Read kapsiki Ka Lɛvi 27 Bible Online

Ka Lɛvi 27 - kapsiki bible

Ka Lɛvi 27

¹Ma ke Mahwətə sha Moyize:

²«Ma pa na sha ka Israyɛl: Ma kemenete meɗe mɛ keve nda wəndə ke Mahwətə wəndə ne, wərə ŋkɛ kambeɗeke wəndəa ŋkɛ le mze kwa tɛawetɛa.

³Wa nyi nza ta səkəməa shɛhɛ nyi: Ma kaŋa za nya nza va ta ŋkɛ se te va bakemsə hwa'a te ŋkwaŋemsə ne, dəɓərəa mze kwa tɛawetɛa mcɛfemsə nza səkəməa ŋkɛ, kala dəɓərəa nya mbe ŋkwa nya keveyi geva tekeleke.

⁴Ma kaŋa male ne, dəɓərə mahekenemsə nza ŋa nta.

⁵Ma kaŋa wəndə nya nza va ta ŋkɛ se te va mcɛfe hwa'a te bakemsə ne, dəɓərə bakemsə nza ŋa wəzege teza, meŋe nza ŋa wəzha makwa.

⁶Ma kaŋa wəzege nya katere kwetɛŋe hwa'a te va mcɛfe ne, dəɓərə mcɛfe nza ŋa wəzege teza, mahekene nza ŋa wəzha makwa.

⁷Ma kaŋa wəndə nya nza va ta ŋkɛ za ma ke ŋkwaŋemsə ne, dəɓərə meŋe mcɛfeghəmbe nza ŋa za, meŋe nza ŋa male.

⁸Ma kenza wəndə kande titikwə lagana kezha ŋki wəsə nya keslate geva ne, pa keleke wəndəa shɛ kase kadzawa kema ta nde dzeghe Shala. Nde dzeghe Shala nde newe wəsə nya keteŋki geva kala berete ta wəndə nya kemenete meɗe mɛ.

⁹Ma kenza nde le wəsə keseɗa nya nza mbeli kadzeghekɛ nda melɛ ke Mahwətə le menete meɗe mɛ ŋkɛ ne, kawəsə keseɗa nya keveyi geva tekeleke tenza ŋkɛ.

¹⁰Hweŋkwa shɛ va mbeli kezha mbeɗe kwete te ŋkwa ŋkɛ, ya gheŋkɛ nza ganyɛke keɗema ndiremike we. Ma kembeɗemte wəsə keseɗa shɛ wəndə le kwete ne, kateve geva wəshi keseɗa shɛhɛ bake nci tekeleke.

¹¹Ma kenza nde le wəsə keseɗa nya wale wale, nya ɗema mbeli kadzeghekɛ nda melɛ ke Mahwətə le menete geva meɗe mɛa shɛ ne, katekele wəsə keseɗa shɛ mbeli kase kadzawa kema ta nde dzeghe Shala.

¹²Katesla səkəməa ŋkɛ nde dzeghe Shala, ya gheŋkɛ nza ganyɛke keɗema ndiremike. Kateghereŋe mbeli te səkəmə nya slate nde dzeghe Shala.

¹³Ma keɗe wəndə ke wəsə keseɗa shɛ kambeɗe ne, katemtsehe kwa mcɛfe ta bela ta səkəməa ŋkɛ ŋkɛ kadzeyitea nya slate nde dzeghe Shala.

¹⁴Ma kenza nde ghɛa ŋkɛ yaveyi nda wəndə tekeleke ke Mahwətə ne, katesla səkəməa ŋkɛ nde dzeghe Shala, ya gheŋkɛ nza ganyɛke keɗema ndiremike. Kateghereŋe mbeli te səkəmə nya slate ŋkɛ.

¹⁵Ma keɗe wəndə ke ghɛ kambeɗe ghɛa ŋkɛ ne, katemtsehe kwa mcɛfe ta bela ta səkəməa ŋkɛ ŋkɛ kadzeyitea nya slate nde dzeghe Shala. Kwa sebe ta ŋkɛ ne, kaŋa ŋkɛ tenza ŋkɛ.

¹⁶Ma keveyi nda kwete hwa wəvea ŋkɛ wəndə tekeleke ke Mahwətə ne, katesla səkəməa ŋkɛ mbeli kala felehwe ta wəshi nyi nza mbeli katsawame mbe: dəɓərəa mze kwa tɛawetɛa mcɛfemsə te kiləwəa megi gwəmsə mahekene.

¹⁷Ma kenza nde se mɛa va kezlama veyi geva wəvea shɛ tekeleke ne, kateghereŋe mbeli te səkəmə nya keslate geva.

¹⁸Ma kenza nde kwa sebe ta va kezlama veyi geva wəvea shɛ tekeleke ne, katesla səkəməa ŋkɛ nde dzeghe Shala kala va nyi ketene hwa'a te va kezlama nya ketese, tsagha gɛ, katentamte geva wəsə mbe səkəmə nya keslate geva.

¹⁹Ma keɗe wəndə ke wəve kambeɗe wəvea ŋkɛ ne, katemtsehe kwa mcɛfe ta bela ta səkəməa ŋkɛ ŋkɛ kadzeyitea nya slate nde dzeghe Shala. Kwa sebe ta ŋkɛ ne, kaŋa ŋkɛ tenza wəve.

²⁰Ma keɗema ŋkɛ kembeɗeve wəvea shɛ, nda pamte nda mbeli ke kwete wəndə ne, hweŋkwa shɛ kezha mbeɗe zhɛkwa we.

²¹Ma te va kezlama gɛ ne, kateve nda geva wəvea shɛ tekeleke ke Mahwətə, kala wəve nya keveyi nda geva kaghala ghala. Kaŋa ka dzeghe Shala tenza ŋkɛ.

²²Ma keveyi nda wəve nya pave wəndə wəndə tekeleke ke Mahwətə, kaɗema kawəve keshi ne,

²³katesla səkəməa ŋkɛ nde dzeghe Shala kala va nyi ketene hwa'a te va kezlama nya ketese. Kateŋki səkəməa shɛ wəndəa shɛ te vecia shɛnyɛ. Kawəsə nya keveyi geva tekeleke kaŋa Mahwətə tenza ŋkɛ.

²⁴Ama te va kezlama ne, katenza wəvea shɛ kaŋa wəndə ke wəve nya keghate, geze ta ŋkɛ, kaŋa wəndə nya kekemave kawəsə kezeme ghɛ.

²⁵Ma pɛtɛa səkəməa wəshi nyi ne, katesla geva hɛ kala səkəmə nya mbe ŋkwa nya keveyi geva tekeleke, nya nza ɗaŋeɗa ta dəɓərəa mze kwa tɛawetɛa gare meŋe kwa slibə ta bela ta kiləwə.

²⁶Wəndə shɛ kaveyi nda tezhɛa wəsə keseɗa ta ŋkɛ tekeleke ke Mahwətə we. Kwa nza ŋkɛ ma pɛtɛa tezhɛa sla, timɛti ba'a kwi ne, ŋa Mahwətə hɛ.

²⁷Ama kenza nde katezhɛa wəsə keseɗa nya wale wale ne, wərə wəndə ke gheŋkɛ kambeɗeve ŋkɛ le mtsehe kwa mcɛfe ta bela ta səkəməa ŋkɛ yite. Ma keɗema ŋkɛ kembeɗeve ŋkɛ ne, katepamte nda ŋkɛ nde dzeghe Shala ke kwete wəndə kala səkəmə nya keslate geva.

²⁸Ma keveyi nda wəndə, wəsə keseɗa keɗema wəvea ŋkɛ wəndə tekeleke ke Mahwətə kaghala ghala ne, katepamte geva ŋkɛ keɗema katembeɗeve geva ŋkɛ we. Ma yayata wəsə nya keveyi nda geva tekeleke kaghala ghala ke Mahwətə ne, wəsə nya keveyi nda geva tekeleke fəyitekeghə ŋkɛ.

²⁹Ya gheŋkɛ nza kawəndə ŋelɛ ne, kambeɗeve geva ŋkɛ we: katepesle ŋkɛ mbeli.

³⁰Kateve nda kwa meŋe ta bela ta wəshi nyi te wəve ba'a yɛ ya ta wəfe mbeli ke Mahwətə. Wəsə nya keveyi geva tekeleke kaŋa Mahwətə ŋkɛ.

³¹Ma keɗe wəndə kambeɗe kwete bela ta kwa meŋe ta bela ta wəshia ŋkɛ ne, katemtsehe kwa mcɛfe ta bela ta səkəməa ŋkɛ ŋkɛ kadzeyitea səkəməa ŋkɛ.

³²Ma kaŋa yɛ sla, timɛti ba'a kwi ne, kaŋa Mahwətə veyi nda geva kwa meŋe ta wəndəa nci tekeleke.

³³Katezele mbeli kaɗepe kenza nde ganyɛke keɗema ndiremike wəsə keseɗa shɛ we, kateve kwete mbeli te ŋkwa ŋkɛ we. Ma kevate kwete mbeli te ŋkwa wəsə keseɗa shɛ ne, kateve geva hɛ bake nci tekeleke kaŋa Mahwətə. Katembeɗeve kwete mbeli hwa hɛ we.»

³⁴Nyi ya kaghena nyi gezave nda Mahwətə ke Moyize kaŋa ka Israyɛl, pelɛ ghweme ta Sinay.