Read kapsiki Zhɛrɛmi 17 Bible Online

Zhɛrɛmi 17 - kapsiki bible

Zhɛrɛmi 17

¹Ma ke Mahwətə: «Nahe fete ta ka Zhəwda kerafete geva kala wəsə nya rafete mbeli le metsasle lɛ keɗema le kwesa nya berete. Nahe nde kerafeyi geva kwa wənəa nci ba'a te tereme nyi te reghwetɛa nci.

²Kala nya zəzə hɛ te ŋwalea nci zəzə hɛ te yɛ reghwetɛa nci, te seləa nci nyi keveyi geva tekeleke ba'a te wəfe nyi gwəzləmə dzeme te yɛ wəmbəa ŋkwa.

³Ka Zhəwda, gheyɛ nyi kehawe va kweci shala dzeyi hwa yɛ ghweme ba'a hwa gamba ne, 'ya katefə nda mcɛləa ŋayɛ ba'a pɛtɛa wəshi nyi wəfərəakɛ yɛ ke mbeli, tsagha yɛ kələŋəa ŋayɛ. Va fete nyi menete yɛ dzeyi te hɛɗi ŋayɛ pɛtɛ temene 'ya.

⁴Gha le ghəa ŋa nde tesərə hɛɗi nya nza na te, nya ndeke ŋa nya 'ya. Katezhɛre ŋa 'ya kamava ta ka jaga ta ŋa te hɛɗi nya ɗema na keɗepe. Kwa nza ŋkɛ kala ghwə ŋkwa nya kwa wənəa ɗa, wəsə shɛ kagweɗakwete ŋkɛ we.»

⁵Wa nya ghena nya geze Mahwətə nya: «Ma wəndə nya keveyi wənəa ŋkɛ cakeɗake le 'ya, nya kevate zəzə ta ŋkɛ te wəndə ŋelɛ ba'a nya kedɛŋate geva te ntsehwele nyi te hɛɗi ne, kebezla bezla nza ŋkɛ.

⁶Yipə yipə ŋkɛ le wəfe nya te meha wəve. Wəsə shɛ kanza ŋkɛ kamenete kezha nakɛ zeɗe nza we! Hwa pelɛ nyi te ɓerama tenza ŋkɛ, te hɛɗi mekandɛ nya ɗema wəndə kanzate nza te.

⁷Ama kewəpi wəpi tenza wəndə nya kevate zəzə ta ŋkɛ ba'a nya kedɛŋate geva te Mahwətə.

⁸Yipə yipə tenza ŋkɛ le wəfe nya kemɓeyi geva mɛa yɛmə, nya kehaghe slərəa ŋkɛ kadzehwa yɛmə. Kazhɛ nda ghele we, ndɛzlɛ nza slekea ŋkɛ keveci keveci. Ya ɓɛaŋwela menete geva kava zake ne, wəsə shɛ kazhɛ nda we, nda ya yaya ŋkɛ.

⁹Wəsə shɛ mbəɗəkwə ma ke wənəa wəndə ŋelɛ we. Wəndə shɛ kambete we: wa nde nza kafate wa?

¹⁰'Ya Mahwətə ne, kanewe ŋkwa nya kwa wənə 'ya, nahe 'ya keɗepe ghena nyi zəzə mbeli. 'Ya nde ŋki nda wəsə ke yayata wəndə kala dzeghwa ta ŋkɛ ba'a kala zhɛme nya mbe slene nyi mene ŋkɛ.

¹¹Kala ghenda nya kevavere slesle nyi yakema ŋkɛ ne, tsagha wəndə nya kemenete mcɛlə le mbəɗəkwə. Ma nya fa zeɗe ŋkɛ te hɛ ne, rɛɗɛ hɛ kiɗinji, ma kakwa keɗaŋe, kagezhi tenza ŋkɛ.»

¹²Pasla nya nza zləvə te ya pelɛ ghweme se kakwa ghatenyɛ, tsagha ghɛa ɓəmə nya keveyi geva tekeleke!

¹³Mahwətə nya vate ghə ka Israyɛl te, pɛtɛ mbeli nyi kewəfəyite ŋa shewə va hawe! Ma mbeli nyi kezhɛrave ŋa wəmbə ne, kala slə nyi ɗahate mbeli te hɛɗi nza hɛ. Kwa nza ŋkɛ ne, nahe hɛ kewəfəyite Mahwətə nya kaɗaslea mpi.

¹⁴Mahwətə, mbete ɗa nda nza 'ya kambe, mbelete ɗa nda nza 'ya kambele. Kwa nza ŋkɛ gha yave zləvə 'ya te.

¹⁵Ma ke mbeli sha geze ɗa: «Tema ɗa ta Mahwətəa shɛ gɛ wa? Menete geva ŋkɛ tsetsenya gɛ ga!»

¹⁶Ama 'ya ne, kese 'ya kaŋka ŋa yitea kele ndiremi kase we, kese 'ya kamawe vecia beze kase we, nahe na keɗepe megela. Kwa kema ta ŋa gezemte yayata ghena ta ɗa 'ya.

¹⁷Mba na kesərəakɛ ɗa kabare bare va ghazlənə, gha nya kaŋkwa kewəfərə ta ɗa te vəa ndiremi.

¹⁸Nza ka ghweze mɛ hwa 'ya shewə va hawe, mba ŋkɛ kenza ka'ya! Bare bare hɛ va ghazlənə, mba ŋkɛ kenza ka'ya! Keleke vecia ndiremi kadzete hɛ, zamte sebe te hɛ pɛtɛ.

¹⁹Wa nya ghena nya gezete ɗa Mahwətə nya: «Kwiɗi slete ŋa kwa mɛ degha nya dzeki keɗema nya shave ka meghea ka Zhəwda kwa. Kwa sebe ta ŋkɛ, tsagha na menete mɛa kweci mɛ degha ta Zhɛrəzalɛm.

²⁰Ma pa na sha hɛ: ‹Fate mə ghena ta Mahwətə gheyɛ ka meghea kɛfia ka Zhəwda, gheyɛ ka Zhəwda ba'a mbeli nyi mbe Zhɛrəzalɛm, gheyɛ nyi kedzeki kwa mɛ degha nyi pɛtɛ.

²¹Wa nya ghena nya geze ŋkɛ nya: Ma te veci kezhɛne mpi ne, yate mə ghəa ŋayɛ va kele wəshi nyi ɗaŋeɗa dzeki kwa mɛ degha nyi te Zhɛrəzalɛm.

²²Mba yɛ kekele wəshi shave ki ghɛa ŋayɛ te veci kezhɛne mpi shɛ perə, menema kwete yɛ hwa slene ma. Veyi mə vecia shɛ tekeleke kaŋa ɗa kala nya gezave nda 'ya ke ka shihɛ ŋayɛ.

²³Kese hɛ kafa ghena ta ɗa we, kese hɛ kave sleme yite we, pa hɛ zhɛrete ghə ntɛaŋe ntɛaŋe. Hɛreɗɛ hɛ ɗema fa ba'a yɛ ghena ta ɗa.›

²⁴Ma ke Mahwətə: ‹Ama gheyɛ ne, fate mə ghena ta ɗa megela. Ma te veci kezhɛne mpi ne, yate mə ghəa ŋayɛ va kele wəshi nyi ɗaŋeɗa dzeki kwa mɛ degha nyi te meleme nya, veyi mə vecia shɛ tekeleke kaŋa ɗa ba'a mba yɛ kemene kwete hwa slene.

²⁵Ma tsagha, ka meghe nyi pelɛ pasla ta David, nyi kedzeghwa pelɛ gədəwə keɗema pelɛ wəmata gədəwə, mbelia jama ta nci, ka Zhəwda ba'a mbeli nyi mbe Zhɛrəzalɛm ka tedzeki kwa mɛ degha shɛhɛ. Kaghala ghala tenza mbeli mbe melemea shɛ.

²⁶Ma ɓiyitsa, katese mbeli mbe yɛ meleme ta Zhəwda, mbe meleme nyi dzeyi yitea Zhɛrəzalɛm, mbe hɛɗia Bɛnjamɛn, mbe meleme nyi kwake te ŋwela, mbe meleme nyi hwa ghweme ba'a mbe hɛɗia Nɛgɛv. Katefə wəshi kedzeghe melɛ kwa tere tere keɗema kweci melɛ, yɛ wəshi gəmə le 'wərdə kwa hə hə ba'a wəshi melɛ ketsa hana kase kadzembe ghɛa Mahwətə.

²⁷Ama keɗema yɛ kafa ghena ta ɗa, keɗema yɛ keveyi ɗa veci kezhɛne mpi tekeleke kaɗema kakele wəsə, ma kedzeki yɛ le wəshi nyi ɗaŋeɗa kwa mɛ degha nyi te Zhɛrəzalɛm te vecia shɛ ne, tagha, katendə ghwə 'ya yitea melemea shɛ. Katetere ghɛ ganji nyi mbe Zhɛrəzalɛm ŋkɛ ba'a katemte ghwəa shɛ we.›»