Read kapsiki Zhɛrɛmi 25 Bible Online

Zhɛrɛmi 25 - kapsiki bible

Zhɛrɛmi 25

¹Te kwa wəfaɗe ta va ta Zhowakim, wəzege ta Zhoziyas, meghea ka Zhəwda te meghe ne, pa ghena ta Mahwətə gezeke nda geva ke Zhɛrɛmi te ghəa ka Zhəwda pɛtɛ. Va shɛ ya kakwa ghate ta va ta Nabəkodonozor, meghea ka Babilone te meghe.

²Ma ke nde mɛ ŋkwa Zhɛrɛmi sha ka Zhəwda ba'a mbeli nyi mbe Zhɛrəzalɛm:

³«Se te kwa meŋe mahekeneghəmbe ta va ta Zhoziyas, wəzege ta Amon, meghea ka Zhəwda te meghe pa ɓeshi ne, va bakemsə mahekeneghəmbe menete 'ya kazlape ŋayɛ ghena ta Mahwətə nya kegezeke ɗa geva ghwə yitea shaga ghwə yitea dəghwə, ama kese yɛ kafa we.

⁴Nahe Mahwətə keghweneke ŋayɛ ka mene slene ta ŋkɛ nyi kaka mɛ ŋkwa tagha taghanyɛ kaɗema yɛ kese kafa, kaɗema yɛ kese kave sleme yite.

⁵Ma ke sha gheyɛ: ‹Mpiyi dzeve yayata wəndə va dzeghwa kwa ndiremia ŋkɛ ba'a va wəshi nyi ndiremi ndiremi nyi mene ŋkɛ. Ma tsagha, katenza yɛ te hɛɗi nya ndeke ŋayɛ Mahwətə le ka shihɛ ŋayɛ se vəashi pa kaghala ghala.

⁶Ma keɗema yɛ kahawe va kweci Shala ba'a kagwəɗəŋə kwa kema ta nci, ma keɗema yɛ kaghweze mɛ hwa 'ya le mene wəshi nyi zhɛrete nyi yɛ kashala ne, kamene ŋayɛ wəsə kwa ndiremi 'ya we.

⁷Ama kese yɛ kafa ɗa ŋa ɗa we. Ama nya kehitema geva ne, pa yɛ bezemte ɗa wənə le wəshi menete yɛ le dzeve ta ŋayɛ, nyi keve ndiremi te gheyɛ›, 'ya Mahwətə nde gezete.

⁸Wa nya ghena nya geze Mahwətə nde berete nya: Ma kwa ɗema yɛ kese kafa ghena nyi gezeke 'ya ne,

⁹kateghwene ŋkwa 'ya kalə kaheka mbeli nyi laka bela kwa gwela ba'a nde mene slene ta ɗa Nabəkodonozor, meghea ka Babilone. Kateheka hɛ 'ya kase kaɗa hɛɗi nya le mbeli nyi te, kaɗa kweci hwelefefi nyi dzeyi yite. Kateza sebe 'ya pɛtɛ te gheyɛ le hɛ, katezhɛremte hɛɗi nya 'ya kakwəfi nya tetsa lewela ba'a nya mcakwe mcakwe mbeli va ndiremia ŋkɛ kaghala ghala. 'Ya Mahwətə nde gezete.

¹⁰Kateza yɛ zlewezla ta gəsəkə, yɛ cimə zlama, yɛ ciməa makwa, gaka ta yɛ pelɛ vena ba'a waŋea ghwə 'ya hwa hɛ.

¹¹Ndɛkwe tenza hɛɗi nya kakwəfi, kagamba gəmə. Pɛtɛ tenza hwelefefia shɛhɛ mbe dzeve ta meghea ka Babilone kava mberefaŋemsə.

¹²Ma ke Mahwətə: ‹Ma vəa ŋkwa nya tenahemte geva va nyi mberefaŋemsə nyi ne, kateme 'ya kənəa yɛ meghea ka Babilone le mbelia ŋkɛ tewəmbəreke beze ghena ta nci, kateɗa hɛɗia nci 'ya, katezhɛremte 'ya kaɓerama nya dɛrɛŋe rɛŋe kaghala ghala.

¹³Pɛtɛ teve ndiremi nyi gezete 'ya 'ya te hɛɗi nya, wəshi nyi kerafete geva mbe palepa nya, wəshi nyi gezete nde mɛ ŋkwa Zhɛrɛmi te mbeli pɛtɛ.

¹⁴Ma kwa sebe ta ŋkɛ, katenza ka Babilone mbe dzeve ta kweci hɛɗi nyi jama jama ba'a mbe dzeve ta ka meghe nyi berete berete. Kateŋki nda slene ta nci ba'a wəshi nyi ndiremi ndiremia nci 'ya ke hɛ.›»

¹⁵Wa nya ghena nya gezete ɗa Mahwətə, Shala ta ka Israyɛl nya: «Kelete zlerekwea tɛ nya nza nya hwepe wənəa ɗa pɛre te mɛa dzeve ta ɗa. Sahwe nda ke hwelefe nyi ghwene ŋa nya 'ya sha hɛ pɛtɛ.

¹⁶Katesa hɛ, katetsepe tsepe hɛ, kwetɛ kwetɛŋe tenza mehele ta nci kenakɛ mpa nya teve 'ya hwa hɛ hɛ.»

¹⁷Pa 'ya kelete zlerekwea shɛ mɛa dzeve ta Mahwətə, kasahwe nda ke hwelefefi nyi ghweneghe ɗa ŋkɛ sha hɛ pɛtɛ.

¹⁸Pa 'ya ghate te yɛ Zhɛrəzalɛm le meleme nyi mbe Zhəwda, ka meghea ŋkɛ ba'a mbelia jama ta ŋkɛ. Pa 'ya zhɛremte melemea shɛhɛ kakwəfi, kaŋkwa nya tsa lewela ba'a nya mcakwe mcakwe mbeli ve, kaghena kebezla ŋkwa. Tsagha mene geva ŋkɛ pa ɓeshi.

¹⁹Kwa sebe ta ŋkɛ, ŋa kweci hwelefefi nde tene: yɛ Farawon, meghea ka Ɛzhipte, ka mene slene ta ŋkɛ, mbelia jama ta ŋkɛ ba'a mbelia ŋkɛ pɛtɛ.

²⁰Tsagha kweci hwelefefi nyi kenzanji mbe Ɛzhipte. Pɛtɛa ka meghe nyi te hɛɗia Əws. Pɛtɛa ka meghe nyi te hɛɗia Filisti: nyi mbe Askalon, Gaza, Ɛkron ba'a bela ta Asdod nya ketene,

²¹ka Ɛdom, ka Mowab ba'a ka Amon,

²²pɛtɛa ka meghea kɛfia ka Tir, ŋa ka Sidon ba'a ŋa hɛɗi nya pelɛ kema ta ndərə,

²³mbeli nyi mbe Dɛdan, Tɛma, Bəwz ba'a pɛtɛa mbeli nyi ketsehe balɛaha,

²⁴pɛtɛa ka meghea kɛfia ka Arab ba'a pɛtɛa mbeli nyi kenzanji te ɓerama,

²⁵pɛtɛa ka meghea kɛfia ka Zimri, ŋa ka Ɛlam ba'a ŋa ka Mɛde,

²⁶pɛtɛa ka meghe nyi laka bela kwa gwela, nyi dekwe le nyi cakeɗa, pɛtɛa meleme nyi te hɛɗi lema kesakɛ wəsə kwa zlerekwea tɛ kewəndə kewəndə. Meghea ka Babilone nde tesa kwa sebe ta nci.

²⁷Ma ke Mahwətə sha 'ya kezha geze nda ke hɛ: «Wa nya ghena nya geze Mahwətə nde berete, Shala ta ka Israyɛl nya: sa mə, ghwəyi mə shɛ yɛ vənəhwə, bete mə geva selekə lekə te hɛɗi kwa nakɛ kafayɛ nya ghwenahwe 'ya hwa gheyɛ yɛ.»

²⁸Ma ke mtsehete: «Ma keɗema kweci mbeli kele zlerekwea shɛ va gha kezha sa ne, ma tegeze nda na ke hɛ: Nda yɛ kasahwe ya tsemanyɛ ŋkɛ, wa'a ke Mahwətə nde berete.

²⁹Kwa nza ŋkɛ te meleme nya keveyi ɗa geva tekeleke gha ve ndiremi 'ya ne, pa 'ya ntaghe shimpə kənəa gheyɛ pe yɛ sha ŋa ŋayɛ na? Ewə, kantaghe geva shimpə kənəa gheyɛ we, kwa nza ŋkɛ 'ya kaghwene kafayɛ kadzehwa mbeli nyi te hɛɗi pɛtɛ, wa'a ke Mahwətə nde berete.»

³⁰Ma na gɛ Zhɛrɛmi, zlapave nda ghena nyi pɛtɛ ke hɛ. Ma pa na sha hɛ: ghwəghwə yaghwəghwə Mahwətə pelɛagha yitea ghweme, gaka yagaka ŋkɛ sawa pelɛ ŋkwa nya keveyi nda geva tekeleke, ghwəghwə yaghwəghwə ŋkɛ kənəa mbelia ŋkɛ. Gaghwe yagaghwe ŋkɛ kənəa mbeli nyi te hɛɗi kala mbeli nyi kezleɗe rɛzɛŋe.

³¹Hwa'a te mendɛkwe ta hɛɗi lema gaka ta ŋkɛ, kwa nza ŋkɛ ghena ya va Mahwətə le mbeli, ghwə yameha ŋkɛ le mbeli pɛtɛ. Ama mɛke tenza ka mene fete va kafayɛ, wa'a ke Mahwətə.

³²Wa nya ghena nya geze Mahwətə nde berete nya: «Slə te kwete hwelefe hwa'a te kwete dzeghwa ndiremi, sefə nya wəba kavɛ se te mendɛkwe ta hɛɗi.»

³³Ma te vecia shɛ, selekə lekə tenza mbeli nyi mpəmte Mahwətə se te kwete mendɛkwe ta hɛɗi hwa'a te kwete, wəndə shɛ kezha fə hɛ keɗema kezha la hɛ we. Kala dədə tenza hɛ dzate te hɛɗi.

³⁴Gheyɛ ka ya wəshi, tsa mə kemagɛaŋwa, tsa mə lewela! Təŋwələŋwə mə geva dzate hwa hɛɗi, gheyɛ nyi nza wəshi kaŋa ŋayɛ. Kwa nza ŋkɛ nahe və kesla ghə te gheyɛ kese, kwetɛ kwetɛŋe tetaze yɛ, katebete yɛ te hɛɗi kala helape kwa dzeghala.

³⁵Ŋkwa kewəfərə shɛ va ka ya wəshi we, hweŋkwa kembele shɛ va ka sleke wəshi keseɗa we.

³⁶Kafefa lewela ta ka ya wəshi ba'a ŋgaɗe ghə ta ka sleke wəshi keseɗa mbeli: kwa nza ŋkɛ beze yabeze ŋkwa keya wəshia nci Mahwətə.

³⁷Shawe ŋkwa keya wəshi ganji kala wəsə nya mte wəndə va ghwə ta hwepe wənəa Mahwətə.

³⁸Nahe ŋkɛ kewəfəyite mbelia ŋkɛ kala nivɛrə nya kesate te ghweɓea ŋkɛ. Kaɓerama zhɛrenyɛ hɛɗia nci va mpa kwa zhɛma heli ba'a va ghwə ta hwepe wənəa ŋkɛ.