Read kapsiki Ka Lɛvi 25 Bible Online

Ka Lɛvi 25 - kapsiki bible

Ka Lɛvi 25

¹Ma ke Mahwətə sha Moyize pelɛ ghweme ta Sinay:

²«Ma pa na sha ka Israyɛl: Ma vəa ŋkwa nya tedzete hɛɗi nya teve ŋayɛ nya 'ya yɛ ne, katesərə hɛɗia shɛ kazhɛne mpi kazləvəa ɗa, 'ya Mahwətə.

³Mbe va ŋkwaŋe ne, katetsawe wəshi yɛ mbe wəvea ŋayɛ, katesahwe yɛ wəfe ta rɛzɛŋea ŋayɛ yɛ ba'a katemene wəshi yɛ se te wəve.

⁴Ama kwa mberefaŋe ta va ne, katenza ŋkɛ kava nya keveyi ɗa geva tekeleke, 'ya Mahwətə, kava kezhɛne nda mpi ke hɛɗi: katetsawe wəshi yɛ mbe wəvea ŋayɛ we, katesahwe yɛ wəfe ta rɛzɛŋea ŋayɛ yɛ we,

⁵katemene yɛ gapele le mecɛkwefe yɛ se te wəve we, ba'a ne, katenda yɛ rɛzɛŋe nyi keɗema kesahwemte geva yɛ we. Kwa nza ŋkɛ ne, kava kezhɛne nda mpi ke hɛɗi tenza ŋkɛ.

⁶Ya tsagha shɛ ŋkɛ ne, wərə yɛ kazeme wəshi nyi kemenenji gəmə te va ta zhɛne nda mpi ke hɛɗia shɛ, gha, ka mene slene ta ŋa nyi kazhili ba'a nyi kami, tsagha ka mene ŋa slene cɛdɛ ba'a ka mentiɓə nyi ki ghɛa ŋa.

⁷Ma wəshia shɛhɛ perə ne, katezeme hɛ wəshi keseɗa ta ŋayɛ, ya wəshi nyi hwa gamba te hɛɗia ŋayɛ.»

⁸Kateɓela va mberefaŋe yɛ zhigə mberefaŋe, geze ta ŋkɛ, va wəfaɗemsə meslighəmbe.

⁹Ma te kwa meŋe ta hɛ mbe tere kwa mberefaŋe, veci nya kwele kezha kelemte jaɗafa ne, katevɛ vəaŋə yɛ te hɛɗia ŋayɛ pɛtɛ ba'a katetsa gaghwe yɛ.

¹⁰Kateve kwa mcɛfemsə ta va yɛ kava nya keveyi geva tekeleke ba'a katezlape nza waɗe yɛ kaŋa mbeli nyi te hɛɗi pɛtɛ. Kava kezlama tenza va shɛ kaŋa ŋayɛ. Ma vəa ŋkwa shɛ ne, yayata wəndə katezhɛne kakele yɛ wəvea ŋkɛ ba'a kalə sha hwelefe ta ŋkɛ.

¹¹Katenza va kwa mcɛfemsə kava kezlama kaŋa ŋayɛ: katetsawe wəshi yɛ mbe wəvea ŋayɛ we, katemene yɛ gapele ba'a yɛ mecɛkwefe yɛ se te wəve we, katenda rɛzɛŋe nyi kesahwemtema geva yɛ we.

¹²Kwa nza ŋkɛ ne, kava kezlama tenza ŋkɛ, kava nya keveyi geva tekeleke tenza ŋkɛ kaŋa ŋayɛ. Ama wərə yɛ kazeme wəshi nyi kemenenji gəmə dzeyi mbe yɛ wəve.

¹³Ma te va kezlama shɛ ne, yayata wəndəa ŋayɛ katezhɛne geva kadzete wəvea ŋkɛ.

¹⁴Ma kepamte nda wəve na ke menə ŋa keɗema kepave wəve na ve ne, menema ghəa ŋa na le ma.

¹⁵Pa mə keɗema pamte mə wəsə le ɓela va nyi kekiɗinji se mɛa va kezlama, ba'a ne, ɓela mə va kemene wəshi se te wəve nyi ketene hwa'a te va kezlama nya ketese.

¹⁶Ma ketene va kwele kwele ne, kwele kwele nza səkəməa pa ta wəve, ma ɓahwe tene va ne, ɓahwe nza səkəməa ŋkɛ, kwa nza ŋkɛ ne, ɓela ta mene wəshi se te wəve yapamte mbeli.

¹⁷Menema ghəa ŋayɛ yɛ le menə ŋayɛ ma. Ma tsagha ne, katencɛ hawe ta ŋayɛ yɛ va 'ya, Shala ta ŋayɛ. Kwa nza ŋkɛ ne, 'ya ya kaMahwətə Shala ta ŋayɛ.

¹⁸Mene mə slene le wəshi mahalegəa ɗa, ya mə wəshi nyi gezete 'ya ba'a hawe mə va hɛ. Ma tsagha ne, katenza yɛ gwezlayɛ te hɛɗi nya.

¹⁹Katemene wəshi kwele kwele te hɛɗi, katezeme wəshi kezeme yɛ behe behe ba'a katenza yɛ gwezlayɛ.

²⁰Nda kwete ma te'yɛwe yɛ: Wa yatezeme gheɓəmə mbe kwa mberefaŋe ta va, kwa nza ŋkɛ kateɗema gheɓəmə katsawe wəshi ba'a kamene wəshi se te wəve wa?

²¹Yawa, ma 'ya gɛ ne, katepele wəpi ta ɗa 'ya kadzeghəa gheyɛ mbe kwa ŋkwaŋe ta va, kateve nda hweŋkwa 'ya ke hɛɗi kamene wəshi te wəve kaŋa va mahekene.

²²Ma te kwa deghese ta va ne, katetsawe wəshi yɛ, ama meghweme ta wəshi yatezeme yɛ, hwa'a mbe kwa mesli ta va, pa te və nya menemte geva wəshi se te wəve.

²³Kapamte geva hɛɗi kakwa fəyitekeghə we, kwa nza ŋkɛ ne, ŋa ɗa hɛɗi. Kala ka se se keɗema kala ka mentiɓə yɛ te hɛɗia ɗa.

²⁴Ma te hɛɗi nya ketenza nya kaŋa ŋayɛ gɛ ne, katesərə nda hweŋkwa yɛ ke mbeli kezha mbeɗe wəvea nci.

²⁵Ma kekeseve menə ŋa titikwə nda pamte wəvea ŋkɛ ŋkɛ ne, hweŋkwa ya va menənyɛ nya kezeme ghɛ kezha mbeɗe wəvea shɛ.

²⁶Ma keɗema wəndə nya nza hweŋkwa kezeme ghɛ ve va wəndəa shɛ, ama pa le ghəa ŋkɛ kemave wəsə kembeɗe wəvea ŋkɛ ne,

²⁷kateɓela wəsə nya zhɛne nda ŋkɛ ke wəndə nya kepave ŋkɛ kala nza ta va nyi ketene hwa'a te va kezlama, kateŋki wəsəa shɛ ŋkɛ ba'a katezhɛne geva ŋkɛ kadzembe wəvea ŋkɛ.

²⁸Ma keɗema wəsə ve kezha mbeɗe wəvea shɛ ne, katenza nde va wəndə nya kepave hwa'a te va kezlama. Ma vəa ŋkwa shɛ ne, katezhɛne wəndə ke wəve kadzembe wəvea ŋkɛ.

²⁹Ma kepamte ghɛ wəndə mbe meleme nya nza zli yite ne, pa te kiɗi ta va nya pamte ŋkɛ nza hweŋkwa kembeɗe shɛ: kavə ɓɛhwɛ nza ŋkɛ.

³⁰Ma kembeɗekema geva ghɛa shɛ mbe va zake ne, kaŋa yɛ wəndə nya kepave le ŋwalea nza nde fəyitekeghə. Katezhɛne ghɛa shɛ hɛ te va kezlama we.

³¹Ama ghɛ nyi mbe meleme nyi ɗema zli yite ne, yipə yipə le wəve nyi te hɛɗi tenza hɛ: hweŋkwa kembeɗe nde tenza va wəndə nya kepamte shanda, ba'a ne, katekele ghɛa ŋkɛ wəndəa shɛ te va kezlama.

³²Ma kaŋa ka Lɛvi ne, hweŋkwa nde tenza va hɛ keveci keveci kezha mbeɗe ghɛa nci nyi mbe yɛ meleme ta ka Lɛvi.

³³Ya kwete nde Lɛvi nde pave ghɛa shɛ ne, kaŋa wəndə ke ghɛ nya keghate tenza nde te va kezlama. Kwa nza ŋkɛ ne, deke ghɛa shɛhɛ ya kawəsəa ka Lɛvi te hɛɗia ka Israyɛl.

³⁴Ama wəve nyi dzeyi yitea meleme ta nci ne, kapamte geva hɛ we, kwa nza ŋkɛ ne, kaghala ghala tenza hɛ kaŋa ka Lɛvi.

³⁵Ma kenza kwete hwa ka menəhɛ ŋa ya shewə va titikwə, kaɗema wəsə ve kezha ŋki ŋa dewa ta ŋa ne, katekemane ŋkɛ na, yitea nza ŋkɛ vare gha. Tsagha hi yɛ kamene nda ke ka se se keɗema ke ka mentiɓə nyi te hɛɗia ŋayɛ.

³⁶'Yɛwema yɛmə na yitea wəsə nya nzəɓəave nda na, ya tsema tsemanyɛ ŋkɛ ma. Ma tsagha ne, katencɛ hawe ta ŋa na va 'ya, Shala ta ŋa. Pelakɛ ŋkɛ kanza vare gha.

³⁷Ma kenzəɓəave nda cɛdɛ na ne, 'yɛwema yɛmə na yite ma. Ma keɗave nda wəshi kezeme na ne, 'yɛwema wəsə na yite ma.

³⁸'Ya ya kaMahwətə Shala ta ŋayɛ nya kefəakame ŋayɛ same kwa Ɛzhipte kezha ve ŋayɛ hɛɗia Kanan ba'a kezha nza kaShala ta ŋayɛ.

³⁹Ma kekeseve menə ŋa titikwə nda pamte ŋa ghəa ŋkɛ ŋkɛ ne, mba na keve nda slene mava.

⁴⁰Katemene nda na kala nde mene slene cɛdɛ keɗema kala mentiɓə. Katenza ŋkɛ kande mene slene ta ŋa pa te va kezlama.

⁴¹Ma te va shɛ ne, katezhɛne ŋkɛ kanza kamamza, gheŋkɛ le ŋwalea ŋkɛ. Katezhɛne geva ŋkɛ kalə kadzehwa mbelia ŋkɛ ba'a katezhɛne geva ŋkɛ kadzembe wəvea ka shihɛnyɛ.

⁴²Kwa nza ŋkɛ ne, ka mene slene ta ɗa ka Israyɛl, hɛ nyi fəakame 'ya same kwa Ɛzhipte. Katepamte geva hɛ kala nya pamte ka mavashi mbeli we.

⁴³Sa nda ma yaka yɛ ke hɛ le berete ma. Ma tsagha ne, katencɛ hawe ta ŋayɛ yɛ va 'ya, 'ya Shala ta ŋayɛ yɛ.

⁴⁴Ma kenza yɛ kaɗe ka mavashi keɗema ka kwaterashi ne, hwa kweci hwelefefi nyi dzeyi yitea gheyɛ tepa hɛ yɛ.

⁴⁵Wərə yɛ kapave perə hwa ŋwalea ka se se nyi te hɛɗia ŋayɛ keɗema hwa hwelefefia nci nyi keya tagha. Kaŋa ŋayɛ tenza hɛ.

⁴⁶Ma te kwete veci ne, katesərə nda hɛ yɛ kawəsə kezeme ghɛ ke ŋwalea ŋayɛ. Wərə yɛ kaveyi hɛ kaka mavashi kaghala ghala. Ama yagha kwete wəndəa ŋayɛ tesa nda yaka ke kwete hwa ka menəhɛnyɛ le berete.

⁴⁷Ma kemenete mcɛlə nde se se keɗema mentiɓə nya te hɛɗia ŋayɛ, nda pamte nda ghəa ŋkɛ kwete hwa ka menəhɛ ŋayɛ nya keseve titikwə keɗema ke kwete wəndə nya mbe hwelefe ta ka se se ne,

⁴⁸hweŋkwa ya shɛ kezha mbeɗe menə ŋayɛa shɛ: wərə kwete hwa ka menəhɛnyɛ kambeɗeke ŋkɛ.

⁴⁹Ma keɗema wəza yita ve ne, wərə wəza yitenyɛa yitenyɛ, keɗema wəzege ta wəza yitenyɛa yitenyɛ, keɗema kwete hwa ka menəhɛnyɛ kambeɗeke ŋkɛ. Wərə ŋkɛ kambeɗeke ghəa ŋkɛ le ghəa ŋkɛ kenza wəsə ve.

⁵⁰Tsagha ne, kateɓela va nyi kwelɛ va nya pamte ghəa ŋkɛ ŋkɛ te le va kezlama le wəndə nya kepave ŋkɛ. Se va ɓela ta va tenza səkəməa pa ta ŋkɛ, yipə yipə le wəsə nya ŋki nda mbeli te vəghwə ke nde mene slene.

⁵¹Ma kenza ŋkɛ kwele kwele tene va yitea va kezlama ne, katezhɛne cɛdɛ ŋkɛ takwa yitea cɛdɛ nya pave mbeli te kezha mbeɗe ghəa ŋkɛ.

⁵²Ma keɗema va ketene kwele kwele ne, kateɓela va shɛhɛ ŋkɛ ba'a katezhɛne cɛdɛ ŋkɛ kala ɓela ta nci.

⁵³Katenza ŋkɛ kande mene slene nya ŋki nda wəsə mbeli mbe va ki ghɛa nde sleke ŋkɛ. Ama sərəma yɛ kasa nda yaka nde sleke ŋkɛ ma.

⁵⁴Ma keɗema mbeli kembeɗeke menə ŋayɛ le nyama nyama ta hweŋkwa ne, katenza ŋkɛ waɗe le ŋwalea ŋkɛ te va kezlama.

⁵⁵Kaganda ne, ka mene slene ta ɗa ka Israyɛl. Ka mene slene ta ɗa hɛ, kwa nza ŋkɛ ne, 'ya nde fəakame hɛ same kwa Ɛzhipte. 'Ya ya kaMahwətə Shala ta ŋayɛ.