Read kapsiki Ka Lɛvi 4 Bible Online

Ka Lɛvi 4 - kapsiki bible

Ka Lɛvi 4

¹Ma ke Mahwətə sha Moyize:

²«Ma pa na sha ka Israyɛl: Ma kemenete jaɗafa wəndə kaɗema le ɗe ta ŋkɛ laka mene wəsə nya fɛake kwete ghena nyi gezeke Mahwətə, wa nya wəsə nya hi ŋkɛ kamene nya:

³Ma nda wəndə kwelea ka dzeghe Shala nde menete jaɗafa ba'a nde vate fete te mbeli tsagha ne, katedzeghe nda melɛ ŋkɛ ke Mahwətə le mca nya ɗema beze te kezha yaɓemte geva jaɗafa ta ŋkɛ.

⁴Pa ŋkɛ keseke mca shɛ kase kadzemɛa cɛ lekwesa kebegeme geva. Pa ŋkɛ dapeyi dzeve ta ŋkɛ kwa ghəa wəsə keseɗa shɛ ba'a sleyite ghə yite kwa kema ta Mahwətə.

⁵Pa ŋkɛ taweve mimia ŋkɛ ba'a keleke kadzembe cɛ lekwesa kebegeme geva.

⁶Pa ŋkɛ hahwe wəzege ta dzeve hwa mimia shɛ ba'a yisəyi mberefaŋe zhigə te bela nya nza mbeli kanakɛ va mayafe nya mɛa ŋkwa nya keveyi geva tekeleke, kwa kema ta Mahwətə.

⁷Kwa sebe ta ŋkɛ, pa menate mimia shɛ te tereme nyi te reghwetɛ ketere 'wərdə kwa kema ta Mahwətə, mbe cɛ lekwesa kebegeme geva. Pa ŋkɛ shekeyi mimi nya ketene yitea seɗa ta reghwetɛ kedzeghe melɛ nya mɛa ŋkwa kedzembe cɛ lekwesa.

⁸Pa ŋkɛ fəte bela ta mca nyi nza merege te pɛtɛ: merege nya kənəa heli ba'a nya kənəa wəshi nyi kwa hwə,

⁹ghwelese bake nci ba'a merege nya kənəa hɛ, merege nya dzate te slerepe. Ma bela ta mene nya ganyɛ ne, kanya kwetɛŋe sla hɛ ŋkɛ le yɛ ghwelese.

¹⁰Bela shɛhɛ yakele mbeli vəa ŋkwa nya dzeghe melɛ kejikə ghə mbeli le mca. Pa wəndə kwelea ka dzeghe Shala teremte hɛ te reghwetɛ kedzeghe melɛ.

¹¹Ma hweta ta mca, kweci slia ŋkɛ zlaɓe le ghə ba'a yɛ jajɛghwa, yɛ heli ba'a hwetamaze le shitə nya kwa,

¹²geze ta ŋkɛ, pɛtɛ slia mca nya ketene ne, katefə hɛ ŋkɛ shave mbe ghedəkwə, kalə kadzete ŋkwa nya wɛŋe, te ŋkwa nya bete pəsəɗə nya kededənə mbeli, pa mbeli beteyi hɛ te ghwə. Te ŋkwa shɛ tere hɛ mbeli pɛtɛ, te tsene ta pəsəɗə nya kededənə.

¹³Ma kenza ŋkɛ jikə ta ka Israyɛl nde menete jaɗafa nya keɗema le ɗe ta ŋkɛ, laka mene wəsə nya fɛake ŋkwa kwete ghena nyi gezeke Mahwətə ne, pɛtɛ ka Israyɛl kemenete jaɗafa tsagha, ya gheŋkɛ ɗema le ɗepe ta nci.

¹⁴Ma ntsatema ta nci ke fete nya kemenete geva ne, pa hɛ keseke mca kezha kelemte jaɗafa ta nci Shala te wənə. Pa hɛ ŋkake mca shɛ kase kadzemɛa cɛ lekwesa kebegeme geva.

¹⁵Pa mbelia jama nyi hwa mbeli dapeyi dzeve ta nci kwa ghəa wəsə keseɗa shɛ, pa kwete wəndəa nci slamte ghə te tagha kwa kema ta Mahwətə.

¹⁶Pa wəndə kwelea ka dzeghe Shala gəve mimia ŋkɛ ɓɛhwɛ kadzembe cɛ lekwesa.

¹⁷Pa ŋkɛ hahwe wəzege ta dzeve hwa mimia shɛ kwa kema ta Mahwətə, pa yisəate mberefaŋe zhigə te mayafe nya mɛa ŋkwa nya keveyi geva tekeleke, te bela ta ŋkɛ nya nza mbeli kanakɛ.

¹⁸Kwa sebe ta ŋkɛ, pa menate mimia shɛ te tereme nyi te reghwetɛ nya mbe cɛ lekwesa kebegeme geva. Pa ŋkɛ shekeyi mimi nya ketene yitea seɗa ta reghwetɛ kedzeghe melɛ nya mɛa ŋkwa kedzembe cɛ lekwesa.

¹⁹Pa ŋkɛ fəte bela nyi nza merege te pɛtɛ te wəsə keseɗa ba'a teremte hɛ te reghwetɛ.

²⁰Kala nya menete ŋkɛ le mca nya dzeghekɛ melɛ ŋkɛ le kezha jaɗafa ta ŋkɛ mene ŋkɛ le mca shɛ. Ma vəa nya ɓelate gəsəkəa yaɓe jaɗafa ŋkɛ kənəa ka Israyɛl ne, katekelemte nda jaɗafa ta nci Shala te wənə ke hɛ.

²¹Kwa sebe ta ŋkɛ ne, pa fəakave slia wəsə keseɗa nya ketene shave mbe ghedəkwə ba'a teremte le ghwə kala nya menete ŋkɛ le mca nya dzeghekɛ melɛ ŋkɛ le kezha jaɗafa ta ŋkɛ. Nya ya kamelɛ kekele jaɗafa ta tsene ta pɛtɛa ka Israyɛl seyi te wənə.

²²Ma kenza ŋkɛ wəndə nya te ghəa mbeli nde menete jaɗafa kaɗema le ɗe ta ŋkɛ, laka mene wəsə nya fɛake kwete ghena nyi gezeke Shala Mahwətə ta ŋkɛ ne, jaɗafa yamenete ŋkɛ tsagha.

²³Ntsatema ta ŋkɛ ke fetea shɛ ne, pa dzeghekɛ melɛ le zhɛfa nya ɗema beze te.

²⁴Pa ŋkɛ dapeyi dzeve kwa ghəa wəsə keseɗa shɛ ba'a slamte ghə te kwa kema ta Mahwətə, te ŋkwa nya sla ghə mbeli te wəshi keseɗa kedzeghe melɛ kwa tere tere. Gheŋkɛ ya kamelɛ kekele jaɗafa seyi te wənə.

²⁵Pa nde dzeghe Shala hahwe wəzege ta dzeve hwa mimia wəsə keseɗa shɛ ba'a menate te tereme nyi te reghwetɛ kedzeghe melɛ. Kwa sebe ta ŋkɛ, pa shekeyi mimi nya ketene yitea seɗa ta reghwetɛa shɛnyɛ.

²⁶Pa ŋkɛ teremte bela nyi nza merege te pɛtɛ te reghwetɛ, kala nya mene mbeli le melɛ kejikə ghə. Ma vəa ŋkwa nya ɓelate gəsəkəa kele jaɗafa te wənə nde dzeghe Shala kənəa wəndə nya te ghəa mbeli ne, katekelemte nda jaɗafa ta ŋkɛ Shala te wənə.

²⁷Ma nda wəndə gəmə nde menete jaɗafa kaɗema le ɗe ta ŋkɛ laka mene wəsə nya fɛake kwete ghena nyi gezeke Mahwətə ne, jaɗafa yamenete ŋkɛ tsagha.

²⁸Ntsatema ta ŋkɛ ke fetea shɛ ne, pa dzeghekɛ melɛ le daɓa kwe nya ɗema beze te, va jaɗafa nya menete ŋkɛ.

²⁹Pa ŋkɛ dapeyi dzeve ta ŋkɛ kwa ghəa wəsə keseɗa shɛ ba'a sleyite ghə yite te ŋkwa nya sla ghə mbeli te wəshi keseɗa kedzeghe melɛ kwa tere tere.

³⁰Pa nde dzeghe Shala hahwe wəzege ta dzeve hwa mimia wəsə keseɗa shɛ ba'a menate te tereme nyi te reghwetɛ kedzeghe melɛ. Kwa sebe ta ŋkɛ ne, pa shekeyi mimi nya ketene yitea seɗa ta reghwetɛa shɛnyɛ.

³¹Pa ŋkɛ fəte bela nyi nza merege te, kala nya mene mbeli le melɛ kejikə ghə. Pa nde dzeghe Shala teremte hɛ te reghwetɛ kezha fa zeɗea zəŋwəa ŋkɛ Mahwətə. Ma vəa ŋkwa nya ɓelate gəsəkəa kele jaɗafa te wənə nde dzeghe Shala kənəa wəndə nya kemenete fete ne, kateyaɓemte geva jaɗafa ta ŋkɛ.

³²Ma nda təmə yaɗehwe ŋkɛ kakele kase kezha dzeghe melɛ kekelemte jaɗafa ta ŋkɛ te wənə ne, daɓa təmə nya ɗema beze te yakele ŋkɛ kase.

³³Pa ŋkɛ dapeyi dzeve kwa ghəa wəsə keseɗa shɛ ba'a sleyite ghə yite te ŋkwa nya sla ghə mbeli te wəshi keseɗa kedzeghe melɛ kwa tere tere.

³⁴Pa nde dzeghe Shala hahwe wəzege ta dzeve hwa mimia wəsə keseɗa shɛ ba'a menate te tereme nyi te reghwetɛ kedzeghe melɛ. Kwa sebe ta ŋkɛ, pa shekeyi mimi nya ketene yitea seɗa ta reghwetɛa shɛnyɛ.

³⁵Pa ŋkɛ fəte bela nyi nza merege te pɛtɛ, kala nya mene mbeli le təmə kedzeghe melɛ kejikə ghə. Pa nde dzeghe Shala teremte hɛ te reghwetɛ, jikə le kweci wəshi melɛ nyi tere nda mbeli ke Mahwətə. Ma vəa ŋkwa nya ɓelate gəsəkəa kele jaɗafa te wənə ŋkɛ kənəa wəndə nya kemenete fete ne, katekelemte jaɗafa ta ŋkɛ te wənə.