Read kapsiki Zhɛrɛmi 47 Bible Online

Zhɛrɛmi 47 - kapsiki bible

Zhɛrɛmi 47

¹Pa Mahwətə gezete nda ghena ta ŋkɛ ke nde mɛ ŋkwa Zhɛrɛmi te ghəa ka Filisti nda tese Farawon kaɗa Gaza.

²Wa nya ghena nya geze Mahwətə nya: «Wa nya ghwa kasawa laka bela kwa gwela. Zhɛre yazhɛre ŋkɛ kaghwa nya wəba, hwɛ yahwɛ ŋkɛ dzeyi te hɛɗi ba'a dzeyi hwa wəshi nyi te, dzeyi mbe yɛ meleme ba'a dzeyi hwa mbeli nyi mbe. Ntake mbeli katsa lewela, pɛtɛa mbeli nyi te hɛɗi kanehwene ghə.

³Kafefa gaka ta yɛ cɛpea yɛ gədəwə mbeli te hɛɗi, ghwəghwə ta yɛ wəmata gədəwə ba'a gəgə ta seɗa ta nci. Yare ghəa ka yitehɛnyɛa ŋwale yitea ŋwalea nci va taze ta mehele ta nci.

⁴Wa raberə wa? Va nya nza ŋkɛ kavecia mpə ta ka Filisti. Wəndə nya kenza kakemanakɛ meleme ta yɛ Tir le Sidon shɛ we. Mpə yampə ka Filisti ba'a mbeli nyi ketene te ghweme te hɛɗia Kaftor nya te tepe ta yɛmə Mahwətə.

⁵Keŋsə ŋsə ghə te mbeli nyi mbe Gaza. Tikə tikə mbeli nyi mbe Askalon. Gheyɛ mbeli nyi bebiya bebiya nyi mba te ghweme, pa te nyama və tefɛa yɛ yitea perawe geva wa?

⁶Ma pe yɛ: ‹Aya, hwa ta Mahwətə, kazhɛne mpi na tɛape wəka? Zhɛname geva mbe kwəɓəa ŋa, nza ŋa bivə, menema kwete wəsə na ma.›

⁷Ama tsema nza hwa shɛ kazhɛnakɛ mpi wa? Mahwətə nde pelave nda hweŋkwa kadzembe yɛ Askalon le hɛɗi nya mɛa ndərə.»