Read kapsiki Ka Lɛvi 20 Bible Online

Ka Lɛvi 20 - kapsiki bible

Ka Lɛvi 20

¹Ma ke Mahwətə sha Moyize:

²«Ma pa na sha ka Israyɛl: Ma yayata nde Israyɛl keɗema nde se se nya hwa hɛ nya kedzeghe nda melɛ le kwete hwa ŋwalea ŋkɛ ke Molɛk ne, katepesle ŋkɛ mbeli. Katebeze ŋkɛ mbeli nyi te hɛɗi le pelɛ.

³'Ya le ghəa ɗa ne, kateve ɗa 'ya te wəndəa shɛ. Kateŋkamte ŋkɛ 'ya shave mbe hwelefe ta ŋkɛ, va nya dzeghekɛ nda melɛ ŋkɛ le kwete hwa ŋwalea ŋkɛ ke Molɛk, wəsə nya kezhɛrete ŋkwa nya keveyi ɗa geva tekeleke wale wale ba'a nya kekelemte zləvə te sləa ɗa nya keveyi geva tekeleke.

⁴Ma keŋzlete ntsə mbeli nyi te hɛɗi te wəsə nya kala nya kezha ɗema kapesle wəndəa shɛ ne,

⁵kateme 'ya le ghəa ɗa te wəndəa shɛ ba'a te mbeli nyi ki ghɛa ŋkɛ. Kateŋkamte hɛ 'ya shave mbe hwelefe ta nci, gheŋkɛ le pɛtɛa mbeli nyi keve zləvə te Molɛk.

⁶Ma wəndə nya kedzawa weta ba'a nya kelə sha ka gepe ŋkwa ne, kwete nyagha mama ta hawe va kweci shala. Vatse gɛ ne, kateme 'ya kənəa wəndəa shɛ ba'a kateŋka ŋkɛ 'ya shave mbe hwelefe ta ŋkɛ.

⁷Nza mə kambeli nyi keveyi geva tekeleke, kwa nza ŋkɛ ne, 'ya ya kaMahwətə Shala ta ŋayɛ.

⁸Hawe mə va wəshi mahalegəa ɗa ba'a mene mə slene le hɛ. 'Ya ya kaMahwətə nya keveyi ŋayɛ kambeli nyi tekeleke.

⁹Ma wəndə nya keŋele yitenyɛ keɗema meghekɛ ne, nahe ŋkɛ kehi kapesle ŋkɛ mbeli. Kwa ghəa ŋkɛ nza mte ta ŋkɛ, va nya ŋelekɛ yɛ yitenyɛ le meghekɛ ŋkɛ.

¹⁰Ma kemenete vale tahe wəndə le male ta kwete hwa ka menəhɛnyɛ ne, katempə mbeli nyi kemenete fetea shɛ mbeli bake nci.

¹¹Ma keɓelahehwe ɓelahe wəndə le kwete hwa mia yitenyɛ ne, nahe ŋkɛ kekelemte zləvə te yitenyɛ. Katempə mbeli nyi kemenete fetea shɛ mbeli bake nci. Kwa ghəa nci nza mte ta nci.

¹²Ma keɓelahehwe ɓelahe wəndə le makwa ta ŋkɛ ne, katempə mbeli nyi kemenete fetea shɛ mbeli bake nci, va nya menete wəsə nya keɗema kehi hɛ. Kwa ghəa nci tenza mte ta nci.

¹³Ma kenza wəndə kaɓelahe le kwete wəndə kala nya ɓelahe mbeli le male ne, wəsə nya shɛma mbeli geze kashasha yamenete hɛ. Katempə hɛ mbeli bake nci ba'a kwa ghəa nci tenza mte ta nci.

¹⁴Ma kewəmeve yɛ wəzha makwa le meghekɛ wəndə kami ne, wəsə nya kehitema geva ŋkɛ. Katetere yɛ wəndəa shɛ le mi nyi bake nyi mbeli le ghwə. Ma tsagha ne, katenza wəsə nya keɗema kehi hwa gheyɛ we.

¹⁵Ma kenza wəndə kavale wəsə keseɗa ne, katepesle ŋkɛ mbeli ba'a katepesle wəsə keseɗa shɛ mbeli.

¹⁶Ma kenza male kavale le wəsə keseɗa ne, katepesle malea shɛ ba'a wəsə keseɗa shɛ mbeli. Katempə hɛ mbeli ba'a kwa ghəa nci tenza mte ta nci.

¹⁷Ma kewəmeve wəzha ta yitenyɛ keɗema wəzha ta meghekɛ wəndə, keɓelahehwe ɓelahe ŋkɛ le ne, wəsə hawe ŋkɛ. Kateŋkamte geva hɛ kwa ntsə ta hwelefe ta nci. Ma va nya ɓelahehwe ɓelahe ŋkɛ le wəzha ta yitenyɛ keɗema le wəzha ta meghekɛ ne, kwa ghəa ŋkɛ tenza fete ta ŋkɛ.

¹⁸Ma keɓelahehwe ɓelahe wəndə le male nya nza wəshi yite ne, kateŋka hɛ mbeli bake nci shave mbe hwelefe ta nci, va nya ɓelahehwe ɓelahe hɛ vəa ŋkwa nya nza mimi yitea malea shɛ.

¹⁹Ɓelahema yɛ le wəzha ta meghekɛa meyɛ ŋayɛ keɗema ŋa yitenyɛa ŋayɛ ma. Kwa nza ŋkɛ ma wəndə nya keɓelahehwe ɓelahe le menənyɛ ne, kwa ghəa nci nza fete ta nci bake nci.

²⁰Ma wəndə nya keɓelahehwe ɓelahe le male ta wəza meghekɛa yitenyɛ ne, zləvə yakelemte ŋkɛ te wəza meghekɛa yitenyɛ. Kwa ghəa nci tenza fete ta nci bake nci ba'a katempə hɛ kaɗema hɛ ŋwale va hɛ.

²¹Ma kewəmeve male ta wəza meghekɛ wəndə ne, wəsə nya keɗema kehite geva ŋkɛ. Kateya ŋwale hɛ, va nya kelemte zləvə wəndəa shɛ te wəza meghekɛ we.

²²Hawe mə va wəshi mahalegəa ɗa ba'a wəshi nyi gezete 'ya, mene mə slene le hɛ. Ma tsagha ne, katebete ŋayɛ hɛɗi nya tefə ŋayɛ 'ya kadzete we.

²³Hawema yɛ va wəshi keshia kweci hwelefefi nyi ŋka nyi 'ya te kema ta ŋayɛ ma. Va nya menete wəshia shɛhɛ hɛ nda ɗema hɛ ndeɗehwe ɗa.

²⁴Ma 'ya gezete ŋayɛ: ‹Va gheyɛ tenza hɛɗia nci, 'ya nde teve ŋayɛ kaŋa ŋayɛ, hɛɗi nya hwɛ nya yɛ ŋ'wa le yɛməa mze te!› 'Ya ya kaMahwətə Shala ta ŋayɛ nya kenehemte ŋayɛ le kweci hwelefefi.

²⁵Vatse gɛ ne, katenehe wəshi keseɗa nyi wɛŋe wɛŋe le nyi wale wale, 'yɛ nyi wɛŋe wɛŋe le nyi wale wale yɛ. Zhɛrema ghəa ŋayɛ yɛ wale wale laka kwaɗe wəshi nyi wale wale: wəshi keseɗa, 'yɛ keɗema wəshi nyi kentsehe dzate te hɛɗi ma. Ma nda neheve hɛ 'ya ne, kezha ɗepete wəshi nyi wale wale yɛ.

²⁶Nza mə kambeli nyi keveyi geva tekeleke kaŋa ɗa, kwa nza ŋkɛ ma 'ya Mahwətə ne, nahe 'ya keveyi geva tekeleke. Nahe 'ya kenehemte ŋayɛ le kweci hwelefefi kezha nza yɛ kaŋa ɗa.

²⁷Ma kenza za keɗema male nya kendeke nda ghə ke dzawa weta ba'a nya kelə sha ka gepe ŋkwa shɛ ne, katempə hɛ mbeli. Katebeza hɛ mbeli le pelɛ ba'a kwa ghəa nci tenza mte ta nci.»