Read kapsiki Zhɛrɛmi 37 Bible Online

Zhɛrɛmi 37 - kapsiki bible

Zhɛrɛmi 37

¹Pa Nabəkodonozor, meghea ka Babilone veyi Sɛdɛsiyas, wəzege ta Zhoziyas kameghe te hɛɗia Zhəwda. Te ŋkwa Koniya, wəzege ta Zhowakim veyi ŋkɛ.

²Ama wəndə shɛ kese kafa ghena ta ŋkɛ nyi gezeke Mahwətə laka nde mɛ ŋkwa Zhɛrɛmi: ya meghe, ya mbelia jama ta ŋkɛ, ya ka Zhəwda we.

³Pa meghe Sɛdɛsiyas ghwenakɛ yɛ Yəwkal, wəzege ta Shɛlɛmiya le nde dzeghe Shala Sefaniya, wəzege ta Masɛya kalə sha Zhɛrɛmi, ma ke hɛ shɛ: «Ghen'yɛ se kampi ŋa dzeve kezha səkwə Shala Mahwətə ta ɓəmə kezha ghen'yɛ pɛtɛ.»

⁴Waɗe Zhɛrɛmi kadzeghwa dzeghwa ta ŋkɛ hwa mbeli te vəa shɛ. Kenaka mbeli kakeseyi ŋkɛ kwa daŋgayɛ we.

⁵Ɓiyitsa ne, nahe ka sewajɛa Farawon keshavenji mbe Ɛzhipte. Ma kwa fate ka Babilone nyi keɗa Zhɛrəzalɛm ne, pa hɛ hendemte geva ɓɛhwɛ seyi yite meleme.

⁶Tagha gɛ, ma ke ghena ta Mahwətə gezeke nda geva ke nde mɛ ŋkwa Zhɛrɛmi:

⁷«Wa nya ghena nya geze Shala Mahwətə ta ka Israyɛl nya: ‹Ma pe yɛ sha meghea ka Zhəwda nya keghweneke ŋayɛ kafa ghena va 'ya: ma ka sewajɛa Farawon nyi keshave kezha kemane ŋayɛ va mpa ne, nahe hɛ kezhɛneghe geva kadzembe Ɛzhipte.

⁸Katezhɛne geva ka Babilone kase kampa le meleme nya, katekelehwe hɛ ba'a katendə ghwə hɛ yite.

⁹Wa nya ghena nya geze 'ya, 'ya Mahwətə nya: Ghwetema ghəa ŋayɛ yɛ ma, gezema yɛ nahe ka Babilone kedzeghwanji ma. Kateslə hɛ we.

¹⁰Ya gheyɛ mpəmte ka sewajɛa ka Babilone nyi kempa nyi le gheyɛ, katesate yayata wəndəa nci nya keslerahwe have te ŋkwa mbe cɛ lekwesa ta ŋkɛ kezha ndə yitea meleme nya.›»

¹¹Ma kwa hendemte geva ka sewajɛa ka Babilone yitea Zhɛrəzalɛm va ka sewajɛa Farawon,

¹²pa Zhɛrɛmi ɗe kashavenyɛ mbe Zhɛrəzalɛm kalə kadzete hɛɗia Bɛnjamɛn kakele ŋa ŋkɛ bela ta wəve kezeme ghɛ.

¹³Ma kwa shave ŋkɛ mɛa mɛ degha ta Bɛnjamɛn ne, begeme hɛ le kwete wəndə nya te ghəa ka ya meghe nya nza sləa ŋkɛ kaIriya. Wəzege ta Shɛlɛmiya ba'a shia Hananiya ŋkɛ. Ncɛhape Iriya te Zhɛrɛmi, ma ke shɛ: «Gha kalə sha ka Babilone!»

¹⁴Ma ke Zhɛrɛmi zhɛnete: «Tseŋwə! Kezəzəte 'ya kalə sha ka Babilone we.» Ama kese Iriya kafa nda ŋa ŋkɛ we, pa keseve Zhɛrɛmi kakeleghe nda ke mbeli te ghə.

¹⁵Mɓɛke mbelia jama nyighɛ hwepete wənə va Zhɛrɛmi, pa hɛ pesleve. Kwa sebe ta ŋkɛ, pa hɛ ŋzlete ki ghɛa Yonatan, nde rafe wəshi nya zhɛrete mbeli kadaŋgayɛ.

¹⁶Jaslɛ mbeli ŋzleyi Zhɛrɛmi kwa daŋgayɛ nya kwa hɛɗi. Kwele kwele temə ŋkɛ kwa.

¹⁷Kwa sebe ta hɛ ɓɛhwɛ, pa meghe Sɛdɛsiyas ghwenakɛ ŋkwa kaheka. Ntake ka'yɛwe ve ki ghɛa ŋkɛ teghərə teghərə, ma ke shɛ: «Ghena nya gezeke ɗa Mahwətə ya shɛ tse na?» Ma ke Zhɛrɛmi zhɛnete: «E'e!» Wa nya ghena shɛ nya: «Kateve geva na mbe dzeve ta meghea ka Babilone.»

¹⁸Ma ke Zhɛrɛmi zhɛne 'yɛwete va meghe Sɛdɛsiyas: «Wa fete nya menete ŋa 'ya, keɗema ke ka mene slene ta ŋa ba'a keɗema ke mbeli nyi mbe Zhɛrəzalɛm nda veyi ɗa yɛ kwa daŋgayɛ wa?

¹⁹Tema ka mɛ ŋkwa ta ŋayɛ nyi kegezete ŋayɛ nyi kaɗema meghea ka Babilone katese kaɗa ŋa ba'a kaɗa hɛɗi nya wa?»

²⁰Ma ke Zhɛrɛmi keɗaŋemte ghena ta ŋkɛ: «Meghe yawe, kampi ŋa dzeve 'ya tsetsenya: kele ɗa ma na kadzeki ghɛa nde rafe wəshi Yonatan ma, katemte 'ya ki.»

²¹Tagha gɛ, pa meghe Sɛdɛsiyas gezete kezha ve Zhɛrɛmi mbeli ki ghɛa ka ya ŋkwa ba'a kezha ve nda 'yɛmbe dəghwəa ɗafa mbeli keveci keveci, ɗema ta ɗafa shɛ te ŋkwa nyi ta mbeli dzeyi mɛa hweŋkwa nyi mbe meleme. Tsetse se ŋkɛ nda nzanyɛ Zhɛrɛmi ki ghɛa ka ya ŋkwa.