Read kapsiki Zhɛrɛmi 34 Bible Online

Zhɛrɛmi 34 - kapsiki bible

Zhɛrɛmi 34

¹Ma ke ghena ta Mahwətə gezeke nda geva ke Zhɛrɛmi vəa ŋkwa nza yɛ Nabəkodonozor, meghea ka Babilone le ka sewajɛa ŋkɛ, pɛtɛa meleme nyi te hɛɗi nyi sleke ŋkɛ ba'a mbeli pɛtɛ kampa le Zhɛrəzalɛm ba'a kweci meleme nyi dzeyi yite:

²«Wa nya ghena nya geze 'ya, Shala Mahwətə ta ka Israyɛl nya: Kwiɗi sha Sɛdɛsiyas, meghea ka Zhəwda, wa nya ghena nya geze Mahwətə nya pa shɛ: 'Ya kateve nda meleme nya ke meghea ka Babilone kezha teremte ŋkɛ le ghwə.

³Ma gha ne, katembele ŋa na ve we, katekese ŋa mbeli kezha ve nda. Kwa ntsə kwa ntsə tenza yɛ le meghea ka Babilone, gha le ghəa ŋa nde tezhɛne nda ghena. Kwa sebe ta ŋkɛ, laŋe tenza na kajive Babilone.

⁴Sɛdɛsiyas, meghea ka Zhəwda, fa ghena ta Mahwətə. Wa nya ghena nya geze ŋkɛ te ghəa ŋa nya: katemte na va kafayɛ we.

⁵Ama mbe zeɗe nza temte na. Kala nya se mbeli katere 'wərdə te nehwene ta ka shihɛ ŋa nyi kese pelɛ pasla mpelɛa ma ke gha tetere mbeli te nehwene ta ŋa. Ma ke mbeli sha tegha nehwene kazləvəa ŋa: ‹Kaŋa nde sleke ɗa yawe!› Kaganda ne, 'ya Mahwətə nde gezete.»

⁶Pa nde mɛ ŋkwa Zhɛrɛmi gezete nda ghena nyi pɛtɛ ke Sɛdɛsiyas, meghea ka Zhəwda mbe Zhɛrəzalɛm.

⁷Ma vəa ŋkwa shɛ ne, nahe ka sewajɛa meghea ka Babilone kehave nda mpa ke yɛ Zhɛrəzalɛm le kweci meleme ta Zhəwda bake nyi mba kazhɛne nda ghə: yɛ Lakish le Azɛka.

⁸Ma ke ghena ta Mahwətə gezeke nda geva ke Zhɛrɛmi kwa sebe ta nya tsahwe yɛ meghe Sɛdɛsiyas le mbeli nyi mbe Zhɛrəzalɛm kezha zlape pele ta ka mavashi waɗe.

⁹Yayata wəndə kapele mavashia ŋkɛ nyi kaka Ɛbrə waɗe, yɛ zhili le mi. Wəndə shɛ kazhɛne kave nda slene mava ke menənyɛ nya kande Zhəwda we.

¹⁰Pɛtɛa mbeli nyi te ghə ba'a pɛtɛa mbeli nyi ketsahwe ghena shɛ keyɛte kapele mavashia nci waɗe, yɛ zhili le mi, kaɗema mba kave nda slene mava ke hɛ. Yayata wəndə keyɛte ghena shɛ ba'a kepelakɛ mavashia ŋkɛ.

¹¹Ama kwa sebe ta ŋkɛ, pa hɛ zhɛrete mehele. Pa zhɛneke yɛ zhili le mi nyi pelakɛ hɛ waɗe ba'a pa hɛ zhɛne kandeke nda slene mava ke hɛ kaberete.

¹²Ma ke ghena ta Mahwətə gezeke nda geva ke Zhɛrɛmi:

¹³«Wa nya ghena nya geze Mahwətə, Shala ta ka Israyɛl nya: 'Ya perə ne, nahe 'ya kemenete jikə geva. Le ka shihɛ ŋayɛ menete 'ya kwa fəakave hɛ 'ya shave mbe Ɛzhipte, ŋkwa nya se hɛ kaka mavashi mbe.

¹⁴Ma 'ya sha hɛ: ‹Ma kwa sebe ta va mberefaŋe ne, yayata wəndə ŋayɛ kapele menənyɛ nya kande Ɛbrə nya kepamte nda ghəa ŋkɛ kamava ba'a nya kemenete nda slene kava ŋkwaŋe. Waɗe pelakɛ ŋkɛ kaslə.› Ama kese ka shihɛ ŋayɛ kafa ɗa ghena we, kese hɛ kave sleme yitea ghena nyi gezete 'ya we.

¹⁵Ama gheyɛ ne, nahe yɛ kezhɛrete dzeghwa ta ŋayɛ ba'a kemenete wəsə nya tiɗiɗi kwa ntsə ta ɗa, kwa nza ŋkɛ yayata wəndə ŋayɛ kezlapete kanza nde ghedəkwəa ŋkɛ waɗe. Nahe yɛ ketsahwe ghena kwa kema ta ɗa ki ghɛ nya keveyi ɗa geva tekeleke.

¹⁶Ama pa yɛ zhɛrete mehele ba'a kelemte zləvə te 'ya: nahe yayata wəndəa ŋayɛ kezhɛne kafəke ka mavashi, zhili ba'a mi nyi pelakɛ ŋkɛ waɗe. Pa yɛ zhɛne kaŋkeyite hɛ yitea slene mava.»

¹⁷Ma ke Zhɛrɛmi mtsehete: «Vatse gɛ ne, wa nya ghena nya geze Mahwətə nya: Pa yayata wəndəa ŋayɛ hi kazlapete pele mava ta ŋkɛ nya kamenənyɛ keɗema nya kande ghedəkwəa ŋkɛ waɗe. Ama kese yɛ kayɛ ɗa ghena we. Vatse geze 'ya, 'ya Mahwətə gɛ: kateghwene ŋayɛ mpa, ba ba'a ma 'ya. Ma tsagha, pɛtɛ tedake hɛɗia ka meghe nyi te hɛɗi lema kenakɛ ŋayɛ hɛ.

¹⁸'Ya kateve nda mbeli nyi kedzawanji wəmbəa jikə geva nyi menete n'yɛ le hɛ, nyi keɗema kehawete nda hawe ke ghena ta jikə geva nyi yɛhwe hɛ kwa ntsə ta ɗa le nehe mca bake mbe ba'a le dzeyi kwelɛ bela nyi bake shɛhɛ.

¹⁹Mbeli nyi te ghə mbe yɛ Zhəwda le Zhɛrəzalɛm, mbelia jama, ka dzeghe Shala, pɛtɛa mbeli nyi te hɛɗi nya, nyi kedzeyinji kwelɛ yɛ bela ta mca ne,

²⁰kateve hɛ 'ya mbe dzeve ta ka jaga ta nci, mbe dzeve ta mbeli nyi keɗe mpə ta nci. Katenza slia geva ta nci kawəshi kezeme ta yɛ zleŋa le yɛ kelɛ gamba.

²¹Ma yɛ Sɛdɛsiyas, meghea ka Zhəwda le ka mene slene ta ŋkɛ ne, 'ya kave hɛ mbe dzeve ta ka jaga ta nci, mbe dzeve ta mbeli nyi keɗe mpə ta nci, mbe dzeve ta ka sewajɛa ka Babilone nyi keslənji nyi cakeɗake yitea gheyɛ.

²²Katepele nda hweŋkwa 'ya ke hɛ kazhɛne geva kase kadzembe meleme nya. Katempa hɛ le, katekelehwe hɛ ba'a katendə ghwə yite. Kaɓerama nya dɛrɛŋe rɛŋe nya ɗema wəndə te tezhɛre meleme nyi mbe Zhəwda 'ya.» Nya ya kaghena nya gezete Mahwətə.