Read kapsiki Zhɛrɛmi 41 Bible Online

Zhɛrɛmi 41 - kapsiki bible

Zhɛrɛmi 41

¹Ma te kwa mberefaŋe ta tere, hwa'a Ismayɛl, wəzege ta Netaniya ba'a shia Ɛlishama sha Gedaliya mbe Mispa. Kahwelefe ta meghe ba'a kawəndə nya kwele yitea meghe se ŋkɛ. Mbeli meŋe ya kwa sebe ta ŋkɛ. Vəa ŋkwa nza hɛ kazeme wəsə kezeme ki ghɛa Gedaliya ne,

²pepelɛhetɛme yɛ Ismayɛl le mbeli nyi meŋe nyi yite sate te ŋkwa, kawe kawe hɛ tsaslemte ŋkɛ le kafayɛ. Mbəhə hɛ peslekɛ wəndə nya veyi meghea ka Babilone te ghəa hɛɗia Zhəwda.

³Kwa sebe ta ŋkɛ, mɛke Ismayɛl mpəmte ka Zhəwda nyi mbe Mispa yitea Gedaliya pɛtɛ, tsagha ka sewajɛa ka Babilone nyi tagha.

⁴Hɛ bake kwa sebe ta nya peslekɛ Gedaliya mbeli ne, wəndə shɛ keɗepe we.

⁵Pɛkwe kweci mbeli deghesemsə se mbe Sishɛm, Silo ba'a Samari. Keŋsə ŋsə ghwɛmɛa nci, keŋkwahe ŋkwahe lekwesa ta nci ba'a keperawe perawe geva ta nci. Ha ba'a 'wərdə ya va hɛ kalə kabete mbe ghɛa Mahwətə.

⁶Pɛkwe Ismayɛl, wəzege ta Netaniya le nehwene shave mbe Mispa kezha begeme le hɛ. Ma kwa ntsehe ŋkɛ yitea hɛ, ma ke sha hɛ: «Nde mə kenewe Gedaliya, wəzege ta Ahikam.»

⁷Ama ntsehema ta nci mbe meleme ne, pa Ismayɛl, wəzege ta Netaniya le mbeli nyi yite mpəmte hɛ, tereke hɛ sha geva ta nci kwa belageji.

⁸Ama kweci mbeli meŋe hwa hɛ meŋe sha Ismayɛl: «Mba na kempə n'yɛ, kwa nza ŋkɛ mba wəshi kezeme ta n'yɛ kwamte hwa gamba te wəfərə, yɛ ha, megi, n'yi le yɛməa mze.» Tagha, pa Ismayɛl ɗema mpə hɛ le ka menəhɛ nci.

⁹Kebeŋwenyɛ belageji nya beteyi mbeli nyi kempə mpə nyighɛ Ismayɛl kwa. Meghe Asa nde late kwa nza hɛ kampa le Basha, meghea ka Israyɛl. Mpɛafe Ismayɛl viɗikɛ le mbeli nyi mpəmte ŋkɛ.

¹⁰Kwa sebe ta ŋkɛ, kəliɓə Ismayɛl fəhwe mbeli nyi ketene mbe Mispa kaka mavashi, tsagha ŋwalea kwɛa meghe, geze ta ŋkɛ, pɛtɛa mbeli nyi dapave nda Nebəwzaradan, wəndə nya te ghəa ka ya meghe ke Gedaliya. Ntəŋə Ismayɛl le ka mavashia shɛhɛ kalə sha ka Amon.

¹¹Fatema ta yɛ Yohanan, wəzege ta Karɛya le mbelia jama nyi te ghəa ka sewajɛ nyi yite ke wəsə kwa ndiremi nya menete Ismayɛl, wəzege ta Netaniya ne,

¹²nci hɛ tsenete mbelia nci kalə kampa le Ismayɛl. Pa hɛ kekave ŋkɛ mɛa ndərəa Gabawon.

¹³Ma kwa nakɛ yɛ Yohanan, wəzege ta Karɛya le mbelia jama nyi te ghəa ka sewajɛ nyi yite ka mavashia Ismayɛl ne, ntake hɛ kazlama.

¹⁴Tagha gɛ, pɛtɛ mbeli nyi fəke Ismayɛl kaka mavashi shave mbe Mispa zhɛrete geva kalə sha Yohanan, wəzege ta Karɛya.

¹⁵Ama kweracɛ yɛ Ismayɛl, wəzege ta Netaniya le mbeli deghese hwɛnji va Yohanan kalə sha ka Amon.

¹⁶Kwa sebe ta ŋkɛ, kəliɓə yɛ Yohanan, wəzege ta Karɛya le mbelia jama nyi te ghəa ka sewajɛ nyi yite te mbeli nyi ketene teghweme hwa mbeli nyi fəke Ismayɛl shave mbe Mispa, kwa sebe ta mte ta Gedaliya, wəzege ta Ahikam: zhili, ka sewajɛ, mi, ŋwale ba'a mbelia jama nyi fəke hɛ se mbe Gabawon.

¹⁷Cape kwa hweŋkwa, pa hɛ ghereŋenji mbe ghedəkwəa Kimeham, takwa yitea Bɛtelɛhɛm. Kadzawa Ɛzhipte zəzəte hɛ,

¹⁸kwa nza ŋkɛ nahe hɛ keghazlənənji va ka Babilone, ghala kwa peslekɛ Gedaliya, wəndə nya veyi meghea ka Babilone te ghəa hɛɗi Ismayɛl.