Read kapsiki Zhɛrɛmi 5 Bible Online

Zhɛrɛmi 5 - kapsiki bible

Zhɛrɛmi 5

¹Ma ke Mahwətə: «Zelemte mə hweŋkwa nyi mbe Zhɛrəzalɛm, newemte mə megela, 'yɛwemte mə, zelemte mə ŋkwa kebeke nyi mbe. Ma kesləyi wəndə nya kemene wəsə nya tiɗiɗi, nya kegeze kaganda yɛ ne, ma tsagha, katekele fete ta Zhɛrəzalɛm te wənə.»

²Ma kenza hɛ kazeme fela: «Le Mahwətə», ke hɛ sha geze, ama fela tseŋwə yazeme hɛ.

³Mahwətə, ashɛ kaganda yamawe ntsə ta ŋa wəka? Nahe na keɗate hɛ, ama kefate hɛ we. Nahe na keɗe kaza sebe te hɛ, ama hɛreɗɛ hɛ ɗema ve yitea ghə. Pa hɛ zhɛrete ghə nci ntɛaŋe ntɛaŋe, hɛreɗɛ hɛ ɗema mpi dzeve.

⁴Ma 'ya sha ghəa ɗa: «Ka dewə berete mbeli nyi, kala ka gezhia hɛɗi mene wəshi hɛ, keɗepe wəsə nya ɗe Mahwətə, wəshi nyi 'yɛwe Shala ta nci hɛ we.

⁵'Ya kategeze nda ghena ke mbeli nyi te ghə: kwa nza ŋkɛ nahe hɛ keɗepe wəsə nya ɗe Mahwətə, wəshi nyi 'yɛwe Shala ta nci.» Ama kanya kwetɛŋe hɛ: nahe hɛ kezhɛrenji kaka fama ghena ba'a kenehemte jikə geva ta nci le Shala.

⁶Vatse shave nivɛrə mbe gamba kampeɗe hɛ, kaslekwe hɛ makwagwele nya mbe gamba. Ɗeke ɗeke nza deghwava yitea yɛ meleme ta nci kezha mpeɗe yayata wəndə nya keshave. Kwa nza ŋkɛ kwele kwele yate geva fete ta nci, kaɓelate beze ghena ta nci mbeli we.

⁷Ma ke Mahwətə: «Tsema nza 'ya kakelemte ŋa te wənə wa Zhɛrəzalɛm? Nahe ŋwalea ŋa kewəfəyite ɗa, kalənji yitea zeme fela le yɛ shala gəmə. Pɛtɛa wəshi nyi kehi ndeke nda 'ya ke hɛ, ama nda vale tahe yamene hɛ, kazlezləgwə ŋkwa kedzeki ghɛa male mefətekwə hɛ.

⁸Kala ŋezhilia gədəwə gamba nyi dɛɓe dɛɓe, nyi keɗe vale hɛ, yayata wəndə katsa yɛyi kwa sebe ta male ta nde ghedəkwəa ŋkɛ.»

⁹Ma ke Mahwətə: «Ashɛ ganyɛke kemehate ghwə 'ya te mbeli nyi wəka? Kehi kawate dewa 'ya te mbeli nyi kala nyi wəka?

¹⁰Dzembe mə wəvea rɛzɛŋea ŋkɛ shɛ yɛ mpəmte, ama mpəmtema yɛ pɛtɛ ma! Gwahemte mə dzeve ta nci, kwa nza ŋkɛ ŋa Mahwətə hɛ we!

¹¹Kaganda fa ɗa ma ghena ka Israyɛl le ka Zhəwda», wa'a ke Mahwətə.

¹²Nahe ka Zhəwda keɗepema Mahwətə, ma ke hɛ: «Berete shɛ ve we, kakekave ɓəmə ndiremi we, kase mpa keɗema ma sha gheɓəmə we.

¹³Kasefə ghena ta ka mɛ ŋkwa ta nci, Shala nde geze nda ghena ke hɛ we. Nza ndiremia nci kənəa hɛ!»

¹⁴Vatse, wa nya ghena nya geze Shala Mahwətə nde berete nya: «Ma kwa nza ŋkɛ tsetse ghena ta nci, kaghwə tenza ghena nyi veyi nyi 'ya kwa mɛa ŋa gɛ Zhɛrɛmi, kasheghwə nyi tetere ghwə tenza mbeli nyi.»

¹⁵Ma ke Mahwətə: «Ka Israyɛl, 'ya tekele kwete hwelefe nya cakeɗake kase kampa le gheyɛ, hwelefe nya le berete ba'a nya vəashi. Kaɗepe ghena ta nci yɛ we, kafate wəsə nya geze hɛ yɛ we.

¹⁶Kala debea kwele gwecɛa nci, kaka katsala kɛfi ka sewajɛa nci.

¹⁷Pɛtɛ tezehwe wəshi hɛ: yɛ wəshia ŋayɛ nyi te wəve le ɗafa, yɛ ŋwale tezhilia ŋayɛ le ŋwalea kwɛ, yɛ wəshi keseɗa ta ŋayɛ nyi jama jama le nyi ɓɛhwɛ ɓɛhwɛ, yɛ wəfe rɛzɛŋea ŋayɛ le yɛ dasekwa. Katempəmte meleme nyi nza zli yite mpa, nyi vate mehele ta ŋa nyi na te.»

¹⁸Ma ke Mahwətə: «Ma te vəa shɛ, kateza sebe 'ya te gheyɛ pɛtɛ we.

¹⁹Ma kete'yɛwe hɛ: ‹Va wa vate ndiremi nyi Shala Mahwətə ta n'yɛ te ghen'yɛ kala nya wa?›, ke hɛ ne, ma pa na sha tezhɛne nda ke hɛ Zhɛrɛmi: ‹Gheyɛ wəfəyite ŋkɛ kezha hawe va kweci shala te hɛɗia ŋayɛ. Tsagha shɛ temene nda slene yɛ ke kweci mbeli te hɛɗi nya keɗema kaŋa ŋayɛ!›»

²⁰Ma ke Mahwətə: «Zlapave nda mə ghena nya ke mbelia Zhakob, fave nda mə ke ka Zhəwda.

²¹Fate mə ghena nya gɛ, gheyɛ mbeli nyi kagezhi ba'a ka dewə mehele, ntsə ya te gheyɛ, ama kanakɛ ŋkwa hɛ we, sleme ya va ghə va hɛ, ama kafa ghena hɛ we.»

²²Ma ke Mahwətə: «Kahawe yɛ va 'ya wəka? Kabare bare yɛ kwa kema ta ɗa wəka? 'Ya nde veyi ndaleghe kaghala ta ndərə, kaghala nya ɗema ŋkɛ kazlakemte kaghala ghala: kagaŋkeɓe geva ŋkɛ, ama berete shɛ ve we. Kawəvaɗe wəvaɗe ŋkɛ, ama kazlakemte we.

²³Ama mbeli nyi ntɛaŋentɛa mehele ba'a nyi keɗema kafa ghena yɛ. Pa yɛ zhɛrete wəmbə kaslə ŋayɛ.

²⁴Kegeze yɛ mbe ghəa ŋayɛ: ‹Hawe ɓəmə va Shala Mahwətə ta ɓəmə, gheŋkɛ nde me ɓəmə va kenakanyɛ vəa ŋkɛ, yɛ va cimə le va feghwe, gheŋkɛ nde ve ɓəmə və kemene wəshi te wəve keva keva›, pe yɛ we.

²⁵Yɛ jaɗafa ta ŋayɛ ka bezemte və pɛtɛ, yɛ beze ghena ta ŋayɛ ka fɛake wəshi ganjia shɛhɛ.

²⁶Kwa nza ŋkɛ ka 'yaghwa mehele ya hwa mbelia ɗa, tewəfərə nza hɛ kala ka kese 'yɛ le dagalawe. Nahe hɛ keŋeyi keleŋa kezha kese mbeli.

²⁷Mpɛafe ghɛa nci va wəshi nyi fəke hɛ le mbəɗəkwə kala kwaciga nya nza 'yɛ pɛre te. Vatse zhɛrenji hɛ kaka berete ba'a kaka mcɛləa kɛfi,

²⁸kedeke dekenji ba'a kedɛɓedɛa dɛɓedɛanji. Nahe hɛ kezlakemte ghala laka mene wəsə kwa ndiremi. Kamene wəsə nya tiɗiɗi hɛ we, kanewe wəsə nya tiɗiɗi hɛ kaŋa mezhɛte we, ama nda jive yajive hɛ mbe kema kaɓela ghena ta ka titikwəa kɛfi hɛ we.»

²⁹Ma ke Mahwətə: «Ashɛ ganyɛke kemehate ghwə 'ya te mbeli nyi wəka? Kehi kawate dewa 'ya te mbeli nyi kala nyi wəka?

³⁰Wəsə nya ghazlənə mbeli ve ba'a nya sla heli mbeli ve ka mene geva te hɛɗi:

³¹te sləa shala tseŋwə geze ghena ka mɛ ŋkwa, ghəa nci yamene ka dzeghe Shala le mbeli, tsagha shɛ ɗe mbelia ɗa. Ama tsema temene yɛ kesenyɛ kwa keɗaŋe ta və wa?»