Read kapsiki Ka Lɛvi 8 Bible Online

Ka Lɛvi 8 - kapsiki bible

Ka Lɛvi 8

¹Ma ke Mahwətə sha Moyize:

²«Hekake yɛ Aron le ŋwalea ŋkɛ kase kadzemɛa cɛ lekwesa kebegeme geva. Fəke lekwesa nyi keveyi geva tekeleke, n'yi keve ŋkwa tekeleke, mca kedzeghe melɛ keyaɓe jaɗafa, gamea lɛmə bake ba'a kwaciga ta ɗafa nyi ɗema tenjɛne hwe kase.

³Kwa sebe ta ŋkɛ, rəkwə na tsenete pɛtɛa ka Israyɛl te ŋkwa shɛ.»

⁴Pa Moyize fate nda ŋa Mahwətə: pa tsenete ka Israyɛl mɛa mɛa cɛ lekwesa kebegeme geva.

⁵Tagha gɛ, ma ke Moyize sha mbeli pɛtɛ: «Wa nya wəsə nya gezete Mahwətə kamene nya.»

⁶Kwa sebe ta ŋkɛ, pa hekake yɛ Aron le ŋwalea ŋkɛ ba'a pɛmte hɛ wɛŋe le yɛmə.

⁷Pa ŋkɛ seɗete nda tɛagware ke Aron, hwepete nda hətə hwa hwə, seɗete nda rewebe ba'a lekwesa nya kənə. Pa ŋkɛ hwepete nda zewe nyi te lekwesa nya kənəa rewebe kwa wəmbə.

⁸Pa ŋkɛ hwepeyi nda wəsə nya helambaŋe kwa hate nya vame yɛ Əwrim le Təwmim ŋkɛ mbe.

⁹Pa ŋkɛ peɗekɛ nda ghə le wəsə kepeɗe ghə ba'a veyi lamba nya keveyi geva tekeleke, wəsə kepesa geva nya le mze kwa tere tere nya nza pa ta ŋkɛ kala ghwə ta wəfe mɛa kema te wəsə kepeɗe ghə, kala nya gezete Mahwətə.

¹⁰Pa Moyize kelete n'yi keve ŋkwa tekeleke ba'a fiate ŋkɛ te yɛ cɛ lekwesa kebegeme geva le wəshi nyi mbe kezha ve hɛ tekeleke.

¹¹Pa ŋkɛ yisəate n'yi mberefaŋe zhigə te reghwetɛ, kwa sebe ta ŋkɛ, pa fikɛ reghwetɛa shɛ ba'a wəshi kemene slene te, yɛ kwenə nya wəba le wəsə nya ntare mbeli te kezha ve hɛ tekeleke.

¹²Pa ŋkɛ veyi Aron tekeleke laka sheke n'yi kənəa ghəa ŋkɛ.

¹³Pa ŋkɛ gezete nda ke ŋwale Aron kahende geva kase: pa ŋkɛ seɗaghe nda ŋa nci tɛagware, hwepete nda ŋa nci hətə ba'a seɗete nda ŋa nci derə ke hɛ, kala nya gezete Mahwətə.

¹⁴Pa ŋkɛ keleke mca kedzeghe melɛ keyaɓe jaɗafa. Pa yɛ Aron le ŋwalea ŋkɛ dedapeyi dzeve kwa ghəa ŋkɛ.

¹⁵Pa Moyize sleyite ghə yite, taweve mimia ŋkɛ ba'a menate mimia shɛ le wəzege ta dzeve te tereme nyi te reghwetɛ, kezha yaɓemte. Kwa sebe ta ŋkɛ, pa shekeyi mimi nya ketene mimi yitea seɗa ta reghwetɛ. Tsetse veyi reghwetɛ ŋkɛ tekeleke kezha nza ŋkɛ kaŋkwa kedzeghe melɛ keyaɓe jaɗafa.

¹⁶Pa Moyize fəte merege nya kənəa helia mca shɛ pɛtɛ, bela ganyɛ ta mene ba'a ghwelese bake nci le merege nyi kənəa hɛ. Pa ŋkɛ teremte hɛ pɛtɛ te reghwetɛ.

¹⁷Ma bela ta mca nya ketene, hweta, sli ba'a wəshi nyi kwa hwə ne, pa mbeli teremte hɛ le ghwə pelɛke te wəmbəa ghedəkwə, kala nya gezave nda Mahwətə ke Moyize.

¹⁸Kwa sebe ta ŋkɛ, pa keleke game kedzeghe melɛ kwa tere tere. Pa yɛ Aron le ŋwalea ŋkɛ dedapeyi dzeve kwa ghəa ŋkɛ.

¹⁹Pa Moyize sleyite ghə yite ba'a yisəyi mimia ŋkɛ dzeyi vare yɛ bela ta reghwetɛ.

²⁰Pa ŋkɛ slave wəsə keseɗa shɛ kezhɛzhi kezhɛzhi ba'a teremte zhɛzhia shɛhɛ le ghə ba'a merege.

²¹Pa Moyize yaɓemte yɛ wəshi nyi kwa hwə le yɛ jajɛghwa ba'a teremte hɛ te reghwetɛ le slia game nya ketene kamelɛ kwa tere tere, kala nya gezete Mahwətə. Gheŋkɛ ya kamelɛ nya nza zəŋwəa n'yia ŋkɛ zeɗehwe nda ke Mahwətə.

²²Pa ŋkɛ keleke kwa bake ta game kezha dzeghe melɛ kegha slene ta ka dzeghe Shala. Pa yɛ Aron le ŋwalea ŋkɛ dedapeyi dzeve kwa ghəa ŋkɛ.

²³Pa Moyize sleyite ghə yitea gamea shɛ ba'a taweve mimia ŋkɛ. Pa ŋkɛ meneyi mimia shɛ te sleme kwa zeme ta Aron, tsagha te gweŋəa dzeve kwa zeme ba'a gweŋəa seɗa kwa zeme.

²⁴Pa ŋkɛ hendeke ŋwale tezhilia Aron kase ba'a meneyi mimia shɛ perə te sleme kwa zeme ta nci, tsagha te gweŋəa dzeve kwa zeme ba'a gweŋəa seɗa kwa zeme. Kwa sebe ta ŋkɛ, pa yisəyi mimi nya ketene dzeme vare yɛ bela ta reghwetɛ.

²⁵Pa Moyize fəte bela nyi nza merege te te game: dəŋərə, merege nya kənəa yɛ heli, bela ganyɛ ta mene, yɛ ghwelese bake nci le merege nya kənəa hɛ, tsagha seɗa kwa zeme.

²⁶Ma same kwa kwaciga ta ɗafa nyi ɗema tenjɛne hwe nya keveyi geva kwa kema ta Mahwətə ne, pa kelete gatewe nya ɗema tenjɛne hwe kwetɛŋe, gatewea n'yi kwetɛŋe ba'a gatewe kwa slɛfeslɛ kwetɛŋe. Pa ŋkɛ beteyi hɛ te bela nyi nza nyi merege te ba'a te seɗa kwa zeme nya.

²⁷Pa ŋkɛ beteyi nda hɛ pɛtɛ mbe dzeve ke yɛ Aron le ŋwalea ŋkɛ. Pa ŋkɛ geze nda ke hɛ kave nda ke Mahwətə le ɓela gəsəkəa ve nda wəsə.

²⁸Kwa sebe ta ŋkɛ, pa Moyize fəte shave mbe dzeve ta nci ba'a teremte hɛ te reghwetɛ, kənəa melɛ kwa tere tere. Tsetse dzeghe geva melɛ kegha slene ta ka dzeghe Shala. Zeɗehwe nda nza zəŋwəa n'yia ŋkɛ ke Mahwətə.

²⁹Laŋe Moyize kelete medzeŋezle ta wəsə keseɗa shɛ ba'a veyi kwa kema ta Mahwətə le ɓela gəsəkəa ve nda wəsə. Kaŋa ŋkɛ nza nyagha bela ta game kala gezave nda Mahwətə.

³⁰Pa Moyize kelete n'yi keve ŋkwa tekeleke ba'a meneve mimi nya te reghwetɛ. Pa ŋkɛ yisəate hɛ te Aron ba'a te yɛ lekwesa ta ŋkɛ, kwa sebe ta ŋkɛ ne, te ŋwalea ŋkɛ ba'a te yɛ lekwesa ta nci. Wa nya tsetse veyi geva Aron, ŋwalea ŋkɛ ba'a yɛ lekwesa ta nci tekeleke.

³¹Ma ke Moyize sha yɛ Aron le ŋwalea ŋkɛ: «Takɛ mə slia kwa bake ta game mɛa ŋkwa kedzembe cɛ lekwesa kebegeme geva. Te ŋkwa shɛ tezeme yɛ le ɗafa nyi ketakɛ geva yitea gəsəkəa shɛ, kala ghena nya gezave ŋayɛ 'ya.

³²Ma ketene sli keɗema ɗafa ne, pa yɛ betame hɛ mbe ghwə.

³³Tagha nza yɛ mɛa cɛ lekwesa kebegeme geva kahɛ mberefaŋe, kaslə yɛ kekiɗima gəsəkəa gha slene ta ŋayɛ nya kahɛ mberefaŋe we.

³⁴Mahwətə le ghəa ŋkɛ nde gezete kamene kala nya menete nya mbeli ɓeshi, kezha yaɓemte geva jaɗafa ta ŋayɛ.

³⁵Nza mə mɛa cɛ lekwesa kebegeme geva veci le viɗi kahɛ mberefaŋe. Ma tsagha ne, wərə yɛ kamene slene ta Mahwətə kaɗema kampə. Tsetse ghena nyi gezete ɗa Shala.»

³⁶Pa yɛ Aron le ŋwalea ŋkɛ menete pɛtɛa wəshi nyi gezave nda Mahwətə ke hɛ laka Moyize.