Read kapsiki Ka Lɛvi 9 Bible Online

Ka Lɛvi 9 - kapsiki bible

Ka Lɛvi 9

¹Ma te kwa deghese ta hɛ ne, pa Moyize hekake yɛ Aron le ŋwalea ŋkɛ ba'a mbelia jama ta ka Israyɛl.

²Ma ke sha Aron: «Kelete leve ta sla kezha dzeghe melɛ keyaɓe jaɗafa ba'a game kezha dzeghe melɛ kwa tere tere, nyi ɗema beze te hɛ bake nci. Katedzeghe nda melɛ na le hɛ ke Mahwətə.

³Kwa sebe ta ŋkɛ, ma pa na sha ka Israyɛl: Kelete mə zhɛfa kase kezha dzeghe melɛ keyaɓe jaɗafa, tsagha mca ba'a game nyi keva kwetɛŋe, nyi ɗema beze te, kezha dzeghe melɛ kwa tere tere.

⁴Kakwa keɗaŋe ne, keseve mə mca ba'a game kezha dzeghe nda melɛ kejikə ghə ke Mahwətə, zlaɓe le wəsə gəməa hə nya kehwaɗe hwaɗe le n'yi. Kwa nza ŋkɛ ma ɓeshi nya ne, katencɛ ŋayɛ ghəa ŋkɛ Mahwətə.»

⁵Pa hɛ fəke wəshi nyi ɓelate Moyize kase kadzemɛa cɛ lekwesa kebegeme geva, kwa sebe ta ŋkɛ, pa pɛtɛa ka Israyɛl hendeke geva ba'a ghereŋenji kwa kema ta Mahwətə.

⁶Ma ke Moyize: «Wa nya wəsə nya gezave ŋayɛ Mahwətə kamene, yitea ncɛ ŋayɛ geva zləvəa ŋkɛ nya.»

⁷Kwa sebe ta ŋkɛ, ma ke sha Aron: «Hendave nda geva ke reghwetɛ shɛ na dzeghekɛ melɛ kekelemte jaɗafa ta ŋa te wənə ba'a melɛ kwa tere terea ŋa. Zhɛne ne, ɓelate gəsəkəa kele jaɗafa seyi te wənə kezha ghəa ŋa ba'a kezha mbeli. Ɓiyitsa ne, dzeghekɛ melɛ kezha mbeli ba'a ɓelate gəsəkəa kele jaɗafa seyi te wənə, kala ghena nya gezete Mahwətə.»

⁸Pa Aron hendave nda geva ke reghwetɛ ba'a sleyite ghə yitea mca kedzeghe melɛ kezha jaɗafa ta ŋkɛ.

⁹Pa ŋwale ŋkɛ ndeke nda mimia wəsə keseɗa shɛ. Pa ŋkɛ hahwe wəzege ta dzeve hwe ba'a menate te tereme nyi te reghwetɛ, kwa sebe ta ŋkɛ, pa shekeyi mimi nya ketene yitea seɗa ta reghwetɛ.

¹⁰Pa ŋkɛ teremte bela nyi nza merege te, yɛ ghwelese ba'a bela ganyɛ ta mene ta wəsə keseɗa shɛ te reghwetɛ, kala nya gezave nda Mahwətə ke Moyize.

¹¹Ma kaŋa yɛ sli le hweta ne, pa mbeli beteyi hɛ te ghwə, pelɛke te wəmbəa ghedəkwə.

¹²Pa Aron sleyite ghə yitea game kedzeghe melɛ kwa tere tere. Pa ŋwalea ŋkɛ ndeke nda mimia wəsə keseɗa shɛ, pa yisəyi dzeme vare yɛ bela ta reghwetɛ.

¹³Pa hɛ fəave nda yɛ ghə le kweci zhɛzhi. Pa ŋkɛ teremte hɛ te reghwetɛ.

¹⁴Pa ŋkɛ yaɓemte wəshi nyi kwa hwə ba'a yɛ jajɛghwa, pa teremte hɛ te reghwetɛ, kənəa kweci zhɛzhi.

¹⁵Kwa sebe ta ŋkɛ, pa Aron dzeghekɛ melɛ kezha mbeli. Laŋe ŋkɛ te zhɛfa nya keleke mbeli kezha dzeghe melɛ keyaɓe jaɗafa, pa sleyite ghə yite ba'a dzeghekɛ melɛ le, kala nya dzeghekɛ ŋkɛ le mca.

¹⁶Pa ŋkɛ fəke wəshi keseɗa nyi bake kezha dzeghe melɛ kwa tere tere ba'a dzeghekɛ le hɛ kala ghena nya kegezete geva.

¹⁷Pa ŋkɛ kelete wəsə gəməa hə: pa ntave demake mbe dzeve ba'a teremte te reghwetɛ, kadzevare melɛ kwa tere tere nya kala kiɗi ta ŋkwa.

¹⁸Pa ŋkɛ slesleyite ghə yitea yɛ mca le game nyi fəke mbeli kezha dzeghe melɛ kejikə ghə. Pa ŋwalea ŋkɛ ndeke nda mimia wəshi keseɗa shɛhɛ ba'a pa yisəyi dzeme vare yɛ bela ta reghwetɛ.

¹⁹Pa hɛ fəave nda bela nyi nza merege te hɛ te mca ba'a te game, geze ta ŋkɛ, dəŋərə, merege nya kənəa wəshi nyi kwa hwə, yɛ ghwelese ba'a bela ganyɛ ta mene.

²⁰Pa hɛ veveyi wəshia shɛhɛ te yɛ medzeŋezle ta wəshi keseɗa nyi bake nyi, kwa sebe ta ŋkɛ, pa Aron teremte bela nyi nza nyi merege te hɛ te reghwetɛ.

²¹Pa Aron fəke yɛ medzeŋezle ba'a seɗa kwa zeme ke Mahwətə le ɓela gəsəkəa ve nda wəsə, kala ghena nya gezete Moyize.

²²Ma kwa kiɗimte dzeghe melɛ keyaɓe jaɗafa, melɛ kwa tere tere ba'a melɛ kejikə ghə Aron ne, pa kafete dzeve kənəa mbeli ba'a wəpikɛ hɛ. Kwa sebe ta ŋkɛ, ɓərəkwə ŋkɛ sawanyɛ pelɛ reghwetɛ.

²³Cape yɛ Moyize le Aron kadzembe cɛ lekwesa kebegeme geva. Ma kwa shave hɛ mbe ne, pa hɛ wəpikɛ mbeli. Tagha gɛ, pa zləvəa Mahwətə ncɛte nda geva ke ka Israyɛl.

²⁴Deɗamə ghwə tsete geva kwa kema ta Mahwətə ba'a teremte melɛ kwa tere tere ba'a bela nyi nza nyi merege te hɛ te reghwetɛ. Pɛtɛ ka Israyɛl kenakɛ wəsəa shɛ, ntake hɛ katsa gaghwe ba'a kagwəɗəŋə ntiŋə ghə mbe hɛɗi.