Read kapsiki Zhɛrɛmi 11 Bible Online

Zhɛrɛmi 11 - kapsiki bible

Zhɛrɛmi 11

¹Wa nya ghena ta Mahwətə nya kegezeke nda geva ke Zhɛrɛmi nya:

²«Yate mə ghena ta jikə geva nya menete mə le gheyɛ. Gezave nda ke ka Zhəwda ba'a ke ka Zhɛrəzalɛm,

³ma tegeze nda na ke hɛ: ‹Wa nya ghena nya geze Mahwətə, Shala ta ka Israyɛl nya: Bezla ya te wəndə nya keɗema kahawe va ghena ta jikə geva

⁴nya menete n'yɛ se vəashi le ka shihɛ ŋayɛ kwa kelakave hɛ 'ya shave mbe ghwə ta gezla mbe Ɛzhipte. Ma 'ya sha hɛ: Fa mə ghena ta ɗa ba'a mene mə slene megela le wəshi nyi geze ŋayɛ 'ya. Ma tsagha, kambelia ɗa tenza yɛ, 'ya perə, kaShala ta ŋayɛ tenza 'ya.

⁵Ma tsagha, kateyipə meɗe mɛ nya meɗeyi nda 'ya ke ka shihɛ ŋayɛ kwa, kave nda hɛɗi nya hwɛ yɛ ŋ'wa le yɛməa mze te ke hɛ, ŋkwa nya nza nya yɛ te ɓeshi.›» Ma 'ya zhɛnete: «Kaganda ŋa Mahwətə.»

⁶Ma ke Mahwətə sha 'ya zhɛkwa: «Zlapete ghena nyi dzeyi mbe yɛ meleme ta Zhəwda ba'a dzeyi kwa hweŋkwa nyi mbe Zhɛrəzalɛm: ‹Fate mə ghena ta jikə geva nya ba'a mene mə slene le.

⁷Ma kwa fəakame ka shihɛ ŋayɛ 'ya same kwa Ɛzhipte ne, kwele kwele zhigə se 'ya kageze nda ke hɛ, kala nya geze ŋayɛ nya 'ya te ŋkwa shɛ te ŋkwa shɛ pa ɓeshi kezha fa ghena ta ɗa yɛ.

⁸Ama kese hɛ kafa ba'a kave sleme yite we, yayata wəndə kantsə geva mbe ntɛaŋentɛa ghəa ŋkɛ. Vatse yipəyi ghena ta jikə geva nyi ɗema nyi hɛ kese kahawe ve 'ya kənəa hɛ ya tsemanyɛ nza ŋkɛ kaghena nyi gezeyi 'ya.›»

⁹Ma ke Mahwətə sha 'ya zhɛkwa: «Ghena yatsa ka Zhəwda le ka Zhɛrəzalɛm.

¹⁰Nahe hɛ kezhɛnate geva te jaɗafa nyi menete ka shihɛ nci nyi keɗema kese kafa ɗa ghena. Pa hɛ ndeke nda ghəa nci ke kweci shala kezha gwəɗəŋə kwa kema ta nci. Nahe ka Israyɛl le ka Zhəwda kenehemte jikə geva nya menete 'ya le ka shihɛ nci.

¹¹Vatse gɛ, wa nya ghena nya geze 'ya, Mahwətə nya: ‹'Ya kateve ndiremi nya shɛma hɛ kambele ve te hɛ. Te və nya tetsa ɗa lewela hɛ kezha kemane ne, kave sleme 'ya yite we.

¹²Ma mbeli nyi mbe yɛ meleme ta Zhəwda le nyi mbe Zhɛrəzalɛm ne, katetsa nda lewela hɛ ke shala nyi se hɛ katere nda 'wərdə, ama katembelete hɛ hɛ te vəa ndiremi we.

¹³Kwele kwele yɛ shala ta ŋa kala yɛ meleme ta ŋa Zhəwda ba'a nahe mbeli kepepate yɛ reghwetɛ ketere nda 'wərdə kwele kwele ke Ba'al nya kawəsə hawe dzeyi kwa hweŋkwa nyi mbe Zhɛrəzalɛm.›

¹⁴Ma gha gɛ Zhɛrɛmi, 'yɛwema kemane va 'ya kezha mbeli nyi ma, səkwə ɗa ma na keɗema mpi ɗa ma dzeve na kezha hɛ ma, kwa nza ŋkɛ katefa heka ta nci 'ya kese ndiremi we.»

¹⁵Ma ke Mahwətə: «Wəshi nyi ndiremi ndiremi yamene mbeli nyi ɗehwe 'ya. Wa yase hɛ kamene ki ghɛa ɗa wa? Wərə meɗe mɛa nci ba'a melɛ nyi dzeghe ɗa hɛ kafɛake ndiremi kedzete hɛ na? Laka wəshi nyi kala nyi nza hɛ kambelenji ve na?

¹⁶Nahe 'ya kehekate nda slə ke hɛ ‹kabekele nya gwəzləmə, nya nza ya nyi te kendeɗe ndeɗenji.› Ama mbe gaka nya wəba ne, katendə ghwə 'ya yitea slekea ŋkɛ, kateɓele geva dzeve nyi te 'ya.»

¹⁷Mahwətə nde berete nde mɓete. Gheŋkɛa shɛ nde ve ndiremi kadzete tsetsenya, va beze ghena nyi menete ka Israyɛl le ka Zhəwda. Kwa nza ŋkɛ nahe hɛ kebezemte nda wənə le melɛ nyi dzeghe nda hɛ ke Ba'al.

¹⁸Nahe Mahwətə kegezete ɗa, nahe 'ya kefave. Nahe ŋkɛ kencɛte ɗa wəshi nyi mene ka ghema ta ɗa.

¹⁹'Ya ne, kala gwedəa zhɛgwəa təmə nya kele mbeli kalə kasla ghə te se 'ya, keɗepe 'ya nda ghena yatsa hɛ yitea 'ya we. Ma ke hɛ: «Zamte ɓəmə sebe te wəfe nya le ya ta ŋkɛ, kelemte ɓəmə hwa wəshi nyi le mpi, yagha kwete wəndə kazhɛne kahekɛme sləa ŋkɛ!»

²⁰Ama gha ne Mahwətə nde berete ne, nde meha ghwə nya tiɗiɗi na. Gha nde newe wəshi nyi mawe le nyi zəzə wəndə. Katenakɛ wa dewa ta ŋa 'ya te hɛ, kwa nza ŋkɛ ke gha ndeke ŋa ghəa ɗa 'ya.

²¹Vatse gɛ, wa nya ghena nya geze Mahwətə te ka Anatot nyi keɗe zamte mpia ɗa nya, ma ke hɛ: «Sərəakɛ geze ghena te sləa Mahwətə, keɗema na kaɗe kamte te dzeve ta n'yɛ.»

²²Wa nya ghena nya geze Mahwətə nde berete te hɛ nya: «Katese 'ya kaɗa hɛ: kwamte mpa tempə ka mempɛhwetɛtia nci, va ma tempə ŋwale tezhili le ŋwalea kwɛa nci.

²³Wəndə shɛ katetene teghweme hwa hɛ we: 'ya kateve ndiremi te ka Anatot te va nya temeha ghwə 'ya te hɛ.»