Read kapsiki Zhɛrɛmi 42 Bible Online

Zhɛrɛmi 42 - kapsiki bible

Zhɛrɛmi 42

¹Pɛtɛa mbelia jama nyi te ghəa wəvəsəa ka sewajɛ, geze ta ŋkɛ, yɛ Yohanan, wəzege ta Karɛya, Yezaniya, wəzege ta Hoshaya le mbeli nyi tagha pɛtɛ, se te ŋwale hwa'a te mbelia jama hendeke nda geva

²ke nde mɛ ŋkwa Zhɛrɛmi, ma ke hɛ shɛ: «Vate mehele te 'yɛwe ta n'yɛ təhwə təhwə, səkwə Shala Mahwətə ta ŋa kezha ghen'yɛ mbeli nyi ketene teghweme, kwa nza ŋkɛ keɓɛhwɛ n'yɛ ghen'yɛ kala nya newe nya na.

³Ncɛte n'yɛ hweŋkwa nya kele n'yɛ ba'a wəsə nya temene ghen'yɛ Shala Mahwətə ta ŋa.»

⁴Ma ke nde mɛ ŋkwa Zhɛrɛmi sha hɛ: «Nahe 'ya kefate! Katesəkwə Shala Mahwətə ta ɓəmə 'ya kala nya gezete ɗa yɛ. Kwa sebe ta ŋkɛ, kategeze zhɛne ta Mahwətə 'ya, wəsə shɛ katewəfərə 'ya va gheyɛ we.»

⁵Ma ke hɛ zhɛnete nda ke Zhɛrɛmi: «Kazeme ghen'yɛ kafela kamene wəsə nya gezete Shala Mahwətə ta ŋa kaŋa n'yɛ tserame. Nza Shala kande negha fete nya kaganda ba'a nya tiɗiɗi yitea fela ta n'yɛ!

⁶Ya ghena shɛ nza ganyɛke keɗema ndiremike, katefa nda ŋa Shala Mahwətə ta ɓəmə nya ghwene ŋa n'yɛ shɛ ghen'yɛ. Katezlama n'yɛ te ghena ta Shala Mahwətə ta ɓəmə nya fate n'yɛ.»

⁷Ma kwa sebe ta hɛ meŋe ne, pa ghena ta Mahwətə gezeke nda geva ke Zhɛrɛmi.

⁸Pa ŋkɛ hekakɛ yɛ Yohanan, wəzege ta Karɛya le mbelia jama nyi te ghəa wəvəsəa ka sewajɛ nyi yite pɛtɛ, tsagha mbeli nyi tagha, se te ŋwalea fəshi hwa'a te mbelia jama.

⁹Ma ke sha hɛ: «Wa nya ghena nya geze Shala Mahwətə ta ka Israyɛl nya ghweneghe shɛ kezha mpi ŋayɛ dzeve yite nya:

¹⁰‹Ma keyɛhwe yɛ kanza te hɛɗi nya ne, katezhɛne 'ya kaŋa ŋayɛ kenya teŋzla ŋayɛ 'ya. Katezhɛne 'ya kamɓe ŋayɛ kenya tenteɗe ŋayɛ 'ya. Katehi wəsə kwa ndiremi nya menete ŋayɛ 'ya 'ya.

¹¹Ma tsetsenya gɛ, zhɛnema yɛ kaghazlənə va meghea ka Babilone ma. Ma 'ya, 'ya Mahwətə: zhɛnema yɛ kaghazlənə ve ma, kwa nza ŋkɛ le gheyɛ 'ya kezha mbele ŋayɛ ba'a kezha fə ŋayɛ shave mbe dzeve ta ŋkɛ.

¹²Katezhɛ heli 'ya yitea gheyɛ, katezhɛ heli ŋkɛ yitea gheyɛ ba'a katepele ŋayɛ ŋkɛ kazhɛne geva kase kadzete hɛɗia ŋayɛ.›»

¹³Ma ke Zhɛrɛmi mtsehete: «Ya kwete kateɗema yɛ kafa nda ghena ke Shala Mahwətə ta ŋayɛ le geze: ‹Ewə, kanza n'yɛ te hɛɗi nya we.

¹⁴Megela ma dzawa Ɛzhipte n'yɛ. Kwagha ne, katezhɛne n'yɛ kanakɛ mpa we, katezhɛne n'yɛ kafa vɛ ta vəaŋə mpa ba'a katesa yaka va ma we. Kwagha ɗe n'yɛ kanza.›

¹⁵Yawa, tsagha ŋkɛ gɛ, fate mə ghena ta Mahwətə, gheyɛ ka Zhəwda nyi ketene. Wa nya ghena nya geze Mahwətə nde berete, Shala ta ka Israyɛl nya: ‹Ma nda kaganda tarete yɛ kadzawa Ɛzhipte, ma kedzawa yɛ kawəfərə ŋayɛ kwagha,

¹⁶ma mpa nya ghazlənə nya yɛ ve gɛ ne, katekesakɛ ŋayɛ ŋkɛ kwagha, mbe Ɛzhipte. Ma ma nya heha nya yɛ ve tsetsenya ne, katezele ŋayɛ nde kadzawa, kwagha tempə yɛ.

¹⁷Ma mbeli nyi ketarete nyi kadzawa Ɛzhipte kawəfərə ne, katempə hɛ va mpa, ma ba'a ba. Wəndə shɛ hwa hɛ katembele va ndiremi nya teve 'ya te hɛ we.›»

¹⁸Ma ke Zhɛrɛmi zhɛkwa: «Wa nya ghena nya geze Mahwətə nde berete, Shala ta ka Israyɛl nya: ‹Kala nya vaghe geva ghwə ta hwepe wənəa ɗa kənəa ka Zhɛrəzalɛm ne, tsagha tenza hwepe wənəa ɗa kənəa gheyɛ kedzawa Ɛzhipte yɛ. Gheyɛ yatekele mbeli kawəsə keyipə pa kenza mbeli kabezla ŋkwa, kaŋele ŋkwa, kageze ghena te wəsə nya ndiremi ba'a kapəli nda hawe ke wəndə. Katezhɛne yɛ kanakɛ hɛɗi nya tɛape we.›»

¹⁹Ma ke Zhɛrɛmi mtsehete: «Mahwətə nde geze ŋayɛ kezha ɗema yɛ kadzawa Ɛzhipte, gheyɛ ka Zhəwda nyi ketene. Fate mə megela, fəyitekeghə geze ŋayɛ 'ya ɓeshi.

²⁰Ma kwa ghwenakɛ ɗa yɛ kafa ghena va Shala Mahwətə ta ŋayɛ ba'a kwa 'yɛwete yɛ kasəkwə ŋkɛ 'ya kezha gheyɛ ne, ma pe yɛ: ‹Ncɛte n'yɛ wəshi nyi ɗe Shala Mahwətə ta ɓəmə tserame yitea mene slene ghen'yɛ le hɛ.› Vəa ŋkwa shɛ ne, nahe yɛ kezamte ghə yitea mpia ŋayɛ.

²¹Kwa nza ŋkɛ ɓeshi nya ne, ghena nya fate 'ya va Shala Mahwətə ta ɓəmə yageze ŋayɛ 'ya, ama hɛreɗɛ yɛ ɗema fa ghena nyi gezave ɗa ŋkɛ kezha gheyɛ.

²²Tsetsenya tse gɛ, ɗepete mə fate fate katempə yɛ va mpa, va ma keɗema va ba te hɛɗi nya telə nya yɛ kawəfərə.»