Read kapsiki Ka Lɛvi 24 Bible Online

Ka Lɛvi 24 - kapsiki bible

Ka Lɛvi 24

¹Ma ke Mahwətə sha Moyize:

²«Geze nda ke ka Israyɛl kezha keleke ŋa n'yia bekele nya ganyɛ ma hɛ kezha meha ghwə kwa paterela kala tɛhwɛɗi.

³Kateve wəsə kentare yɛ paterela Aron mbe cɛ lekwesa kebegeme geva, te kema ta mayafe nya kewəfərə səndəkwəa jikə geva. Katetse ghwə kwa yɛ paterela se mɛa tɛhwɛɗi pa va masheke kwa kema ta ɗa, 'ya Mahwətə. Kawəsə mahalegə nya kaghala ghala tenza ŋkɛ sha gheyɛ keshi keshi.

⁴Katentare yɛ paterela Aron te kema ta ɗa te wəsə kentare yɛ paterela nya le mze kwa tere tere nya wɛŋe, kezha tse ghwə kwa hɛ hwencɛke ncɛke keviɗi keviɗi.

⁵Ntave hə shɛ na takɛ 'yɛmbe dəghwəa ɗafa meŋe bakeghəmbe nya nza yayata ŋkɛ kakiləwə ŋkwaŋe.

⁶Katebete hɛ na kwa kema ta ɗa, 'ya Mahwətə te tabele nya le mze kwa tere tere nya wɛŋe kazəɗə bake, ŋkwaŋe nya, ŋkwaŋe nya.

⁷Ma te yayata zəɗəa shɛ ne, katekwərə kwərə 'wərdə kwa hə hə nya ganyɛ na. Kwa sebe ta ŋkɛ ne, katetere ɗa 'wərdəa shɛ mbeli, 'ya Mahwətə te ŋkwa ɗafa ‹kawəsə kezəzə.›

⁸Ma te yayata veci kezhɛne mpi kaghala ghala ne, katebete ɗafa mbeli kwa kema ta ɗa, 'ya Mahwətə. Shave hwa ŋa ka Israyɛl nta hɛ mbeli. Kajikə geva nya kaghala ghala tenza ŋkɛ.

⁹Kaŋa yɛ Aron le ka shihɛnyɛ tenza ɗafa shɛhɛ. Ghenci ka tezeme hɛ mbe ŋkwa nya keveyi geva tekeleke, kwa nza ŋkɛ wəsə nya keveyi geva tekeleke tsape ŋkɛ kaŋa nci hwa wəshi nyi ketere nda geva ke Mahwətə. Kawəsə mahalegə nya kaghala ghala tenza ŋkɛ.»

¹⁰Ma te kwete veci ne, pa mɛ tsehate geva kwelɛ yɛ nde Israyɛl le wəzege ta wəzha ta ka Israyɛl nya kaŋa nde Ɛzhipte nya kese kanzanyɛ hwa ka Israyɛl mbe ghedəkwə.

¹¹Pa wəzege ta wəzha ta ka Israyɛl kelemte zləvə te sləa Shala ba'a ŋelekɛ ŋkɛ. Pa mbeli keleke nda ŋkɛ ke Moyize. Ma sləa meghekɛ ne, Shelomit, wəzha ta Dibri, kwa yita ta Dan.

¹²Ntake mbeli kaya ŋkɛ megela kezha neghe ghena nya ketese va Mahwətə le ghəa ŋkɛ.

¹³Tagha gɛ, ma ke Mahwətə sha Moyize:

¹⁴«Kelakave mə wəndəa shɛ shave mbe ghedəkwə. Katedape dzeve mbeli nyi kefate kaŋele ɗa ŋkɛ kwa ghəa ŋkɛ, tagha gɛ, katebeza ŋkɛ pɛtɛa ka Israyɛl le pelɛ.

¹⁵Wa nyi ghena nyi tegeze nda na ke ka Israyɛl nyi: Ma keŋelekɛ Shala ta ŋkɛ wəndə ne, kwa ghəa ŋkɛ tenza jaɗafa ta ŋkɛ.

¹⁶Ma yayata wəndə nya kekelemte zləvə te sləa Mahwətə ne, katepesle ŋkɛ mbeli: jikə ta ka Israyɛl nde tebeza ŋkɛ le pelɛ. Ya gheŋkɛ nza kande se se keɗema kande Israyɛl ne, katepesle ŋkɛ mbeli va nya kelemte zləvə ŋkɛ te sləa Shala.

¹⁷Ma kepeslekɛ wəndə wəndə ne, katepesle ŋkɛ mbeli perə.

¹⁸Ma kepeslekɛ wəsə keseɗa ta wəndə ŋkɛ ne, katekese wəsə keseɗa nya le mpi ŋkɛ kase kadzete ŋkwa ŋkɛ.

¹⁹Ma keɗakɛ wəndə wəndə le zhi ne, kateɗa ŋkɛ mbeli le zhi kala nyagha shɛ perə:

²⁰ɓele te ɓele, ntsə te ntsə, slene te slene. Wəsə kwa ndiremi nya menete nda ŋkɛ ke wəndə yatemene nda mbeli.

²¹Ma wəndə nya kepeslekɛ wəsə keseɗa ne, katekese kwete ŋkɛ kase kadzete ŋkwa ŋkɛ. Ma wəndə nya kepeslekɛ wəndə ne, katepesle ŋkɛ mbeli.

²²Wəsə mahalegə nya kwetɛŋe nde tenza kaŋa nde se se ba'a kaŋa nde Israyɛl, kwa nza ŋkɛ ne, 'ya ya kaMahwətə Shala ta ŋayɛ.»

²³Pa Moyize gezave nda ghena shɛhɛ ke ka Israyɛl. Tagha gɛ, pa hɛ kelakave wəndə nya keŋelekɛ Shala shɛ shave mbe ghedəkwə ba'a peslekɛ ŋkɛ le pelɛ. Tsagha gɛ ne, nahe hɛ kemenete kala nya gezave nda Mahwətə ke Moyize.