Read kapsiki Ka Lɛvi 2 Bible Online

Ka Lɛvi 2 - kapsiki bible

Ka Lɛvi 2

¹Ma keɗe wəndə kakele nda wəsə gəməa wəshi nyi kese te wəve kase ke Mahwətə ne, hə yakele ŋkɛ kase, kategə n'yi ŋkɛ yite ba'a kateve 'wərdə kwa hə hə ŋkɛ yite.

²Katekele nda ŋkɛ ke ka dzeghe Shala nyi kaŋwale tezhilia Aron. Katenta hə kwa hwaɗe hwaɗe le n'yi kwete wəndəa ka dzeghe Shala tsəɗəɗə te dzeve ba'a katekele pɛtɛa 'wərdə kwa hə hə ŋkɛ. Kwa sebe ta ŋkɛ, katetere wəsə gəmə nya heka mbeli “kawəsə kezəzə” nde dzeghe Shala te reghwetɛ. Kawəsə gəmə nya keteremte geva ŋkɛ, zeɗehwe nda nza n'yia ŋkɛ nya kezəŋwə megela ke Mahwətə.

³Ma wəsə nya ketene ne, kaŋa yɛ Aron le ŋwalea ŋkɛ nza ŋkɛ. Kabela nya keveyi geva tekeleke kaŋa Mahwətə ŋkɛ, va nya se ŋkɛ mbe wəsə gəmə nya keteremte nda geva.

⁴Ma kenza na kakele wəshi nyi kese te wəve nya keta ta te ghwə kase ne, kaɗafa kwalekwala nya ɗema tenjɛne hwe tenza ŋkɛ. Tsagha gɛ, gatewe nyi le n'yi keɗema ɗafa kwalekwala nya yisəaghe n'yi mbeli kənə kaɗema tenjɛne hwe yakele mbeli kase.

⁵Ma kenza ŋkɛ kawəsə nya kese te wəve nya keserekɛ geva te kələ ne, kahə kwa hwaɗe hwaɗe le n'yi, kaɗema tenjɛne hwe tenza ŋkɛ.

⁶Pa wəndə nya kekeleke wəsəa shɛ ncɛncɛhweve mbe ba'a zhɛne kashekaghe n'yi kənə. Kawəsə nya kese te wəve nza ŋkɛ.

⁷Ma kenza ŋkɛ kawəsə gəməa wəshi nyi kese te wəve nya keserekɛ geva te kələ ne, le hə nya kehwaɗe hwaɗe le n'yi tenza ŋkɛ.

⁸Pa mbeli keleke nda wəsə gəməa wəshi nyi kese te wəve nya keserekɛ nda geva kala nya ke Mahwətə, pa mbeli ndeke nda ke nde dzeghe Shala nya kehende nda ŋkɛ ke reghwetɛ.

⁹Pa nde dzeghe Shala ntamte nya heka mbeli “kawəsə kezəzə” kezha tere te reghwetɛ. Kawəsə gəməa wəshi nyi kese te wəve kwa tere tere nza ŋkɛ, zeɗehwe nda tenza n'yia ŋkɛ nya kezəŋwə megela ke Mahwətə.

¹⁰Ma wəsə gəmə nya ketene ne, kaŋa yɛ Aron le ŋwalea tenza ŋkɛ. Kabela nya keveyi nda geva tekeleke ke Mahwətə nza ŋkɛ, va nya se ŋkɛ mbe wəsə gəmə nya keteremte nda geva.

¹¹Wəsə gəmə nya ketakɛ geva le tenjɛne shɛ kave nda yɛ ke Mahwətə we. Kwa nza ŋkɛ ne, wəsə gəmə nya nza tenjɛne keɗema mze hwe shɛ katere nda mbeli ke Mahwətə we.

¹²Wərə yɛ kafə nda hɛ ke Mahwətə kawəsə gəməa tsəməa wəshi nyi kese te wəve. Ama katere hɛ mbeli te reghwetɛ kawəsə gəmə nya kezəŋwə megela we.

¹³Katenta ghwene na yitea yayata wəsə gəməa wəshi nyi kese te wəve nya kele na kase. Mba na kezaghəyite nta ghwene ta jikə geva ta Shala ta ŋa yitea wəsə gəməa ŋa. Katenta ghwene na yitea yayata wəsəa ŋa.

¹⁴Ma vəa ŋkwa nya tefə nda tsəməa wəshia ŋayɛ nyi kese te wəve yɛ kawəsə gəmə ke Mahwətə ne, kategha yɛ le ghəa ha kwa pesa pesa ba'a katehə hə yɛ. Ma vəa ŋkwa nya kele yɛ kase ne,

¹⁵katesheke n'yi yɛ hwe ba'a kateve 'wərdə kwa hə hə yɛ kənə. Gheŋkɛ nde tenza kawəsə gəməa wəshi nyi kese te wəve.

¹⁶Katetere bela nya “kawəsə kezəzə” nde dzeghe Shala, geze ta ŋkɛ, kwete bela ta hə ba'a n'yi le 'wərdə kwa hə hə pɛtɛ. Gheŋkɛ ya kawəsə nya keteremte geva kaŋa Mahwətə.