Read kapsiki Ka Lɛvi 5 Bible Online

Ka Lɛvi 5 - kapsiki bible

Ka Lɛvi 5

¹Ma kefate heka nya heka ka negha fete yite ghena kwete wəndə, nda ɗa ma ŋkɛ lə kageze wəsə nya nakɛ ŋkɛ keɗema nya fave ŋkɛ ne, nahe ŋkɛ kenza kafete ba'a gheŋkɛ nde tefa ghwene nya mbe.

²Ma kekwaɗakɛ wəsə nya wale wale kwete wəndə le ɗepema ta ŋkɛ: wəsə keseɗa kwa mte mte nya wale wale, nya hwa gamba keɗema nya ki ghɛ, keɗema ne, wəsə keseɗa kwa mte mte nya ɓɛhwɛ nya wale wale ne, kande wale wale zhɛre ŋkɛ ba'a nahe ŋkɛ kebezemte ghena.

³Ma kekwaɗakɛ wəndə nya nza yayata zereghwe nya wale wale nya kekese ŋkwa kwete wəndə kaɗema ŋkɛ keɗepe ne, katezhɛre ŋkɛ kande beze ghena, ɗepetema ta ŋkɛ.

⁴Ma kepelakɛ ghəa ŋkɛ wəndə kalə kazeme fela kala raberə, ya gheŋkɛ nza kakemanakɛ ŋkɛ keɗema kakemanakɛma ŋkɛ ne, kande beze ghena tezhɛre ŋkɛ, fatema ta ŋkɛ.

⁵Ma wəndə nya kemenete fete laka kwete hwa wəshi nyi kegezete geva nyi ne, pa ncɛte fete ta ŋkɛ.

⁶Kwa sebe ta ŋkɛ, ma kezha yaɓemte geva jaɗafa ta ŋkɛ ne, pa keseke daɓa təmə keɗema daɓa kwe kezha dzeghe nda melɛ kedimə ghɛ ke Mahwətə va jaɗafa ta ŋkɛ. Pa nde dzeghe Shala ɓelate gəsəkəa yaɓe jaɗafa kənə kezha jaɗafa ta ŋkɛ.

⁷Ma keɗema berete va wəndə kezha keleke daɓa təmə keɗema daɓa kwe kezha yaɓemte geva jaɗafa ta ŋkɛ ne, pa fəke nda ghwəɗəŋkwə bake keɗema gheɗepe bake ke Mahwətə. Ma kwete kwetɛŋe ne, kezha dzeghe melɛ keyaɓe jaɗafa, kwete nya ketene ne, kezha dzeghe melɛ kwa tere tere.

⁸Pa wəndəa shɛ fəave nda hɛ ke nde dzeghe Shala nya dzeghe nda melɛ kaba ke Mahwətə le gheɗepe kekele jaɗafa seyi te wənə. Pa ŋkɛ tərəɗəmte welɛ te, ama mba ŋkɛ kenza tendelɛŋe.

⁹Pa ŋkɛ yisəyi mimia ŋkɛ dzawa te bela ta reghwetɛ. Kwa sebe ta ŋkɛ, pa tiɗiyi mimi nya ketene yitea seɗa ta reghwetɛ. Gheŋkɛ ya kamelɛ keyaɓe jaɗafa.

¹⁰Kwa sebe ta ŋkɛ, pa nde dzeghe Shala dzeghekɛ melɛ kwa tere tere le kwa bake ta gheɗepe, kala nya kehite geva. Ma vəa nya ɓelate gəsəkəa kele jaɗafa seyi te wənə nde dzeghe Shala kənəa wəndə nya kemenete fete ne, katekelemte geva jaɗafa ta ŋkɛ ta wənə.

¹¹Ma keɗema berete va wəndə kezha fəke ghwəɗəŋkwə bake keɗema gheɗepe bake nyi 'yɛwete mbeli ne, wərə ŋkɛ kakeleke kiləwəa hə mahekene kawəsə gəmə kezha yaɓemte geva jaɗafa ta ŋkɛ. Ama mba ŋkɛ kesheke n'yi keɗema keve 'wərdə kwa hə hə kənə, va nya nza ŋkɛ kawəsə keyaɓe jaɗafa.

¹²Pa ŋkɛ keleke nda həa shɛ nde dzeghe Shala. Pa nde dzeghe Shala ntave demake mbe dzeve ‹kawəsə kezəzə› ba'a teremte nda te reghwetɛ ke Mahwətə jikə le kweci wəshi melɛ nyi tere mbeli. Gheŋkɛ ya kawəsə gəmə kekele jaɗafa seyi te wənə.

¹³Ma vəa ŋkwa nya ɓelate gəsəkəa kele jaɗafa seyi te wənə nde dzeghe Shala kənəa wəndə nya kemenete fete ne, kateyaɓemte geva jaɗafa ta ŋkɛ. Pa nde dzeghe Shala ɓelate gəsəkəa shɛ kala ŋa wəsə gəməa wəshi nyi kese te wəve.»

¹⁴Ma ke Mahwətə sha Moyize:

¹⁵«Ma kemenete fete nya dzawe wəndə laka wəshi nyi keveyi nda geva tekeleke Mahwətə, kaɗema le ɗe ta ŋkɛ ne, pa keseke game nya ɗema beze te, nya nza səkəməa ŋkɛ yipə yipə le wəsə kedzeghe ɗaŋeɗa ta wəsə nya mbe ŋkwa nya keveyi geva tekeleke, kezha dzeghe nda melɛ kedimə ghə ke Mahwətə. Kezha dzeghe melɛ kedimə ghə nza wəsə keseɗa shɛ.

¹⁶Zhɛne ne, pa wəndəa shɛ diməkɛ ghə va fete nya menete nda ŋkɛ ke ŋkwa nya keveyi geva tekeleke ba'a pa mtseheyite kwa mcɛfe ta bela ta səkəməa wəsəa shɛ yite. Pa ŋkɛ fəave nda hɛ ke nde dzeghe Shala. Ma vəa ŋkwa nya ɓelate gəsəkəa kele jaɗafa seyi te wənə nde dzeghe Shala kənəa wəndə nya kemenete fete laka game nya dzeghekɛ geva melɛ kedimə ghə le ne, katekelemte geva jaɗafa ta ŋkɛ te wənə.

¹⁷Ma kemenete fete wəndə laka mene kwete hwa wəshi nyi fɛake ghena nya gezeke Mahwətə ne, nahe ŋkɛ kemenete fete ya gheŋkɛ ɗepetema. Kwa ghəa ŋkɛ nza fetea shɛ.

¹⁸Pa ŋkɛ keseke nda game nya ɗema beze te, nya zləvə te kezha dzeghe melɛ kedimə ghə ke nde dzeghe Shala. Ma vəa ŋkwa nya ɓelate gəsəkəa kele jaɗafa seyi te wənə nde dzeghe Shala kənəa wəndə nya kemenete fete le ɗepema ta ŋkɛ ne, kateyaɓemte geva jaɗafa ta ŋkɛ.

¹⁹Gheŋkɛ ya kamelɛ kedimə ghə, kwa nza ŋkɛ ne, kaganda nza wəndəa shɛ kande fete laka Mahwətə.»

²⁰Ma ke Mahwətə sha Moyize:

²¹«Ma kemenete nda fete nya dzawe wəndə ke Mahwətə laka sla nda tseŋwə ke menənyɛ te ghena ta wəshi: te ghena ta wəsə nya veyi mbeli ve, nya nzəɓəve ŋkɛ, nya ghərəve ŋkɛ keɗema nya zləgwəve ŋkɛ,

²²keɗema ne, wəsə nya kezanyɛ yasləyi ŋkɛ nda zhɛme fela tseŋwə ŋkɛ te kwete hwa wəshi nyi ne,

²³nahe wəndəa shɛ kemenete jaɗafa, nde fete ŋkɛ. Nda ŋkɛ kazhɛneke wəsə nya ghərəve, zləgwəhwe, sləyi ŋkɛ keɗema nya dapave nda mbeli,

²⁴keɗema ne, te ghəa wəsə nya zemete fela tseŋwə ŋkɛ. Pa ŋkɛ zhɛneke wəsəa shɛ pɛtɛ kase ba'a mtseheyite kwa mcɛfe ta bela ta səkəməa wəsəa shɛ yite. Pa fəave nda hɛ ke wəndə ke wəsə, ɗepetema ta ŋkɛ ke ghəa ŋkɛ kande fete.

²⁵Kwa sebe ta ŋkɛ, pa keseke nda game nya ɗema beze te, nya nza zləvə te kezha dzeghe melɛ kedimə ghə yitea Mahwətə ke nde dzeghe Shala.

²⁶Ma vəa ŋkwa nya ɓelate gəsəkəa kele jaɗafa seyi te wənə nde dzeghe Shala kənəa wəndəa shɛ kwa kema ta Mahwətə ne, kateyaɓemte geva jaɗafa ta ŋkɛ, ya tsema tsema wəsə nya kezhɛrete ŋkɛ kande fete.»