se se nya hwa hɛ kazeme mimi, ya mimia shɛ nza tsema tsema ne, kateme 'ya te wəndəa shɛ ba'a kateŋka ŋkɛ 'ya shave hwa ka Israyɛl.

¹¹Kwa nza ŋkɛ ne, mbe mimia ŋkɛ nza mpia yayata wəsə. Ma nda pelave ŋayɛ hweŋkwa 'ya kamene mimi te reghwetɛ ne, kezha yaɓemte geva jaɗafa ta ŋayɛ. Kwa nza ŋkɛ ma nda kelemte jaɗafa mimi ne, va nya nza mpi mbe.

¹²Vatse gɛ ne, ma 'ya sha ka Israyɛl: ‹Wəndə shɛ hwa gheyɛ katezeme mimi we, nde se se shɛ hwa gheyɛ katezeme perə we.›

¹³Ma kekeseve wəsə keseɗa keɗema 'yɛ nya zeme mbeli nde Israyɛl keɗema nde se se nya hwa ka Israyɛl kwamte pəli ne, katetiɗi mimia ŋkɛ ŋkɛ te hɛɗi ba'a katefə hɛɗi ŋkɛ kadzeghə.

¹⁴Kwa nza ŋkɛ ma mba wəsə teghweme ne, mbe mimia ŋkɛ mpia ŋkɛ. Vatse gɛ ne, ma 'ya sha ka Israyɛl: ‹Zemema mimia yayata wəsə yɛ ma, kwa nza ŋkɛ ne, mbe mimia ŋkɛ mpia yayata wəsə. Ma wəndə nya kezehwe ne, kateŋkamte geva ŋkɛ.›

¹⁵Ma kezehwe slia wəsə keseɗa kwa mte mte keɗema nya peslekɛ wəsə keseɗa nya hwa gamba nde Israyɛl keɗema nde se se nya hwa ka Israyɛl ne, katetsewe yɛ lekwesa ta ŋkɛ ŋkɛ ba'a katepɛ ŋkɛ. Wale wale nza ŋkɛ pa va tɛhwɛɗi. Kwa sebe ta ŋkɛ ne, katenza ŋkɛ wɛŋe.

¹⁶Ma keɗema ŋkɛ ketsewemte yɛ lekwesa ta ŋkɛ ba'a kepɛkɛ pɛ ne, kwa ghəa ŋkɛ tenza fete ta ŋkɛ.»