Read kapsiki Zhɛrɛmi 19 Bible Online

Zhɛrɛmi 19 - kapsiki bible

Zhɛrɛmi 19

¹Wa nya ghena nya gezete nda Mahwətə ke Zhɛrɛmi nya: «Kwiɗi kalə sha male kwa ŋa ghene shɛ na pave ghwelepe, kwa sebe ta ŋkɛ, tsehave kweci mbeli hwa tsene ta mbelia jama ba'a hwa ka dzeghe Shala.

²Shave ŋa kwa mɛ degha ta Kələ, laka zlərəa Hinom kezha zlape ghena nya tegeze ŋa 'ya.

³Ma pa na sha tegeze: Fate mə ghena ta Mahwətə ka meghea kɛfia ka Zhəwda ba'a mbeli nyi mbe Zhɛrəzalɛm. Wa nya ghena nya geze Mahwətə nde berete, Shala ta ka Israyɛl nya: 'Ya katekele ndiremi kase kadzete ŋkwa nya, ndiremi nya ketegaka kala berazlɛ ta va kwa sleme ta mbeli nyi ketefa.

⁴Kwa nza ŋkɛ nahe ka Zhəwda kewəfəyite ɗa, nahe hɛ kezhɛremte ŋkwa nya wale wale le tere nda 'wərdə ke kweci shala nyi ɗepetema hɛ, ya ka shihɛ nci, ya ka meghea ka Zhəwda. Bətə zamte ŋkwa shɛ hɛ mbe mimia mbeli nyi ɗema fete va hɛ.

⁵Pa hɛ ŋate nda ŋkwa tekeleke ke Ba'al kezha dzeghe nda melɛ kwa tere tere le ŋwalea nci. Ndagwara kegezave nda wəsə nya kala nyagha 'ya ke hɛ we, kegha 'ya kagezete ba'a kazəzəte we.»

⁶Ma ke Mahwətə: «Vatse gɛ ne, katese kwete hɛ nya ɗema mbeli mba kateheka ŋkwa nya ‹kaTofɛt› keɗema ‹kazlərəa Hinom›, ama ‹kazlərəa mpə ŋkwa›.

⁷Te ŋkwa nya ne, katezhɛre ntsehwelea ka Zhəwda le ŋa ka Zhɛrəzalɛm 'ya kawəsə gəmə, katempə hɛ 'ya kwamte mpa laka ka jaga ta nci, mbeli nyi keɗe kaza mpia nci. Katesərə nda geva ta nci 'ya kawəsə kezeme ta yɛ zleŋa ba'a yɛ kelɛ gamba.

⁸Katezhɛre Zhɛrəzalɛm 'ya kakwəfi nya ghazlənə mbeli ve. Pɛtɛa mbeli nyi ketedzeyi vare katesla heli ba'a katetsa lewela kwa nakɛ ndiremi nya te hɛ.

⁹Katezeme nda ŋwale tezhilia nci le ŋwalea kwɛ nci 'ya ke hɛ. Katezezeme ghəa nci hɛ va ndiremi ba'a va taze ta mehele nya teve hɛ ka jaga le mbeli keɗe kazamte mpia nci mbe.»

¹⁰Kwa sebe ta ŋkɛ, pa na peslemte ghwelepe nyagha kwa ntsə ta mbeli nyi nza yɛ le hɛ.

¹¹Ma pa na sha hɛ: Wa nya ghena nya geze Mahwətə nde berete nya: Katempə mbeli nyi 'ya ba'a meleme nya kala nya pesle ghwelepe rekɛ mbeli. Mba kandeɓete geva zhɛkwa we. Kaŋkwa kela mbeli nyi kempə mpə tenza Tofɛt, kwa ɗema ŋkwa shɛ te kwete ŋkwa.

¹²Ma ke Mahwətə: «Kala Tofɛt tezhɛre yɛ meleme nya 'ya le mbeli nyi mbe.

¹³Wale wale tezhɛre ghɛ nyi mbe Zhɛrəzalɛm 'ya ba'a ŋa ka meghea kɛfia ka Zhəwda kala ŋkwa nya mbe Tofɛt. Tsagha shɛ tenza ŋkɛ kaŋa pɛtɛa ghɛa nyi tere nda 'wərdə mbeli ke yɛ saseregwa ba'a nyi dzeghe nda melɛ mbeli le tɛ ke kweci shala pelɛ dɛɓerea nci.»

¹⁴Pa Zhɛrɛmi zhɛneke geva se mbe Tofɛt, ŋkwa nya ghwenakɛ Mahwətə kageze ghena ta ŋkɛ, pa sletenyɛ te ŋwela ta ghɛa Mahwətə. Ma ke sha mbeli nyi tagha pɛtɛ:

¹⁵«Wa nya ghena nya geze Mahwətə nde berete, Shala ta ka Israyɛl nya: ‹'Ya kateve yayata ndiremi nya gezete 'ya kadzete meleme nya ba'a kadzete meleme nyi dzeyi yite. Kwa nza ŋkɛ ntɛaŋe ntɛaŋe ghəa mbeli nyi mbe, nahe hɛ keɗema fa ghena ta ɗa.›»