Read kapsiki Zhɛrɛmi 2 Bible Online

Zhɛrɛmi 2 - kapsiki bible

Zhɛrɛmi 2

¹Ma ke Mahwətə sha 'ya:

²«Kwiɗi zlapete nda ghena nya ke ka Zhɛrəzalɛm: Wa nya ghena nya geze Mahwətə nya: mba nza ta ŋa nya se na kadegheli yitea ghəa ɗa, ɗe ta ŋa nya nza na kajɛmbezlɛ, kwa se na katəkwə təkwə ɗa kwamte te ɓerama, ŋkwa nya ɗema wəsə kapese te.

³Israyɛl, tekeleke se na kaŋa Mahwətə kala ka ghate ta wəshi nyi kenakanji te wəve. Ma yayata wəndə nya kekwaɗakɛ ŋa ne nahe ŋkɛ kebezemte ghena, taghanyɛ teme ndiremi te. 'Ya Mahwətə nde gezete.

⁴Fate mə ghena ta Mahwətə, gheyɛ mbelia Zhakob, gheyɛ hwelefefia Israyɛl pɛtɛ.

⁵Wa nya ghena nya geze Mahwətə nya: Laka wa nakɛ fete ta ɗa ka shihɛ ŋayɛ nda hwɛnji hɛ cakeɗake va 'ya wa? Nahe hɛ kelənji kwa sebe ta wəshi gəmə, nahe hɛ kezhɛrenji kawəshia kwadanji.

⁶Kese hɛ kageze: Tema Mahwətə nya kefəakave ɓəmə mbe hɛɗia Ɛzhipte, nya kese kancɛ ɓəmə hweŋkwa te ɓerama, dzeyi te mɛhɛwa ta hɛɗi, dzawa kwelɛ yɛ zlərə, dzeyi te hɛɗi nya nza yɛ ɓɛaŋwela ba'a ŋkwesle, nya ɗema wəndə kadzeghwate dzeghwa ba'a kanzate nza te wa?

⁷Nahe 'ya keleghe ŋayɛ kadzete hɛɗi nya mene wəshi, kezha zeme yɛ ya ta wəfe le kweci wəshi ganji yɛ. Ama dzetema ta ŋayɛ, pa yɛ zhɛremte hɛɗia ɗa wale wale. Pa yɛ zhɛremte wəvea ɗa kawəsə kwa ndiremi.

⁸Kegeze ka dzeghe Shala: ‹Tema Mahwətə wa›, ke hɛ we. Keɗepete ɗa ka ɗepe wəshi mahalegə we. Nahe mbeli nyi te ghə keɗema ghena ta ɗa. Te sləa Ba'al geze ghena ka mɛ ŋkwa ba'a ke wəshia kwadanjia shala hwɛ nda hwɛ hɛ.

⁹Vatse mene ghwə mə le gheyɛ zhɛkwa, tsagha le hwelefefia ŋayɛ, wa'a ke Mahwətə.

¹⁰‹Kwiɗi mə newakɛ mə hɛɗia Shipre nyi te tepe ta yɛmə, ghwenakɛ mə mbeli kadzembe Kɛdar kafave megela, neweve mə kenza ŋkɛ nahe wəsə nya kala nya kegha kamenete geva.

¹¹Kambeɗemte yɛ shala ta ŋkɛ kwete hwelefe na? Ndagwara kenza hɛ kashala we! Ama nahe mbelia ɗa kekelemte zləvə te ghəa nci le wəsə nya keɗema kamenete wəsə.

¹²Nza mə heheɓake, gheyɛ nyi pelɛ ghweme, bare bare mə va ghazlənə, wa'a ke Mahwətə.

¹³Zhigə bake menete ɗa fete mbelia ɗa: pa hɛ wəfəyite ɗa, 'ya nya kaɗaslea mpi kezha la yɛ ghwa, ghwa nyi ɗema yɛmə kaghereŋe kwa kala ghwelepe nyi kendətsə!›»

¹⁴Nahe Israyɛl kenza kamava na? Mbe mava yake geva ŋkɛ na? Wa raberə mene nda kweci mbeli kala nde daŋgayɛ wa?

¹⁵Gheŋkɛ yaghwəghwə hɛ kənə kala ŋwalea nivɛrə, lewela yatsa hɛ kənə. Pɛtɛ hɛ ketazemte hɛɗia ŋkɛ. Nahe hɛ kendəmte yɛ meleme ta ŋkɛ, kafəmte mbeli nyi mbe hɛ.

¹⁶Pa le ka mɛmfis ba'a ka Tapanɛs kezhɛrete ŋa kamava.

¹⁷Kaɗema va nya wəfəyite Shala Mahwətə ta ŋa na te və nya se ŋkɛ kancɛ ŋa hweŋkwa nda menete ŋa geva ŋkɛ kala nya na?

¹⁸Tsetsenya, wa wəsə nya kemanakɛ ŋa dzawa Ɛzhipte kasa yɛməa Nil wa? Wa nde ghwete ŋa kajive Asiri kasa yɛməa Efrate wa?

¹⁹Dzeghəa ghəa ŋa wəsə kwa ndiremia ŋa! 'Yɛte ŋa fama ghena ta ŋa! Tsagha nza na kafave 'yaghwa ta ŋkɛ le ndiremia ŋkɛ kwa wəfəyite Shala Mahwətə ta ŋa na! Kaganda, kezhɛne kahawe va 'ya we, wa'a ke Shala Mahwətə nde berete.

²⁰Ma ke Mahwətə: «Israyɛl, ɓeshi ɓeshi ɗema ghena ta ɗa na we. Nahe na kenehemte geva le 'ya, ma pa na: ‹Waɗe ɗe ghəa ɗa 'ya›. Pelɛ ghəa yayata wəmbə ba'a yitea yayata wəfe nya gwəzləmə ne, waɗe na kepeleyi ghəa ŋa kamene mefətekwə.

²¹Ndagwara 'ya nde mɓete ŋa kala wəfe ta rɛzɛŋe nya ganyɛ, kala kwatepese ta wəfe nya ndeɗe. Tsema zhɛre ŋa na kala rɛzɛŋe gamba nya keya kazhi kazhi wa?

²²Ya gha pɛkɛ pɛ le zlɛampəli, ya gha menete sempere kwele kwele zhigə te geva ne, mba nza reɗa ta fete ta ŋa kwa kema ta ɗa, wa'a ke Shala Mahwətə.

²³Tsema shɛ na geze: Wale wale 'ya we, kese 'ya kazele ghena ta yɛ Ba'al we, pa wa? Neweve tsema tsema se na kadzeghwa kwa zlərə, ɗepete wəsə nya menete na. Kala mbəkwəa zlegwemə nya kejagwəli na.

²⁴Kala ŋemalea kwara gamba nya keseneve ŋkwa nya te ɓerama na, ma wəsə nya mawe nde ne, ve ŋshi yitea ghweme kafa zəŋwəa sefə. Kenakanyɛ vəa nta gare vale ne, wəndə shɛ kaghereŋeyi ŋkɛ we. Ma ŋezhili nyi keɗe kadzeme ŋkɛ ne, kaleɓe ghəa nci hɛ kazele ŋkɛ we. Katesləyi ŋkɛ hɛ te terea nta.

²⁵‹Ntsehwele Israyɛl! Yagha na tenza le seɗa kaɗema tsahwa mbe ba'a le ŋwələ keghwele ghwele!› Ama: ‹Kamenete geva we! Yɛ shala ta kweci mbeli yaɗe 'ya ba'a kwa sebe ta nci ɗe 'ya kahwɛ›, a pa.

²⁶Gheyɛ ka Israyɛl, ka meghe, mbelia jama, ka dzeghe Shala, ka mɛ ŋkwa ne, bətə mbe hawe tenza yɛ kala ghərə nya cɛhate mbeli.

²⁷‹Gha ya kayite n'yɛ!›, pe yɛ sha sheghwə, ‹Gha nde yake n'yɛ!›, pe yɛ sha pelɛ. Kwa nza ŋkɛ kezhɛrave ɗa kema ta nci hɛ we, ama wəmbəa nci. Ma kese ndiremi, ‹Nde kambele n'yɛ›, pe yɛ.

²⁸Ama katezhɛne ŋayɛ 'ya: ‹Tema shala nyi menete yɛ gɛ wa? Sate hɛ, kenza ŋkɛ kambelete ŋayɛ hɛ kenza ndiremi te gheyɛ, kwa nza ŋkɛ kwele kwele yɛ shala ta ŋayɛ kala nza ta yɛ meleme ta ŋayɛ, ka Zhəwda.›

²⁹Yitea wa nehwene ɗa nehwene yɛ wa? Pɛtɛa ŋayɛ keɗema ghena ta ɗa, wa'a ke Mahwətə.

³⁰Kaɗa gəmə ɗate ŋwalea ŋayɛ 'ya, kese kave nda zəzə ghena ke hɛ we. Kala nivɛrə nya kempeɗe ŋkwa mpəmte ka mɛ ŋkwa ta ŋayɛ yɛ.

³¹Ma gheyɛ mbeli nyi te və nya ne, fate mə ghena ta Mahwətə! Kaɓerama zhɛre ɗa 'ya sha ka Israyɛl na? Kahɛɗi nya bətə mbe ŋkwesle na? Wa raberə geze mbelia ɗa: Ŋkwa nya ɗe n'yɛ yalə n'yɛ te, kazhɛne geva n'yɛ kase sha gha we, ke hɛ wa?

³²Kazaghəyite wəshi kepesa geva ta nta degheli na? Kazaghəyite lekwesa makwa ta nta makwa na? Ama nahe mbelia ɗa kezaghəyite ɗa se vəashi.

³³Yawa, nahe na keɗepemte ntsehwelea hwɛ yitea ka meghwateshi! Yitea gha teke wəshi nyi ndiremi ndiremi mi.

³⁴Pa te mɛa lekwesa ta ŋa mimia ka titikwəa kɛfi le ŋa mbeli nyi ɗema fete ve. Ndagwara kekeseve hɛ na kabelaŋe cɛa ŋa we, nya ya kawəsə nya keza ŋa.

³⁵Ma pa na sha geze: Fete va 'ya we, katsewe hwepe wənəa ŋkɛ te 'ya we. Ma kwa gezete na: Kemenete fete 'ya we, pa ne, katedzete ghwə mə le gha.

³⁶Va wa hwɛ na kalə cakeɗake kezha mbeɗe hweŋkwa ta ŋa wa? Ama katepəli ŋa hawe Ɛzhipte kala Asiri vəashi.

³⁷Katezhɛne geva na shave mbe le ghə teŋa va hawe, Nahe Mahwətə kekelemte zləvə te mbeli nyi vate ghə na te. Wəsə shɛ katekemanakɛ ŋa hɛ le we.»