Read kapsiki Ka Lɛvi 18 Bible Online

Ka Lɛvi 18 - kapsiki bible

Ka Lɛvi 18

¹Ma ke Mahwətə sha Moyize:

²«Ma pa na sha ka Israyɛl: 'Ya ya kaMahwətə Shala ta ŋayɛ!

³Menema wəshi nyi mene mbeli kwa Ɛzhipte nya se yɛ kwa le nza yɛ ma. Menema wəshi nyi kemene geva te hɛɗia Kanan, nya tefə ŋayɛ 'ya kadzete yɛ ma. Hawema yɛ va wəshi mahalegəa nci ma.

⁴Mene mə slene le ghena nyi gezete 'ya ba'a ya mə wəshi mahalegəa ɗa megela, kwa nza ŋkɛ ne, 'ya ya kaMahwətə Shala ta ŋayɛ.

⁵Ya mə wəshi mahalegəa ɗa ba'a wəshi nyi gezete 'ya. Ma wəndə nya kemene slene le hɛ ne, teghweme tenza ŋkɛ laka hɛ. 'Ya ya kaMahwətə.

⁶Hweŋkwa shɛ va nde Israyɛl kaɓelahe le male nya kamenənyɛ we. 'Ya ya kaMahwətə.

⁷Kelemtema zləvə na te yiteyɛ ŋa laka ɓelahe le meyɛ ŋa ma. Nahe na kekelemte zləvə te, va nya nza nde kameyɛ ŋa perə.

⁸Ɓelahema na le male ta yiteyɛ ŋa ma. Zləvə yakelemte na te yiteyɛ ŋa tsagha.

⁹Ɓelahema na le wəzha ta yiteyɛ ŋa keɗema wəzha ta meyɛ ŋa, ya ghenta kele ki ghɛ keɗema ki kwete ghɛ ma.

¹⁰Ɓelahema na le wəzha ta wəzege ta ŋa keɗema ŋa wəzha ta ŋa ma. Zləvə yakelemte na te ghəa ŋa.

¹¹Ɓelahema na le wəzha ta male ta yiteyɛ ŋa ma. Sawa mbe yiteyɛ ŋa sawa nde, wəzha ta yiteyɛ ŋa nde.

¹²Ɓelahema na le wəzha ta meghekɛa yiteyɛ ŋa ma, kwa nza ŋkɛ ne, mimi nya kwetɛŋe nde le yiteyɛ ŋa.

¹³Ɓelahema na le wəzha ta meghekɛa meyɛ ŋa ma, kwa nza ŋkɛ ne, mimi nya kwetɛŋe nde le meyɛ ŋa.

¹⁴Kelemtema zləvə na te wəza yitenyɛa yiteyɛ ŋa laka ɓelahe le male ta ŋkɛ ma, kwa nza ŋkɛ ne, meyɛ ŋa nde.

¹⁵Ɓelahema na le makwa ta ŋa ma. Ma va nya nza nde kamale ta wəzege ta ŋa ne, ɓelahema na le ma.

¹⁶Ɓelahema le male ta wəza meyɛ ŋa ma. Zləvə yakele na seyi te wəza meyɛ ŋa.

¹⁷Ɓelahema na le male ba'a le wəzha ta nta, le wəzha ta wəzege ta nta keɗema wəzha ta wəzha ta nta ma. Kwa nza ŋkɛ ne, mimi nya kwetɛŋe nde le hɛ ba'a wəsə hawe nya wəba nde.

¹⁸Wəmema wəzha ta meghekɛa male ta ŋa na, mba male ta ŋa teghweme ma. Katekele zlɛ ŋkɛ kase.

¹⁹Ɓelahema na le male vəa ŋkwa nya nza wəshi yite ma, kwa nza ŋkɛ ne, wale wale nde.

²⁰Ɓelahema na le male ta menə ŋa ma, kwa nza ŋkɛ ne, kawəndə nya wale wale zhɛre ŋa ŋkɛ.

²¹Dzeghe nda ma melɛ na le kwete hwa ŋwalea ŋa ke Molɛk ma. Kelemtema zləvə na te sləa Shala ta ŋa ma. 'Ya ya kaMahwətə.

²²Ɓelahema na le za kala nya ɓelahe mbeli le male ma. Wəsə nya shɛma mbeli geze kashasha ŋkɛ.

²³Valema wəsə keseɗa na ma, kwa nza ŋkɛ ne, wale wale zhɛre ŋa ŋkɛ. Tsagha shɛ ne, valema male le wəsə keseɗa ma, wəsə kwa ndiremi nya kashasha ŋkɛ.

²⁴Zhɛrema ghəa ŋayɛ yɛ kaka wale wale laka mene kwete hwa wəshi nyi kala nyi ma. Ma kweci hwelefefi nyi ŋkamte nyi 'ya te kema ta ŋayɛ ne, nahe hɛ kezhɛrenji wale wale laka mene wəshia shɛhɛ.

²⁵Nahe hɛɗia shɛ le ghəa ŋkɛ kezhɛrenyɛ wale wale va wəshia shɛhɛ, vatse vate ɗa 'ya te. Tagha gɛ, pa betemte mbeli nyi te.

²⁶Ma kaŋa ŋayɛ, gheyɛ ka Israyɛl ba'a ka se se nyi hwa gheyɛ ne, hawe mə wəshi mahalegəa ɗa ba'a wəshi nyi gezete 'ya. Menema kwete yɛ hwa wəshi nyi ndiremi ndiremi kashasha shɛhɛ ma.

²⁷Ma mbeli nyi kese te hɛɗia shɛ mpelɛa ma ke gheyɛ ne, nahe hɛ kese kamene pɛtɛa wəshia shɛhɛ, vatse zhɛrenyɛ hɛɗia shɛ wale wale.

²⁸Zhɛrema ŋkɛ yɛ wale wale zhɛkwa ma. Ma tsagha ne, katebete ŋayɛ ŋkɛ kala nya betakɛ mbeli nyi kese ŋkɛ te mpelɛa ma ke gheyɛ ŋkɛ we.

²⁹Ma yayata wəndə nya kemene kwete hwa wəshi nyi ndiremi ndiremi kashasha shɛhɛ ne, kateŋkamte geva ŋkɛ shave hwa ka Israyɛl.

³⁰Hawe mə va ghena nyi gezave ŋayɛ 'ya. Menema wəshi nyi ndiremi ndiremi kashasha nyi mene nyi mbeli nda tese yɛ yɛ ma. Zhɛrema ghəa ŋayɛ yɛ kaka wale wale laka wəshia shɛhɛ ma. 'Ya ya kaMahwətə Shala ta ŋayɛ.»